الما باعى جايناعان «اتەك اگرو»

ايماقتار • 03 جەلتوقسان، 2019

الما باعى جايناعان «اتەك اگرو»

80 رەت كورسەتىلدى

«جەر جانناتى – جەتىسۋ» دەگەن اتاۋ ءوڭىردىڭ تابيعي ەرەكشەلىگىنە قاراتا ايتىلعانى انىق. شىندىعىندا الاتاۋ بوكتەرىندە وسەتىن جەمىس-جيدەكتىڭ ءنارى مەن دامىنە تەڭ كەلەتىن نارسە الەمدە نەكەن-ساياق شىعار. قازىر ايماقتا ماۋەلى باق پەن سايالى باقشا ءوسىرۋ ءداستۇرى جالعاسىپ، تابىستى ەڭبەكتىڭ كوزىنە دە اينالىپ وتىر.

قالماحانبەت مۇقامەتقالي

بۇگىندە الماتى وبلىسىنداعى جەمىس باقتارىنىڭ كولەمى 23 مىڭ گەكتار ەكەن. بىلتىرعى جىلى وسى باۋ-باقشادان جينالعان ءونىمىنىڭ كولەمى 126 مىڭ تونناعا جەتىپتى. اسىرەسە، ۋىلجىپ پىسكەن المانىڭ ۇلەسى 85 مىڭ توننا شاماسىندا بولىپتى. دەرەك بويىنشا، ەلىمىزدىڭ ىشكى نارىعىنداعى الماعا دەگەن سۇرانىستىڭ 95 پروتسەنتىن جەتىسۋلىق جەمىس ءتۇرى قامتىپ وتىرعان كورىنەدى.

الما باعىن باپتاپ ءوسىرىپ، ساپالى ءونىم الىپ وتىرعان كاسىپ يەسىنىڭ ءبىرى – جامبىل اۋدانىنىڭ تۇرعىنى جانات التىنعادىس ۇلى. ول باسقاراتىن «اتەك اگرو» سەرىكتەستىگى بيىل 54 گەكتار جەرگە تامشىلاتىپ سۋاراتىن الما باعىنان مول ءونىم الدى. المانىڭ «پينك لەدي»، «فۋدجي»، «گرەنني سميت»، «گالا»، «گولدەن دەليشەس» سياقتى تانىمال سورتتارى شىققان شىعىندى وتەيتىندەي جەمىس بەردى.

-الما باعىنا تامشىلاتىپ سۋارۋ ءادىسىن قولدانۋدى تاجىريبەگە ەنگىزگەنىمىزگە ۇشىگشى جىل بولدى. بۇدان ونىمدىلىك ارتادى، شىعىن از. كۇتىپ-باپتاۋى دۇرىس بولسا، ءار گەكتارداعى كوشەتتەن 30-45 تونناعا دەيىن الما جيناپ الۋعا بولادى. تامشىلاتىپ سۋارۋ قۇرال-جابدىقتارى يزرايلدەن، جاس كوشەتتەر تۇركيادان اكەلىنگەن، دەيدى «اتەك اگرو» سەرىكتەستىگىنىڭ ديرەكتورى جانات التىنعادىس ۇلى.

جالپى قۇنى 850 ملن تەڭگە بولاتىن بۇل جوبانىڭ ءبىر بولىگىن «اگرارلىق نەسيە» كورپوراتسياسى قارجىلاندىرسا، قاراجاتتىڭ قالعان جارتىسى جەكە كاسىپكەردىڭ ۇلەسىندە. ال الما باعى 75 ادامدى جۇمىسپەن قامتىپ وتىر.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز