«مينيسترلىك قۇرىلعان 2016 جىلدان بەرى «شەتەلدىك فيلمدەر قاپتاپ» كەتتى دەگەن ماسەلەنى الدىمەن قولعا الدىق. وسى جۇمىس اياسىندا جىلدان-جىلعا وتاندىق تەلەحيكايالار سانىن كوبەيتىپ جاتىرمىز. بۇل الەمگە ەلىمىزدى, ەلدىگىمىزدى, ءداستۇرىمىزدى تانىتاتىن جاقسى مىسالداردىڭ ءبىرى دەپ ەسەپتەيمىز. كەلەسى جىلى ابايدىڭ, ءال-ءفارابيدىڭ مەرەيتويلارى كەلە جاتىر. كوپشىلىك نازارىنا ۇسىنىلعان بۇل جوبا – سول باستامالاردىڭ ءبىرى عانا دەپ قابىل الىڭىزدار», - دەدى تاريحي جوبانىڭ جۇزەگە اسۋىنا قولداۋ بىلدىرگەن سالا باسشىسى.
«وربۇلاق شايقاسى» - 1643 جىلى وربۇلاق ماڭىندا 50 مىڭ قولعا توتەپ بەرگەن 600 قازاق ساربازى تۋرالى تۇسىرىلگەن العاشقى تەلەحيكايا.
«بۇل سەريال - تاريحتى تۇگەندەۋ ىسىنە قوسقان ۇلەسىمىز. «وربۇلاق شايقاسى» تەلەحيكاياسىنىڭ تۇسىرىلىمدەرى الماتى, جامبىل, تۇركىستان وبلىستارىندا جانە وربۇلاقتىڭ وزىندە جۇرگىزىلدى. تاريحي سەريالداردى ءتۇسىرۋ - وتە كۇردەلى ءارى قىمبات پروتسەسس. سوندىقتان بۇل باعىتتا ازىرگە تەك مەملەكەتتىك ارنالار عانا قادام جاساپ كەلەدى. ءبىز جىل سايىن تاريحي سەريالدار سانىن كوبەيتۋ مىندەتىن العا قويىپ وتىرمىز. كەلەسى جىلى اباي مەن ءال-فارابي تەلەحيكايالارى تۇسىرىلەدى», - دەدى «قازاقستان» رەسپۋبليكالىق تەلەراديو-كورپوراتسياسىنىڭ باسقارما ءتورايىمى ءلاززات تانىسباي.
ايتا كەتەيىك, تەلەحيكايانىڭ پروديۋسەرى بۇعان دەيىن «كەيكى مەرگەن», «تار زامان» تاريحي تۋىندىلارىن تۇسىرگەن مۇرات بيدوسوۆ, كەڭەسشىسى - جازۋشى, مەملەكەتتىك سىيلىقتىڭ يەگەرى بەكسۇلتان نۇرجەكەەۆ.
8 ءبولىمدى تەلەحيكايا «Qazaqstan» ۇلتتىق تەلەارناسىنان 16-17 جەلتوقسان كۇندەرى cاعات 14:50-دە كورسەتىلەدى.
