«استانا» كلۋبى 2013 جىلدان بەرى ەۋروكۋبوك ويىندارىنا ۇزدىكسىز قاتىسىپ كەلە جاتقانىن كوزى قاراقتى جانكۇيەرلەر جاقسى بىلەدى. ءتىپتى 2015/16 جىلعى دوپ دوداسىن ءا دەگەننەن-اق چەمپيوندار ليگاسىنىڭ توپتىق كەزەڭىنەن باستادى. سول ۋاقىتتان بەرى «استانا» ەلىمىزگە كەم دەگەندە الەمنىڭ ءبىر توپ كومانداسىن اكەلەتىن بولدى. ولاردىڭ اراسىندا يسپانيانىڭ «اتلەتيكو مادريد», «ۆيلياررەال», تۇركيانىڭ «گالاتاساراي», شوتلانديانىڭ «سەلتيك», فرانتسيانىڭ «رەنن», ۋكراينانىڭ «دينامو» (كيەۆ), پورتۋگاليانىڭ «سپورتينگ» جانە «بەنفيكا» كوماندالارى بار. ال بيىل نيدەرلاندتىڭ «از الكمار» جانە انگليانىڭ «مانچەستەر يۋنايتەد» ويىنشىلارىنىڭ تابانى قازاق جەرىنە ءتيدى. اتالعان توپ كوماندالار ەلىمىزگە «استانانى» مەنسىنبەي كەلىپ, تالايى «استانا ارەنادا» جەڭىسكە جەتە الماي, ەلدەرىنە ابىرويسىز ورالعان-دى. اتاپ ايتار بولساق, چەمپيوندار ليگاسىنىڭ فينالىنا ءۇش رەت شىعىپ, ەۋروپا ليگاسىندا ءۇش رەت توپ جارعان «اتلەتيكو مادريد» (0:0) تەڭ ويناسا, «سەلتيك» 4:3 ەسەبىمەن جەڭىلىپ, سالى سۋعا كەتكەن-ءدى. ەندى بۇل قاتارعا اعىلشىننىڭ «مانچەستەر يۋنايتەد» كلۋبى دا قوسىلدى.
ەۋروپا ليگاسىنىڭ جەرەبەسىنەن كەيىن «مانچەستەر يۋنايتەد» كلۋبى «استانامەن» ءبىر توپقا تۇسكەندە بوركىن اسپانعا اتىپ, قۋانباعان قازاقستاندىق فۋتبول جانكۇيەرى جوق ەدى. قايتسىن ەندى, الەمنىڭ ۇزدىك كومانداسى قازاقستانعا كۇندە كەلە بەرمەيدى عوي. بىراق اعىلشىن كومانداسى ەلىمىزگە ءۇشىنشى قۇرامىن اكەلگەنىن جاريالاعاندا الا دوپقا اربالعان وتاندىق جانە شەتەلدىك جانكۇيەرلەردىڭ كوڭىلى سۋ سەپكەندەي باسىلدى. ويتكەنى ەلىمىزدىڭ تۇكپىر-تۇكپىرىنەن, باسقا دا الىس-جاقىن شەتەلدەن كەلگەن «ميۋ» جانكۇيەرلەرى اتى اڭىزعا اينالعان فۋتبولشىلاردى كورەمىز دەپ ۇمىتتەنگەن بولاتىن. دەسە دە, «استانا ارەناعا» جينالعان جانكۇيەرلەر الداعى 3-4 جىلدا جۇلدىز بولاتىن جاستاردىڭ ويىنىن تاماشالاۋعا مۇمكىندىك الدى.
29 مىڭ جانكۇيەر جينالعان ماتچتا ەلوردا كومانداسى «مانچەستەر يۋنايتەدكە» قارسى جىگەرلى ويىن كورسەتىپ, 0:1 ەسەبىمەن جەڭىلىپ جاتسا دا, ماتچ سوڭىڭدا جەڭىستى ج ۇلىپ الدى. كەزدەسۋگە دەيىن بىرقاتار فۋتبول ماماندارى «مانچەستەردىڭ» جاستارى «استانا» فۋتبولشىلارىنا قارسىلىق كورسەتە المايدى دەپ بولجاعان-دى. بىراق ماتچتىڭ ءبىرىنشى تايمىندا اعىلشىن كومانداسى ءتاۋىر ويىن كورسەتىپ, قازاقستاندىق فۋتبولشىلاردى ءبىراز ساستىرعانىن ايتا كەتۋ كەرەك. ءتىپتى قوناقتار ويىننىڭ 11-مينۋتىندا ەسەپ اشتى. ليۋك شوۋدان تاماشا پاس العان دجەسسي لينگارد ەريچ قورعاعان قاقپانىڭ الىس بۇرىشىن نىساناعا الىپ, ءدال سوققى جاسادى. گول سوققاننان كەيىن اعىلشىندىق جاس فۋتبولشىلاردىڭ سەنىمدىلىگى ارتىپ, ءبىزدىڭ قاقپاعا ەكىنشى گول سوعۋدىڭ قامىنا كىرىستى. تايم سوڭىنا دەيىن قوناقتار بىرقاتار قاۋىپتى شابۋىل ۇيىمداستىرعانىمەن, قورعاۋشىلارىمىز ءساتتى ونەر كورسەتىپ, قاۋىپتىڭ بەتىن ەريچكە جەتكىزبەي قايتارىپ وتىردى.
ەكىنشى تايمدا «استانا» فۋتبولشىلارى مۇلدە باسقا ويىن كورسەتتى. ءۇزىلىس كەزىندە باس باپكەر ويىنشىلارعا نە دەگەنى بىزگە بەيمالىم, بىراق جاس فۋتبولشىلاردان جەڭىلىپ جاتقاندارىن ەسىنە سالىپ, جىگەرلەرىن جانىعانى انىق. ۇزىلىستەن كەيىن «استانانىڭ» ويىنى 180 گرادۋسقا وزگەرىپ شىعا كەلدى. تورەشى ەكىنشى تايم باستالعانى تۋرالى بەلگى بەرگەننەن باستاپ ءبىزدىڭ فۋتبولشىلار قارسىلاستاردى ابدەن تىقسىرىپ, بۇكىل كوماندا بولىپ شابۋىلعا كىرىستى. ناتيجە كوپ كۇتتىرگەن جوق. كەزدەسۋدىڭ 55-مينۋتىندا شابۋىلشىلار گول سوعا الماعان سوڭ, ىسكە قورعاۋشى دميتري شومكونىڭ ءوزى كىرىستى. قاقپانىڭ الىس بۇرىشىن نىساناعا العان شومكو مەرگەندىگىمەن كوزگە ءتۇسىپ, ەسەپتى تەڭەستىرىپ كەتتى. ارادا 7 مينۋت وتكەندە انتونيو رۋكاۆينانىڭ ايىپ الاڭىنا اسىرعان دوبى «مانچەستەر يۋنايتەد» قورعاۋشىسى دي’شون بەرناردتىڭ دەنەسىنە ءتيىپ, دوپ باعىتىن وزگەرتتى. ناتيجەسىندە دي’شون قاقپاسىنا اۆتوگول سوعىپ الدى. وسىلايشا «استانا» فۋتبولشىلارى اتاقتى قارسىلاستارىنان 2:1 ەسەبىمەن جەڭىستى ج ۇلىپ الدى. تاريحي جەڭىس!
17-18 جاستاعى بالالاردى جەڭىپ, ونى تاريحي جەڭىس دەپ شاتتانۋدىڭ قاجەتى جوق دەۋىڭىز مۇمكىن. بىراق تاريحتا كوماندانىڭ قاي قۇرامدا ويناعانى ەمەس, قانداي ەسەپپەن جەڭگەنى قالادى. سوندىقتان بۇل جەڭىستى قازاق فۋتبولىنداعى تاريحي جەڭىستەردىڭ ءبىرى دەپ ايتا بەرۋگە بولادى.
«استانانىڭ» بۇل جەڭىسىن شەتەلدىك اقپارات قۇرالدارى سەنساتسياعا بالاپ, جارىسا جازۋدا. مىسالى, Eurosport.ru باسىلىمى: «قازاقستانداعى شوك: «استانا» ءبىرىنشى گول وتكىزىپ السا دا, اتاقتى «مانچەستەر يۋنايتەد» كلۋبىن جەڭىپ كەتتى», دەپ جازعان. سونداي-اق «استانا» – «مانچەستەر يۋنايتەد» ماتچىندا جۇمىس ىستەگەن بريتانيانىڭ BBC, The Guardian جانە جانە رەسەيدىڭ «ماتچ تۆ» تەلەارناسى, «سپورت-ەكسپرەس» سياقتى باسىلىمدارى دا «استانا» تۋرالى جازۋدا. تاعى ءبىر ايتا كەتەرلىگى, رەسەيدىڭ «Sports.ru» باسىلىمى قازاقستاندىق فۋتبول جانكۇيەرلەرىن قازاقشا قۇتتىقتاپ, اعىنان جارىلدى.
بۇل جەڭىسىنەن كەيىن «استانا» كومانداسى ۋەفا كلۋبتار رەيتينگىندە ءبىر ساتى جوعارىلادى. بۇعان دەيىن 25-ورىندا تۇرعان ەلوردالىقتار 19.375 (3.375) ۇپايمەن 24-ساتىعا جايعاستى. سونداي-اق «استانا» قورجىنىنا ءۇش ۇپاي عانا ەمەس, 570 مىڭ ەۋرو سالدى. قازىرگى ۋاقىتتا «استانانىڭ» ەۋروماۋسىمداعى تابىسى 4,31 ميلليون ەۋروعا جەتتى. ەگەر «استانا» سوڭعى ويىندا «پارتيزاندى» جەڭىپ جاتسا, قورجىنىنا تاعى دا 570 مىڭ ەۋرو, ال تەڭ ءتۇسىپ جاتسا 190 مىڭ ەۋرو قارجى قوسادى. سونداي-اق ماركەتينگتىك جانە تەلەقۇقىققا بايلانىستى تاپقان تابىسى ماۋسىم سوڭىندا بەلگىلى بولماق.
«استانا» كومانداسى ماۋسىمداعى سوڭعى ويىنىن 12 جەلتوقساندا سەربيادا «پارتيزانعا» قارسى وتكىزەدى. جەرلەستەرىمىز بۇل ويىندا ەلوردادا كەتكەن ەسەنى قايتارۋعا تىرىسادى. سەبەبى «استانا ارەنادا» وتكەن العاشقى ويىندا «پارتيزان» 1:2 ەسەبىمەن جەڭىسكە جەتكەن بولاتىن.
