حوككەي • 10 جەلتوقسان، 2019

شايبالى حوككەي: «بارىس» «اۆانگاردتى» ۇتتى

19 رەتكورسەتىلدى

قۇرلىقتىق حوككەي ليگاسىنداعى (قحل) كەزەكتى تۋر ويىنىن ومبىدا وتكىزگەن نۇر-سۇلتاننىڭ «بارىسى» جەرگىلكتى «اۆانگارد» كلۋبىنان ايلاسىن اسىردى.

باستاپقىدا ايدىن يەلەرى الىمدى كورىندى. 7 جانە 11 مينۋتتاردا كيريلل سەمەنوۆ پەن سەمەن كوشەلەۆ گول سوعىپ، «اۆانگاردتى» العا شىعاردى. بىراق بۇل جاعداي ءبىزدىڭ جىگىتتەردىڭ ساعىن سىندىرا العان جوق. كەرسىنشە، نامىستارىن قامشىلادى. ناتيجەسىندە ۇزىلىستەن كەيىن رومان ستارچەنكو ەسەپ ايىرماشىلىعىن قىسقارتتى. ءۇشىنشى كەزەڭدە قوناقتار قارقىنىن ودان ءارى كۇشەيتە ءتۇستى. ال باسەكەنىڭ اياقتالۋىنا ەكى مينۋتتان اسا ۋاقىت قالعاندا كوربان نايت پەن نيكيتا ميحايليس الما-كەزەك نىسانانى ءدال كوزدەپ، «بارىسقا» جەڭىس اپەردى. ەسەپ – 2:3.

وسى كۇنگە دەيىن 35 ويىن وتكىزىپ ۇلگەرگەن «بارىستىڭ» قورجىنىندا قازىر 46 ۇپاي بار. شىعىس كونفەرەنتسياسىندا جەرلەستەرىمىز ءۇشىنشى ورىندا كەلە جاتسا، تۇراقتى بىرىنشىلىكتىڭ جارىس كەستەسىندە التىنشى ساتىعا جايعاستى. ەندى ءوزىنىڭ كەلەسى كەزدەسۋىن استانالىق حوككەيشىلەر 18 جەلتوقساندا تومەنگى نوۆگورودتا جەرگىلىكتى «تورپەدوعا» قارسى وتكىزەدى.

سوڭعى جاڭالىقتار

ۇقساس جاڭالىقتار