اتاجۇرتتاعى ارىپتەستەرىمەن كەزدەسۋگە تۇركياداعى «قازاق ەلى» جۋرنالىنىڭ شىعارۋشى رەداكتورى ەرتولقىن گايرەتۋللاح, باسپاگەر سەرحان دينچتۇرك, يرانداعى Pars Today اگەنتتىگى قازاق رەداكتسياسىنىڭ ءجۋرناليسى گاۋحار جۇماعازىقىزى, وزبەكستاندا تارالاتىن «نۇرلى جول» گازەتىنىڭ باس رەداكتورى عۇلامزاكىر يۋسۋپوۆ, وزبەكستاندىق جۋرناليست قاتيرا نۇرباەۆا, موڭعوليانىڭ بايان-ولگەي ايماقتىق راديوسىنىڭ ءتىلشىسى قۋات ۋاتحان, رەسەيدەن شىعاتىن ء«شۇيدىڭ نۇرى» گازەتىنىڭ رەداكتورى ارقالىق سولتانوۆ كەلدى. ولار بيىل ءجۇز جىلدىعىن اتاپ ءوتىپ جاتقان «Egemen Qazaqstan» گازەتىنىڭ ۇجىمىن مەرەيتويىمەن قۇتتىقتادى. سونىمەن قاتار وزدەرى قىزمەت ەتەتىن باق پەن ەل گازەتىنىڭ ءوزارا ىنتىماقتاستىعى جونىندە پىكىر الماستى, ۇسىنىستارىن جەتكىزدى. وزبەكستاندا تۇرىپ جاتقان قانداسىمىز, جۋرناليست قاتيرا نۇرباەۆا وزبەكستانداعى قازاق جاستارىن اتاجۇرتقا تاعىلىمداماعا, تاجىريبە الماسۋعا جىبەرۋگە قولعابىس ەتۋگە ءوتىنىش جاسادى.
«Egemen Qazaqstan» رەسپۋبليكالىق گازەتى» اكتسيونەرلىك قوعامىنىڭ باسقارما توراعاسى دارحان قىدىرالى ارنايى كەلگەن مەيماندارعا العىس ايتىپ, ەل گازەتىنىڭ ءجۇز جىلدىق مەرەيتويى اياسىندا اتقارىلىپ جاتقان ءىس-شارالار تۋرالى قىسقاشا باياندادى. «Egemen Qazaqstan گازەتى حالىقارالىق ءباسپاسوز كاتالوگىنا ەنگەندىكتەن, گازەتىمىزگە ەندى رەسەي جەرىندەگى وقىرماندارىمىز دا جازىلا الادى. سوڭعى جىلدارى ىزدەنىس جۇمىستارى ناتيجەسىندە «ۇشقىن» رەداكتسياسى ورنالاسقان تاريحي عيمارات انىقتالدى. رەسەيدەگى قازاقستان ەلشىلىگىنىڭ تىكەلەي قولداۋىمەن وسى عيماراتقا ەسكەرتكىش تاقتا ورناتۋعا قول جەتكىزدىك», دەدى دارحان قىدىرالى.
سونداي-اق ارىپتەستەر تاراپىنان ايتىلعان ۇسىنىس-تىلەكتەر الداعى ۋاقىتتا ەسكەرىلەتىنىن, قانداستارىمىز قىزمەت ەتەتىن شەت ەلدەردەگى اقپارات قۇرالدارىمەن ءوزارا ىنتىماقتاستىقتا جۇمىس ىستەۋگە دايىن ەكەنىن جەتكىزدى جانە قانداستارىمىز تۇرىپ جاتقان وزگە ەلدەردەگى ءباسپاسوز وكىلدەرىن «ەگەمەندە» تاعىلىمدىق تاجىريبەدەن وتۋگە شاقىردى.
