قوستاناي قالاسىنىڭ جەڭىس ساياباعىنداعى بەيىتتەن الىنعان ءبىر ۋىس توپىراق سالىنعان قالتا رەسەيدىڭ قازاقستانداعى ەلشىلىگى وكىلىنە سالتاناتتى تۇردە تابىستالدى. ول بيىل ماسكەۋ وبلىسىندا بوي كوتەرەتىن جەڭىس حرامىنىڭ ىرگەتاسىنا سالىنادى. مۇنداي ءبىر ۋىس توپىراق بۇرىنعى كەڭەس وداعىنىڭ قۇرامىندا بولعان بارلىق رەسپۋبليكالاردان جەتكىزىلەدى. مايدانگەرلەر جەرلەنگەن بەيىتتىڭ توپىراعىن الۋ رەسەيدەگى «ەستەلىك جولى» جوباسى اياسىندا جۇزەگە استى. قازىر رەسەيدەگى «پاتريوت» تاريحي-مەموريالدىق ساياباعىندا «ەستەلىك جولى» اتتى مەموريالدىق گالەرەيا قۇرىلىپ جاتقان كورىنەدى. ونىڭ اۋماعى سۇراپىل سوعىستىڭ سوزىلعان ۋاقىتىنا وراي, 1418 قادامنان تۇرادى. گالەرەيادا سوعىسقا قاتىسقان 30 ميلليوننان استام جاۋىنگەردىڭ فوتوسۋرەتى, ولار تۋرالى دەرەكتەر, جەكە زاتتارى جانە مايداننان جولدانعان حاتتارى ساقتالادى. رەسەيدىڭ قازاقستانداعى ەلشىلىگىنىڭ حاتشىسى دانيل لاپاچتىڭ ايتۋىنا قاراعاندا, كەلەر جىلى 9 مامىردا وسى اۋماقتاعى جەڭىس حرامى سالتاناتتى تۇردە اشىلادى.
– قاراشانىڭ قارا سۋىعىندا جەڭىس پاركىندەگى ماڭگىلىك الاۋ باسىندا بۇل شارانىڭ ءوتۋى مەنىڭ كارى جۇرەگىمدى شىمىرلاتتى. مەن مايدان دالاسىندا بوزداقتاردىڭ بەتىن ءوزىم جاپقان اداممىن عوي. ماعان بەيبىت كۇن بۇيىرىپ, ءومىردىڭ وسىنشا قىزىعىن كوردىم, ال مەنىڭ مايدانداس دوستارىم ۋىزداي جاس كۇيىنشە ءبىر-ءبىر تومپەشىككە اينالدى. رەسەيلىكتەردىڭ باستاماسىنا شەكسىز العىسىمدى ايتتىم. كەيىنگى ۇرپاق اتالار ەرلىگىن ۇمىتۋعا بولمايدى, – دەيدى بۇگىندە 96 جاسقا كەلىپ وتىرعان مايدانگەر قاسىمحان الدابەرگەنوۆ اقساقال.
ەلشىلىك وكىلى قوستانايلىق جاۋىنگەر ناشەن ءيماناليننىڭ اتىنا تاعايىندالعان «ەرلىگى ءۇشىن» مەدالىنىڭ كۋالىگىن باتىردىڭ ۇلى ساپار يمانالينگە تاپسىردى . ناشەن يمانالين 1945 جىلى 30 ساۋىردە ۇلى جەڭىسكە ساناۋلى كۇندەر قالعاندا عانا قازا بولعان ەدى. قانشا ۋاقىت وتسە دە سوعىس قاسىرەتى جاڭعىرا بەرەدى, اتالار ەرلىگى ۇمىتىلمايدى.
قوستاناي
