ساق داۋىرىنەن ءبىزدىڭ زامانىمىزعا دەيىن جەتكەن بىرەگەي ەسكەرتكىش – الماتىنىڭ سولتۇستىك باتىسىندا, 430 گەكتار اۋماقتا ورنالاسقان «بورالداي ساق قورعاندارى» ارحەولوگيالىق پاركى سونىڭ ايقىن كورىنىسى دەپ ايتۋعا بولادى.
بۇل تاريحي نىسان «رۋحاني جاڭعىرۋ» باعدارلاماسىنىڭ اياسىندا «قازاقستاننىڭ كيەلى جەرلەرىنىڭ گەوگرافياسىنا» ەنگەن. كيەلى نىساندى ساقتاۋ جانە كەڭىنەن ناسيحاتتاۋ ماقساتىندا, بىز «ساق مادەنيەتى ورتالىعىن» سالۋ بويىنشا جۇمىستاردى قولعا الدىق. ونىڭ ەسكيزدىك جوباسى جانە جوبالىق سمەتالىق قۇجاتتاماسى ازىرلەندى. ورتالىقتا اشىق اسپان استىنداعى مۋزەي, كوپكەشەندى زال (كونتسەرتتىك جانە كورمە تەحنيكاسىمەن جابدىقتالعان), كونفەرەنتسيا جانە مۋلتيمەديالىق زال, كادەسىي مەن مەدياتەكا دۇكەنى, ارحەولوگيا مۋزەيى, زاماناۋي قۇرىلعىلارمەن جابدىقتالعان رەستاۆراتسيالىق شەبەرحانا جانە قالامىزدىڭ تۋريستىك تارتىمدىلىعىن ارتتىراتىن تاعى باسقا دا ءتۇرلى نىساندار سالۋ كوزدەلگەن.
«قازىردىڭ وزىندە ارحەولوگيالىق پارك اۋماعىندا ەرتە ساق تايپاسى ۇيلەرىنىڭ ماكەتى مەن قولدانعان بۇيىمدارىنىڭ كوشىرمەلەرىن كورۋگە بولادى. جىل باسىنان بەرى تاريحي نىسانمەن تانىسۋ جانە تاماشالاۋ ەكسكۋرسياسىنا 46 مىڭنان استام مەكتەپ وقۋشىسى مەن 14 مىڭنان استام كوللەدج ستۋدەنتى قاتىستى.
قالامىزدا جىل سايىن « ۇلى دالا – كوشپەندىلەر الەمى» حالىقارالىق ەتنيكالىق فەستيۆالىن وتكىزۋ يگى داستۇرگە اينالعان. فەستيۆال ۇمىت بولا باستاعان ۇلتتىق داستۇرلەردى, تۇركى الەمىنىڭ سپورت ويىندارىن ناسيحاتتاۋعا جانە وسكەلەڭ ۇرپاقتىڭ ۇلتتىق ونەرگە, تاريح پەن مادەنيەتكە دەگەن قىزىعۋشىلىعىن ارتتىرۋعا باعىتتالعان», – دەيدى الماتى قالاسىنىڭ اكىمى باقىتجان ساعىنتاەۆ باق وكىلدەرىنە بەرگەن سۇباتىندا.
اتالمىش فەستيۆالگەەلىمىزدىڭ ونەرپازدارىمەن قوسا, ۆەنگريا, موڭعوليا, ۋكراينا, وزبەكستان, قىرعىزستان, باشقۇرتستان, تىۆا, داعىستان, ساحا, التاي, قالماقيادان جانە ت.ب. تۇركى ەلدەرىنەن كەلگەن وكىلدەر قاتىسادى. مۇندا تۇركى ەلدەرىنىڭ ءداستۇرلى ءان مەن كۇيىن, سالت-ءداستۇرىن, جاۋىنگەرلىك ونەرى مەن ۇلتتىق سپورتىن تاماشالاپ, اس مازىرىنەن ءدام تاتقان كورەرمەندەر (ولاردىڭ سانى 30-40 مىڭ ادامعا دەيىن جەتەدى) ەرەكشە اسەرمەن قايتادى.
سول سياقتى, الماتى قالاسىنىڭ تاريحي جانە مادەني ەسكەرتكىشتەرىنىڭ بىرەگەيى –رايىمبەك باتىر كەسەنەسى دە كيەلى نىساندار قاتارىندا. كەسەنە كەلبەتىنىڭ ساقتالۋىن قامتاماسىز ەتۋ ماقساتىندا اكىمدىك تاراپىنان رەستاۆراتسيالىق جۇمىستار جۇرگىزىلدى. الداعى ۋاقىتتا رايىمبەك باتىر كەسەنەسىنىڭ تۋريستىك تارتىمدىلىعىن ارتتىرۋ ءۇشىن كەسەنە اۋماعىنان «رايىمبەك باتىر مۋزەي-كەشەنىن» (2 تۇنەۋ جانە نامازحانا سالۋ) قۇرۋ جوسپارلانعان.
الماتى
