كورمەنىڭ جوعارى دەڭگەيدە وتۋىنە شۆەتسياداعى قازاقستان رەسپۋبليكاسىنىڭ ەلشىلىگى دە قولداۋ ءبىلدىرىپ وتىر.
ديزاينەر رەتىندە ابدەن كەمەلىنە كەلگەن اسانوۆا وسىدان بىرنەشە جىل بۇرىن ماسكەۋ مەرياسى, جوعارى مودا مەن پرەت-ا-پورتە قاۋىمداستىعى قولداۋىمەن وتكەن «Volvo Fashion Week» ءسان اپتالىعىندا الەمنىڭ ەڭ تانىمال دەگەن ديزاينەرلەرىمەن يىق تىرەستىرىپ, جۇلدەلى ورىنداردان كورىنگەن بولاتىن.
قازاق ديزاينەرىنىڭ قولتاڭباسىن بىلەتىندەر بالنۇردىڭ ءارتۇرلى ستيلگە ۇرىنبايتىنىن بىلەدى. مودا الەمىن تاڭقالدىرامىن دەپ ەرسى ەكسپەريمەنتەرگە بارىپ جاتقانىن دا كورمەيسىڭ. ۇلتتىق بوياۋىنان ەشبىر اجىراماعان بالنۇردىڭ جۇمىستارىنا قازىر شەتەلدە دە سۇرانىس بار. ماسەلەن, كوپشىلىگىمىز اسانوۆانىڭ ايگىلى امەريكاندىق Must Industries كومپانياسىنىڭ ديستانتسيالىق ديزاينەرى ەكەنىن جانە Victoria secrets, White and Black جانە Chico’s ساۋدا ماركالارىنا جۇمىس ىستەگەنىن بىلە بەرمەيمىز.
قازاقستاندىق fashion-يندۋستريانىڭ باستاۋىندا تۇرعان بالنۇر ەلىمىزدىڭ مەملەكەتتىك بايراعىنىڭ ەتالونى مەن قر تۇڭعىش پرەزيدەنتى شتاندارتىن دايىنداعانىن ۇدايى ماقتان تۇتادى.
سونداي-اق, بالنۇر اسانوۆا «الماتى» ۋنيۆەرسيتەتىنىڭ حالىقارالىق ىنتىماقتاستىق جانە شىعارماشىلىق جونىندەگى پرورەكتورى, قر ەڭبەك سىڭىرگەن ونەر قايراتكەرى جانە حالىقارالىق ەۋرازيالىق جۇلدەنىڭ «ديزاين» نوميناتسياسى بويىنشا التىن لاۋرەاتى.
مايلى بوياۋمەن جۇمىس ىستەيتىن جانە ديزاينەرلىكتى قوسا الىپ جۇرگەن سۋرەتشى بالنۇر اسانوۆا ماسكەۋ, دۋباي, ۆاشينگتوندا جىل سايىن وتەتىن ءسان اپتالىقتارىنىڭ تۇراقتى قاتىسۋشىسى ءارى مارتەبەلى قوناعى.
ماسكەۋدە تۇراقتى وتەتەتىن «جوعارى مودا» حالىقارالىق بايقاۋىندا «ۇلتتىق كوستيۋم» جۇلدەسىن تالاي رەت جەڭىپ العان جەرلەسىمىز بۇل كۇندەرى قايتالانباس قازاقى ناقىشتارعا تولى ۇلتتىق كيىم ۇلگىلەرىمەن ستوكگولم سانقويلارى مەن تۇرعىندارىنىڭ شىنايى قوشەمەتىنە بولەنىپ وتىر.
ال كورمەدە سۋرەتشىنىڭ ءسان ۇلگىلەرىمەن قوسا, كارتينالارى, گوبەلەندەرى مەن كەستەلەنگەن عالامات ۇلتتىق كيىمدەرى دە قويىلدى.
بيىل 75 جىلدىعىن اتاپ وتەتىن «سىمبات» ءسان اكادەمياسى وسى ۋاقىتقا دەيىن وسى زاماننىڭ سانىمەن ۇيلەستىرىلگەن, كوزدىڭ جاۋىن الاتىن قازاقشا ورنەكتەر كەستەلەنگەن 100 مىڭداعان كيىم ۇلگىلەرىن تىككەن.
الماتى
