وتكەن جىلدىڭ ون ءبىر ايىندا 66 وقيعا بولسا, بيىل بۇل كورسەتكىش ءتىپتى كوبەيىپ, 100 بالانىڭ تاعدىرى ويران بولعانى جايلى مالىمەت بار. بۇل پەدوفيلدەر تاراپىنان زورلىق كورگەن بالالار مەن كامەلەتتىك جاسقا تولماعان جاسوسپىرىمدەرگە قاتىستى وقيعالاردى قوسا العانداعى دەرەك.
وكىنىشتىسى, جاۋىزدىق ارەكەتتەر كوبەيگەن سايىن, قۇرباندىقتاردىڭ قاتارى دا جاسارىپ كەلەدى. انىقتالعان بىرنەشە دەرەككە توقتالساق, بيىل جانسۇگىروۆ كەنتىندە 5 جاسار ءبۇلدىرشىندى زورلاعان قورقاۋدىڭ قولىنا كىسەن سالىندى. زورلىقشىل الىستان ەمەس, كورشى ۇيدەن كەلگەن ەكەن. قاپشاعايلىق 9 جاستاعى ۇل بالانى زورلاۋعا ارەكەت جاساعان شەتەلدىك تۋريس تە قازىر قاماۋدا وتىر. تالدىقورعان دا 7 جانە 12 جاستاعى تۋعان قىزدارىمەن ۇزاق ۋاقىت بويىنا جىنىستىق قاتىناسقا ءتۇسىپ كەلگەن ازعىن اكە تۇتقىندالدى. ماتاي اۋىلىندا 2 قىزدى جابىرلەگەن جىگىت تە 16 جىلعا باس بوستاندىعىنان ايىرىلدى.
ايتپاقشى, بۇگىن وبلىس اكىمى اماندىق باتالوۆ زورلىق-زومبىلىق كورگەن جاسوسپىرىمدەرگە پسيحولوگيالىق كومەك كورسەتكەن ەرىكتى مامان, ماتاي ورتا مەكتەبىنىڭ پسيحولوگى اجار دۇيسەنبەكوۆانى قابىلدادى. مەكتەپ ۇستازى بيىل اۋىلداعى زورلىق كورسەتۋ فاكتىسىن انىقتاپ, كىنالىنىڭ جازاعا تارتىلۋىنا مۇرىندىق بولعان-دى. ول ءجابىر كورگەن جاسوسپىرىمگە دەر كەزىندە پسيحولوگيالىق كومەك كورسەتىپ, وزىنە قول سالۋدان ساقتاپ قالدى.
-مەنىڭ ورنىمدا بولسا, كەز كەلگەن پسيحولوگ وسىلاي جاسايدى دەپ ويلايمىن. مەن ءبىر ەرەكشە ءىس جاسادىم دەمەيمىن, تەك ءوزىمنىڭ كاسىبي مىندەتىمدى ورىندادىم. ءاربىر بالا مەيىرىم مەن ماحابباتقا بولەنىپ ءوسۋى كەرەك, بالاعا زورلىق جاساۋعا ەشكىمنىڭ دە حاقى جوق. ءبىز ءاربىر بالانىڭ تاعدىرىنا جاۋاپتىمىز, دەيدى اجار دۇيسەنبەكوۆا.
