جەرورتا تەڭىزىندەگى مالوركا ارالىندا ورنالاسقان ماناكور قالاسى – الەمنىڭ ءبىرىنشى راكەتكاسى رافاەل ءنادالدىڭ كىندىك قانى تامعان ولكە. سول جەردە ول تەننيستىڭ الىپپەسىن ۇيرەنىپ, ۇلكەن سپورتتاعى العاشقى قادامدارىن جاسادى. ۋاقىت وزا نادال ءوز ءداۋىرىنىڭ تەڭدەسسىز ويىنشىلارىنىڭ بىرىنە اينالدى.
ءوز كارەراسىندا پيرەنەي تۇبەگىنىڭ تۇلەگى «»رولان گارروس» ءتۋرنيرىن 12 مارتە ۇتىپ, «گرۋنت پاتشاسى» دەگەن اتاققا يە بولدى. بۇل – رەكوردتىق كورسەتكىش! ودان بولەك, اقش-تىڭ اشىق بىرىنشىلىگىندە ءتورت رەت توپ جارىپ, ەكى رەت «ۋيمبلدوندا» دارا شىقتى. 2009 جىلى اۆستراليانىڭ اشىق بىرىنشىلىگىندە قارسىلاس شاق كەلتىرمەدى. بارلىعى «ۇلكەن دۋىلعا» دودالارىندا رافاەل 19 مارتە جەڭىمپاز اتاندى. سونداي-اق, ول كوپتەگەن باسقا دا اسا ءىرى حالىقارالىق تۋرنيرلەردە سان مارتە باس جۇلدەنى ولجالاعانىن دا جانكۇيەرلەر جاقسى بىلەدى.
وسىنداي داڭقى جەر جارعان تەننيسشىنىڭ اكادەمياسىندا وتكەن ءدۇبىرلى دودادا الەمنىڭ 51 مەملەكەتىنەن كەلگەن 247 ويىنشى باق سىنادى. سولاردىڭ اراسىنان الماتىلىق تەننيسشى سارا حاميتوۆا اسقان شەبەرلىگىمەن كوزگە ءتۇسىپ, بارشا جانكۇيەرلەردىڭ ىستىق ىقىلاسىنا بولەندى. نەبىر شەبەرلەردى جولىنان ىعىستىرعان جەرلەسىمىز 2009 جىلى تۋعان قىزدار اراسىنداعى سايىستا كۇمىس مەدالدى ولجالادى. فينالدا سارا قازاقستاننىڭ تاعى ءبىر دارىندى تەننيسشىسى, نۇر-سۇلتان قالاسىنىڭ وكىلى توميريس نۇرجانعا ەسە جىبەردى.
سارا حاميتوۆانىڭ وسىنداي تولاعاي تابىسقا جەتۋىنە قازاقستان تەننيس فەدەراتسياسىنان بولەك, الماتى قالالىق سپورت باسقارماسى جانە الماتى قالاسى تەننيس فەدەراتسياسىنىڭ قوسقان ۇلەسى وتە زور. ولار سارا سەكىلدى وسى سپورت ءتۇرىن سەرىك ەتكەن كوپتەگەن دارىندى جاستاردىڭ ەش الاڭسىز جاتىعۋىنا بارىنشا جاعداي جاساپ, ۇنەمى قولداۋ كورسەتۋدە.
ەلباسىنىڭ سىندارلى ساياساتىنىڭ ارقاسىندا قابىلدانعان «رۋحاني جاڭعىرۋ» باعدارلاماسى باسقا دا سالالاردا سەكىلدى سپورتتا دا وسىلايشا ايقىن كورنىس تابۋدا.
