ايتۋلى جارىستا جوعارى وقۋ ورىندارىنىڭ ستۋدەنتتەرىنەن بولەك, رەسپۋبليكامىزدىڭ ءار وڭىرىنەن جينالعان بىلعارى قولعاپ شەبەرلەرى باق سىناۋدا. ءار جىلدارى باقتيار ارتاەۆ, باقىت سارسەكباەۆ, ميرات سارسەنباەۆ, جانىبەك ءالىمحان ۇلى, ءابىلحان امانقۇل, بەكبولات قۇرامىسوۆ جانە تاعى باسقا ساڭلاقتار وسى تۋرنيردە ونەر كورسەتىپ, ءوز شەبەرلىكتەرىن شىندادى. ۋاقىت وزا ولاردىڭ بارلىعى دا اسا ءىرى حالىقارالىق دودالاردا دارالانىپ, مەملەكەتىمىزدىڭ ماقتانىشىنا اينالدى.
قازاقتىڭ سپورت جانە تۋريزم اكادەمياسى, الماتى قالاسىنىڭ اكىمدىگى جانە جەكەلەگەن دەمەۋشىلەردىڭ قولداۋىمەن «رۋحاني جاڭعىرۋ» باعدارلاماسى اياسىندا جىل سايىن ءداستۇرى تۇردە ءوتىپ جۇرگەن قايرات رىسقۇلبەكوۆتى ەسكە تۇسىرۋگە ارنالعان رەسپۋبليكالىق ءتۋرنيردىڭ جەڭىمپازدارىنا كەلەسى جىلدان باستاپ قازاقستان رەسپۋبليكاسىنىڭ سپورت شەبەرى اتاعىن بەرۋ جونىندە ۇسىنىس ايتىلدى.
ءبىز بۇل ۇسىنىستى قازاقستان رەسپۋبليكاسى مادەنيەت جانە سپورت مينيسترىلىگىنىڭ سپورت كوميتەتىنە جولدادىق. جانە دە قۇزىرلى ورگان تاراپىنان ول قولداۋ تابادى دەگەن ويدامىز. سەبەبى, حالىق قاھارمانى قايرات رىسقۇلبەكوۆ ەل ازاتتىعى جولىندا قۇربان بولعان جان. جەلتوقسان وقيعاسى كەزىندە 22 جاستاعى ورىمدەي جاس ەشتەڭەدەن قايمىقپاستان كسرو-نىڭ سودىر ساياساتقا قاسقايىپ قارسى تۇردى. سول ءۇشىن دە مەرت بولدى. قازاقستان تاۋەلسىزدىك الاشتىڭ ماقتان تۇتار ازاماتىنىڭ قۇرمەتىنە جىل سايىن رەسپۋبليكامىزدىڭ كوپتەگەن ايماقتارىندا ءتۇرلى شارالار وتۋدە. ءوز كەزەگىندە قازاقتىڭ سپورت جانە تۋريزم اكادەمياسى تاراپىنان بوكسشىلار اراسىنداعى رەسپۋبليكالىق تۋرنير قاتارىنان 19 جىل بويى ۇزدىكسىز ۇيىمداستىرىلىپ كەلەدى. كەلەسى جىلى ايتۋلى جارىستىڭ جالاۋى 20 مارتە جەلبىرەيدى. وسى مەرەيتويلىق تۋرنيردە توپ جارعان جىگىتتەرگە سپورت شەبەرى اتاعى بەرىلسە, نۇر ۇستىنە نۇر بولار ەدى, دەيدى ايتۋلى اكادەميانىڭ بوكس جانە اۋىر اتلەتيكا كافەدراسىنىڭ مەڭگەرۋشىسى تايىرجان ىسقاقوۆ.
