ەستەرىڭىزگە سالساق, «Samruk-Kazyna Construction» اق جانە «Baur Development Group» جشس اراسىندا 2016 جىلدىڭ قىركۇيەك ايىندا الماتىداعى «ۆوستوچكا» تۇرعىن ءۇي كەشەنىن سالۋعا بايلانىستى ينۆەستيتسيالىق كەلىسىمشارت جاسالعان ەدى. نىسان بيىلعى ناۋرىز ايىندا پايدالانۋعا بەرىلەدى دەپ جوسپارلانعان بولاتىن. الايدا قۇرىلىس ۇيىمى ءتيىستى مىندەتىن ۋاقتىلى ورىنداماي, بۇل سالىمشىلاردىڭ الاڭداۋىنا اكەلىپ سوقتى. وسىعان وراي اكتسيونەرلىك قوعام جوعارىداعى كومپانيامەن كەلىسىمشارتتى بۇزۋعا شەشىم قابىلدادى. سايكەسىنشە, بيىل شىلدە ايىندا «Samruk-Kazyna Construction» Berkut Development جشس-مەن اياقسىز قالعان قۇرىلىستى سوڭىنا دەيىن جەتكىزۋگە بايلانىستى كەلىسىمشارتقا قول جەتكىزدى. سالىناتىن 16 ۇيدە 1008 پاتەر بار. الدىن الا ساتۋ شارتتارى اياسىندا سونىڭ 477 پاتەرى ساتىلىپ قويعان. ۇلەسكەرلەردىڭ اقشالاي قاراجاتى ەسكروۋ شوتتاردا ساقتالادى.
– ءبىز الماتى قالاسىنىڭ اكىمدىگىمەن جانە قۇرىلىس سالۋشى كومپانيامەن مەموراندۋمعا قول قويدىق. جەلتوقسان ايىنىڭ ورتاسىنا دەيىن قارجىلاندىرۋدى اشۋدى جوسپارلاپ وتىرمىز. جاڭا شارتتارعا سايكەس كەستە قۇردىق, 9 اي ىشىندە قۇرىلىستى تولىعىمەن اياقتايمىز. نىساندار كەزەڭ-كەزەڭمەن تاپسىرىلاتىن بولادى. اتاپ ايتقاندا, 5 اي ىشىندە 4 ءۇيدى, تاعى 7 باسپانانى 7 ايدىڭ ىشىندە, قالعان 3 ءۇيدى 9 ايدىڭ كولەمىندە تۇرعىزامىز. ياعني, ۇيلەردىڭ باسىم بولىگى مامىر ايىندا, سونداي-اق ماۋسىم-شىلدە ايلارىندا پايدالانۋعا بەرىلەدى. بارلىق ساتىپ الۋشىلار ءۇيدى باستاپقىدا جاسالعان شارتتارمەن الاتىن بولادى. بۇل ماسەلە شەشىلدى دەپ سانايمىز. جەلتوقسان ايىنىڭ ورتاسىنان باستاپ قۇرىلىس جۇمىستارىن باستايمىز, – دەدى «Samruk-Kazyna Construction» اق باسقارما توراعاسىنىڭ ءبىرىنشى ورىنباسارى ارمان جەتپىسباي.
ءوز كەزەگىندە جاڭا مەردىگەر قۇرىلىسقا كىرىسىپ, كوركەيتۋ جۇمىستارىن قولعا العاندارىن جەتكىزدى.
– ءبىز 16 ءۇيدى, سول سەكىلدى سىرتقى جانە ىشكى الاڭداعى بارلىق كەشەندى, جەلىلەردى تارتۋ مەن اباتتاندىرۋ ءىسىن اياقتايمىز. بىرقاتار تۇرعىن ءۇيدى ارلەۋ مەن ىشكى جۇمىستارىن, سونداي-اق بولمە قۇرىلىسى جۇمىستارىن ءوز قاراجاتىمىزعا سالۋدى باستاپ كەتتىك, – دەدى Berkut Development ديرەكتورى ماديار بۋحتارباەۆ.
قالالىق اكىمدىك «ۆوستوچكا» تۇرعىن ءۇي كەشەنىنە سىرتقى سۋ قۇبىرى جەلىسىن تارتۋعا, كارىز جانە ەلەكتر جۇيەلەرىمەن جابدىقتاۋعا, سونداي-اق قازاندىق سالۋعا ۋادە بەردى. ءتيىستى جۇمىستاردى جەلتوقسان ايىنىڭ سوڭىنا دەيىن اياقتايمىز دەپ سەندىردى.
