ايماقتار • 12 جەلتوقسان، 2019

نۇرلان نوعاەۆ: «ەكولوگيا پروبلەماسى اتىراۋ وبلىسىنىڭ بارلىق تۇرعىندارىن الاڭداتادى»

33 رەتكورسەتىلدى

12 جەلتوقساندا اتىراۋدا وبلىستىق ءماسليحاتتىڭ كەزەكتى جانە بيىلعى قورىتىندى سەسسياسى ءوتتى. سەسسيا بارىسىندا دەپۋتاتتار ايماقتىڭ ءۇش جىلدىق بيۋدجەتىن ماقۇلدادى، دەپ حابارلادى وڭىرلىك كوممۋنيكاتسيالار قىزمەتى.

وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ باسشىسى ايدار نۇراليەۆتىڭ ايتۋىنشا، الداعى جىلعى وبلىس بيۋدجەتى - 382،5 ملرد تەڭگە، 2021 جىلى – 398،8 ملرد تەڭگە، 2022 جىلى - 416،1 ملرد تەڭگەگە ارتادى. وبلىستىق ءماسليحات دەپۋتاتتارى ايماقتىڭ ءۇش جىلدىق بيۋدجەتىن ءبىراۋىزدان ماقۇلدادى.

حالىق قالاۋلىلارى اتىراۋ وبلىستىق ەكولوگيا دەپارتامەنتىنىڭ باسشىسى اباي ءسافيننىڭ ەسەبىن قىزۋ تالقىعا سالدى. ءوڭىردىڭ باس ەكولوگى ايتقان مالىمەتكە سۇيەنسەك، قورشاعان ورتاعا زياندى قالدىقتار كوپ تاستايتىن ءبىرىنشى ساناتتاعى 147 تابيعات پايدالانۋشى بيىل تابيعات قورعاۋ شارالارىنا 24،7 ملرد تەڭگە جۇمساۋى كەرەك بولعان. ونىڭ باسىم بولىگى – 20 ملرد تەڭگە – تشو (4 ملرد)، ءاموز (2 ملرد)، نكوك (14 ملرد) ۇلەسىندە. دەپۋتاتتار جۇرگىزىلىپ جاتقان جۇمىستاردىڭ تيىمدىلىگىنە سەنىمسىزدىك ءبىلدىردى. مىسالى، نكوك اقپاسۋدى تازارتۋ زاۋىتىنىڭ قۇرىلىسىنا 12 ملرد تەڭگە بولۋگە مىندەتتى بولعان. بىراق جوبا ىسكە اسپادى. كوگالداندىرۋ باعىتىنداعى جۇمىستار دا سىنعا ۇشىرادى. وبلىستىق ەكولوگيا دەپارتامەنتىنىڭ باسشىسى تابيعات قورعاۋ شارالارىنا قاراجات ءبولۋ مەن يگەرۋ، قورشاعان ورتاعا ەميسسيالارعا رۇقسات ماسەلەلەرى ەكولوگيالىق رەتتەۋ جانە باقىلاۋ كوميتەتىندە شەشىلىپ جاتقانىن ايتتى جانە قازىر ەكولوگيالىق كودەكسكە وزگەرتۋلەر دايىندالىپ جاتقانىن، بۇزۋشىلىقتار ءۇشىن قولدانىلاتىن شارا كۇشەيتىلەتىنىن اتاپ ءوتتى.

اتىراۋ وبلىسىنىڭ اكىمى نۇرلان نوعاەۆ قورشاعان ورتا جاعدايىنا قاتىستى ماسەلەگە نازار اۋدارىپ، وبلىستىڭ باس ەكولوگىنىڭ ۇستانىمىمەن كەلىسپەيتىنىن ايتتى.

-ءبىز قازىر كوميتەتتە ەكولوگيالىق كودەكسكە تۇزەتۋلەر دايىندالىپ جاتقانىنان حاباردارمىز، بىراق وعان ءۇن قوسپاي وتىرۋعا بولمايدى. سىزدەردىڭ مىندەتتەرىڭىز - جەرگىلىكتى جەردە تابيعات قورعاۋ شارالارىنىڭ ورىندالۋىنا، بۇزۋشىلىقتارعا باقىلاۋ جاساۋ، دەدى وبلىس اكىمى ەكولوگيا دەپارتامەنتىنىڭ باسشىسىنا. – ەكولوگيا پروبلەماسى اتىراۋ وبلىسىنىڭ بارلىق تۇرعىندارىن الاڭداتادى. ادامدار كۇن سايىن Telegram چاتتا ەكولوگيا پروبلەماسى، جاعىمسىز يىستەر، ولاردىڭ دەنساۋلىققا اسەرى تۋرالى جازادى. ءبىز الدىمەن وسى ماسەلەنى شەشۋىمىز كەرەك. ءوندىرىس تولىعىمەن ەكولوگيالىق جاعىنان قاۋىپسىز بولا المايتىنىن جاقسى تۇسىنەمىن، بىراق، سىزدەر دە تابيعاتقا كەلتىرىلەتىن زالالدى ازايتۋدىڭ جولدارىن تابۋعا تيىسسىزدەر.

اكىم قازىر ناقتى شارالار قولدانۋعا قاجەت بارلىق تەتىكتەر بار ەكەنىن اتاپ ءوتتى. بۇل جاعدايمەن تەك ءبىر ادام، ءبىر باسقارما اينالىسپاۋى كەرەك.

-قورشاعان ورتانى تازا ۇستاۋعا، ادامداردىڭ ومىرلەرى مەن دەنساۋلىقتارىنا تەرىس اسەر ەتۋ دەڭگەيىن تومەندەتۋگە باعىتتالعان تابيعات قورعاۋ شارالارى جۇيەلى نەگىزدە جاسالۋى كەرەك. وعان وبلىستىڭ بارلىق تۇرعىندارى، جەرگىلىكتى اتقارۋشى بيلىك پەن جەر قويناۋىن پايدالانۋشىلار قاتىسۋى ءتيىس. قازىر ءىرى كاسىپورىندارمەن ءبىزدىڭ ىقپال ەتۋىمىزبەن بەلگىلى ءبىر جۇمىستار ءجۇرىپ جاتىر، بىراق بۇل جەتكىلىكسىز، جۇمىس ۇزدىكسىز ىسكە اسۋى كەرەك، دەپ اتاپ ءوتتى نۇرلان نوعاەۆ.

وبلىس اكىمى دەپۋتاتتار مەن جەرگىلىكتى اتقارۋشى بيلىكتىڭ بىرلەسىپ اتقارعان جۇمىسى ايماقتىڭ دامۋىن جاڭا دەڭگەيگە كوتەرگەنىن اتاپ ءوتتى.

-وبلىستا جاڭا الەۋمەتتىك نىساندار پايدالانۋعا بەرىلدى، رەفراقۇرىلىم دامۋدا. مۇنىڭ ءبارى ۋاقىتىندا قارجىلاندىرۋعا جانە بيۋدجەت قاراجاتىنىڭ جۇمسالۋىنا باقىلاۋدىڭ ساپالى جۇرگىزىلۋىنە بايلانىستى. بولاشاقتا دا ءوڭىر ەكونوميكاسىن دامىتىپ، الەۋمەتتىك سالاعا ماڭىز بەرۋدى جوسپارلاپ وتىرمىز، - دەدى نۇرلان نوعاەۆ. - مەملەكەت باسشىسىنىڭ وڭىرلىك بيۋدجەتتىڭ جارتىسىنان استامىن الەۋمەتتىك ينفراقۇرىلىمدى دامىتۋعا باعىتتاۋ تۋرالى تاپسىرماسى بار. ءبىز بۇگىن الداعى ءۇش جىلدىڭ بيۋدجەتىن بەكىتتىك. كەلەر جىلى بيۋدجەتتىڭ 71% الەۋمەتتىك سالانى دامىتۋعا باعىتتالادى، ودان كەيىنگى ەكى جىلدا بۇل كورسەتكىش تاعى دا كوبەيەدى.

سەسسيادا «7-20-25» تۇرعىن ءۇي باعدارلاماسىن ىسكە اسىرۋ، ءبىلىم بەرۋ، دەنساۋلىق ساقتاۋ سالالارىندا مەملەكەت-جەكەمەنشىك ارىپتەستىك نەگىزىندە قولعا الىنعان جوبالار  ماسەلەلەرى دە قارالدى.

 

سوڭعى جاڭالىقتار

ءوز قارجىسىنا كىتاپحانا سالعان

ايماقتار • بۇگىن، 10:08

ساباننان جاسالعان قالاشىق

ايماقتار • بۇگىن، 10:05

وتانعا قىزمەت – ورتاق پارىز

قوعام • بۇگىن، 09:48

اۋىلعا كەل، جاس دارىگەر

ايماقتار • بۇگىن، 09:37

تاريح. تۇلعا. تۇركىستان

رۋحانيات • بۇگىن، 09:06

ادامدىقتىڭ قاينارى

رۋحانيات • بۇگىن، 08:55

بەرىك ءۋالي: اباي مەن الاش

رۋحانيات • بۇگىن، 08:54

التى كولىك قار قۇرساۋىنان شىعارىلدى

ايماقتار • 18 قاڭتار، 2020

ۇقساس جاڭالىقتار