«تۇنىق جىردىڭ تۇمارى» دەپ ات قويىپ, ايدار تاققان جىر كەشىنىڭ وتۋىنە «اق قاۋىرسىن» جاستار شىعارماشىلىق كلۋبى ۇيىتقى بولدى. تۇڭعىش رەت ۇيىمداستىرىلعان سايىسقا الماتى قالاسىنداعى جوعارى وقۋ ورىندارىنىڭ ستۋدەنتتەرى باق سىناستى. قاتىسۋشىلار ونلاين داۋىس بەرۋ ارقىلى ىرىكتەلگەن. ارنايى تۇسىرگەن بەينەبايان اۆتورلارىنا بايقاۋدىڭ اقتىق كەزەڭىنە جولداما بەرىلگەن.
سايىس ءۇش باعىت بويىنشا ءوتتى. «جىرىڭ قالدى جانىمنىڭ ۇشقىنىنداي» اتتى باعىتتا قاتىسۋشىلار فاريزا وڭعارسىنوۆانىڭ ولەڭدەرىن ناقىشىنا كەلتىرىپ ورىندادى. ال «اۋەلەگەن اسەم ءان» باعىتىندا اقىننىڭ سوزدەرىنە جازىلعان مۋزىكالىق تۋىندىلار ورىندالسا, «جىر جازامىن جۇرەكپەن» اتتى كەزەڭدە قاتىسۋشىلار جۇرەكجاردى ارناۋ جىرلارىن ۇسىندى.
قاتىسۋشىلاردىڭ ونەرىن جازۋشى, جۋرناليست بەيبىت سارىباي, اكتريسا نۇرگۇل مىڭعاتوۆا سىندى رۋحانيات سالاسىنىڭ وكىلدەرىنەن قۇرالعان قازىلار القاسى باعالادى.
– وتكەنگە كوز سالساق, قازاق ادەبيەتىنىڭ تاريحىندا ءومىرىن ولەڭگە ارناعان اقىن ايەلدەر از ەمەس. ولاردىڭ قاتارىندا ماريا حاكىمجانوۆا, زياش قالاۋوۆا, مارفۋعا ايتقوجينا, اقۇشتاپ باقتىگەرەەۆا, قانيپا بۇعىباەۆا, كۇلاش احمەتوۆا ەسىمدەرىن ەرەكشە اتاساق بولادى. وتكەن عسىردىڭ 60-70-جىلدارى – كوزىقاراقتى كوپشىلىك «پوەزيا پاديشاسى» دەپ اسپەتتەگەن فاريزا وڭعارسىنوۆانى وسى ءتىزىمنىڭ كوش باسىندا, الدىڭعى ساپىندا تۇرعان ۇلت ادەبيەتىندە وزىندىك ورنەگى بار نازىكجاندىلاردىڭ ءبىرى ءھام بىرەگەيى دەپ اتاساق بولادى. تالاي ۇرپاق فاريزانىڭ شىعارماشىلىعىنا شىن سۇيسىنسە, كۇلاش پەن قانيپانىڭ, اقۇشتاپتىڭ ليريكاسىن جاتقا وقىدى. ولار پوەزيا ارقىلى قازاق قىزىنىڭ جاڭا وبرازىن سومدادى, جاڭا كەيپىنەن سىر شەرتتى. ولار سىرلى دا نۇرلى جىرلارىمەن قازاق قىزىن ءتالىمدى تاربيەلەدى. ولار انا بولا تۇرا, اقىن بولا تۇرا قيىندىققا مويىماي, ولەڭنەن تەرىس اينالماي, ادالدىعىنان, ازاماتتىعىنان اينىماي, ونى دالەلدەي ءبىلدى, – دەپ اتاپ ءوتتى جيىندا ءسوز العاندار.
بايقاۋدىڭ «جىرىڭ قالدى جانىمنىڭ ۇشقىنىنداي» اتتى باعىتىندا باس جۇلدەنى ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتى جانار جەكسەنوۆا يەلەندى. ءبىرىنشى ورىنعا قىزدار ۋنيۆەرسيتەتىنىڭ ستۋدەنتى نۇراي ايتباەۆا, ەكىنشى جانە ءۇشىنشى ورىندارعا ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى قۇماربەك نۇركەن مەن ساعىنىش بالتاباي يە بولدى.
«اۋەلەگەن اسەم ءان» باعىتىندا قازاق ۇلتتىق قىزدار پەداگوگيكالىق ۋنيۆەرسيتەتىنىڭ ستۋدەنتى الۋا تۇماربايدىڭ جۇلدىزى جاندى. ەكىنشى ورىندى ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتتەرى ءجانالى بەكزاتحان مەن ماعجان داتقا ءوزارا بولىسسە, ءۇشىنشى ورىندى قىزدار ۋنيۆەرسيتەتىنىڭ بىلىمگەرى اقەركە جاھانقىزى ولجالادى.
«جىر جازامىن جۇرەكپەن» اتتى باعىت بويىنشا ابىلاي حان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتىنىڭ ستۋدەنتى ديانا ءىزباسار جۇزدەن جۇيرىك شىقتى. بۇل باعىتتا قىزدار ۋنيۆەرسيتەتىنىڭ ستۋدەنتى اقتولقىن جولاۋشىباي ءبىرىنشى ورىندى, ءال-فارابي اتىنداعى قازاق ۇلتتىق ۋنيۆەرسيتەتىنىڭ ستۋدەنتى قانات ەربولات ەكىنشى ورىندى جانە وسى وقۋ ورنىنىڭ بىلىمگەرى باۋىرجان اسقار ۇلى ءۇشىنشى ورىندى ەنشىلەدى.
الماتى
