تۇڭعىش پرەزيدەنت كۇنى قارساڭىندا پوليتسيا ارداگەرلەرىنە توسىن سىي جاسالىپ, ۇلكەن قۇرمەت كورسەتىلدى. «پوليتسيا دەپارتامەنتىنىڭ باستىعى مارات تولەباەۆ ارداگەرلەر كەڭەسىنىڭ ۇسىنىسىنا قولداۋ كورسەتىپ, سانالى عۇمىرلارىن ىشكى ىستەر سالاسىنا ارناعان 13 زەينەتكەردىڭ جاقسىلاپ تىنىعىپ, ەم-دوم الۋىنا مۇمكىندىك جاسالىپ وتىر. قالىپتاسقان ءداستۇر الداعى ۋاقىتتا دا ءوز جالعاسىن تابادى», دەدى كادرلار جونىندەگى مامان قاپەز داۋلەتباەۆ ارداگەرلەردى الىس جولعا شىعارىپ سالۋ راسىمىندە.
توپ قۇرامىندا وبلىستىق, اۋداندىق ىشكى ىستەر ورگاندارىنىڭ بايىرعى قىزمەتكەرلەرى بار. الماتىداعى «قازاقستان» ساناتوريىنە جوعارى كوڭىل-كۇيمەن اتتانعانداردىڭ ءبىرى ساۋلە نۇرمۇقانوۆا كوشى-قون باسقارماسىندا قىزمەت اتقارسا, ەركەبۇلان جامۇقوۆ پەن مۇحتار قازبەكوۆ وزدەرىنە سەنىپ تاپسىرىلعان ىسكە جاۋاپكەرشىلىكپەن قاراپ, ءمىنسىز اتقارعان. قاي-قايسىسى بولسىن ۇلكەن مەرەكە قارساڭىندا ۇيىمداستىرىلعان ساپارعا دەگەن ءدان ريزاشىلىقتارىن جاسىرمايدى. زەينەت جاسىنا شىقساق تا, ۇمىتپاعاندارى قۋانتادى, دەيدى ولار.
ارداگەرلەر كەڭەسى توراعاسىنىڭ ورىنباسارى ميحايل بىدلىحتىڭ ايتۋىنشا, مۇنداي شارالار ءار مەرەكەمەن ورايلاستىرىلىپ, 150-دەن استام جولداما بەرىلىپتى. جول كورسەتۋگە, تۋىنداعان تۇيتكىلدى ماسەلەلەردى شەشۋگە كومەكتەسۋ ءۇشىن دەپارتامەنتتىڭ كادرلىق ساياسات باسقارماسىنىڭ وفيتسەرى ۇنەمى بىرگە جۇرەدى. بۇل جولى اقباس الاتاۋ باۋرايىنا بەت العانداردىڭ ەڭ ۇلكەنى سەكسەننىڭ سەڭگىرىنەن اسقان.
سولتۇستىك قازاقستان وبلىسى
