جالپىۇلتتىق «ەگەمەن قازاقستان» رەسپۋبليكالىق گازەتى» اق توراعاسىنىڭ ورىنباسارى – باس رەداكتورى ايبىن شاعالاق, كوكشەلىك قالىڭ وقىرمان جانە زيالى قاۋىم وكىلدەرى قاتىسقان مەرەكەلىك شارانى وبلىستىق ارداگەرلەر كەڭەسىنىڭ توراعاسى, جازۋشى عوسمان تولەعۇل اشىپ, جۇرگىزىپ وتىردى.
الدىمەن وبلىس اكىمىنىڭ ورىنباسارى اينا ءمىسىرالىموۆا ءوڭىر باسشىسى ەرمەك مارجىقپاەۆتىڭ قۇتتىقتاۋىن جەتكىزدى.
– قازاق ءباسپاسوزىنىڭ قاراشاڭىراعى بولىپ سانالاتىن, وزىندىك ورەلى تاريحى بار, قالىڭ وقىرمانى قالىپتاسقان بەدەلدى باسىلىم – «Egemen Qazaqstan» گازەتىنىڭ ءجۇز جىلدىق مەرەيتويى بارشامىزعا ورتاق قۋانىش, – دەدى اينا ءمىسىرالىموۆا ءوز سوزىندە, – قويناۋى تاريحقا تۇنعان كورىكتى كوكشەتاۋ مەن قاراوتكەل جەرى عاسىر تويىن ايرىقشا سالتاناتپەن, مول ماعىنامەن كەڭىنەن اتاپ وتۋدە. جىل باسىنان باستاۋ العان ءدۇبىرلى توي وبلىستىڭ بارلىق اۋداندارىندا دا جالعاسىن تاپتى. وقىرماندارمەن, گازەت جاناشىرلارىمەن جىلى ءجۇزدى كەزدەسۋلەر وتكىزىلىپ, گازەتتىڭ وتكەن تاريحىنا شولۋلار جاسالدى.
وتكەن عاسىردا «ۇشقىن» اتتى شاعىن گازەت بولىپ شىققان رەسپۋبليكالىق باسىلىم بۇگىندە ءار قازاقتىڭ تورىنەن ورىن الدى. گازەتتىڭ تىزگىنىن ۇستاعان الاش ارىستارىنىڭ باستاماسى قازىرگى تاڭدا تاۋەلسىزدىكتى تۋ ەتكەن, باسقا باسىلىمدار بوي تۇزەيتىن, ەگەمەندى ەلدىڭ باستى باسىلىمىنا اينالدى. «Egemen Qazaqstan» – اۋەل باستان ۇلتتىق مۇددەنى, ەلدىك مۇراتىمىزدى جانە رۋحاني قۇندىلىقتارىمىزدى دارىپتەيتىن قازاق ءباسپاسوزى ەكەندىگى بەلگىلى. ءجۇز جاساعان باسىلىمنىڭ ەگەمەن ەل بولۋ جولىندا اتقارعان جۇمىسى, قوسقان ۇلەسى ۇشان-تەڭىز. بۇل گازەت قاراپايىم حالىقتىڭ مۇڭ-مۇقتاجىن جوقتاپ, ار-نامىسىن قورعاۋ ءداستۇرىن ۇنەمى جالعاستىرىپ كەلەدى. ۇنپاراق بەتتەرىنەن ۋاقىت سارىنىمەن ۇندەس, شىنايى دا تانىمدى دۇنيەلەردى ءجيى وقيمىز. اقمولا ءوڭىرىنىڭ دە جەتىستىكتەرى مەن جاقسى جاڭالىقتارىن جۇرتشىلىققا جەدەل ءارى شىنايى تۇردە جەتكىزىپ, وبلىسىمىزدى كەڭىنەن ناسيحاتتاۋدا بۇل باسىلىمنىڭ ۇلەسى وراسان زور. ءبىر عاسىر بويى ەل گازەتىنىڭ بەتتەرىندە ەلدىڭ تاريحى, ەلدىكتىڭ تاريحى قاتتالسا, سوعان كيەلى كوكشە ءوڭىرى ازاماتتارىنىڭ دا قاتىسى بار ەكەنى ءبىز ءۇشىن ماقتانىش.
اينا ەرمەكقىزى سالتاناتتى شارادا گازەتتىڭ بۇرىنعى جانە قازىرگى مەنشىكتى تىلشىلەرى ب.امالبەك پەن ب.ءبايادىلدى وبلىس اكىمىنىڭ العىس حاتىمەن ماراپاتتاپ, ارنايى سىيلىقتار تاپسىردى.
ا. شاعالاق ءوز ءسوزىن استانالىق وبلىستىڭ باسشىلىعى مەن جۇرتشىلىعىنا باسىلىمنىڭ عاسىر تويىنا دەگەن قۇرمەت سەزىمدەرىنە العىس ايتۋمەن باستادى.
– «ەگەمەن» تاريحىنىڭ باستاۋىندا تۇرعان «ۇشقىن» گازەتى شىن مانىندە الاش ارداقتىلارىنىڭ قولىمەن شىعارىلعان العاشقى گازەت – «قازاقتىڭ» زاڭدى جالعاسى دەپ ايتۋعا نەگىز بار. ويتكەنى «ۇشقىن» سول باسپاحانا قارىپتەرىمەن, سول ارداقتىلاردىڭ قاتىسۋىمەن جارىق كوردى. سوندىقتان بۇگىنگى گازەت ۇجىمى 100 جىلدىق اياسىنداعى مەرەيتويلىق شارالاردى قاسيەتتى سەمەي جەرىنەن باستاپ, قاراعاندى, قوستاناي, الماتى وبلىستارىندا جالعاستىردى. «ۇشقىننىڭ» ورىنبورداعى عيماراتىنا الداعى كۇندەرى ەسكەرتكىش تاقتا ورناتىلماق. گازەت تاريحىندا اقمولا وبلىسىنىڭ دا ورنى ەرەكشە. ۋاقىت ءۇردىسىنىڭ جالعاسىن بۇگىنگى كەزدەسۋدەن دە بايقاپ وتىرمىز. ەلباسى اتاپ كورسەتكەندەي, جاڭا تۇرپاتتاعى «Egemen Qazaqstan» گازەتى بيلىك پەن حالىق اراسىنداعى التىن كوپىر قىزمەتىن الداعى ۋاقىتتا دا جالعاستىرا بەرەدى, – دەدى ايبىن باقىت ۇلى.
اقمولا وبلىستىق سوتىنىڭ توراعاسى دوسجان ءامىروۆتىڭ ءسوزى تولعانىسقا تولى بولدى.
– گازەتتىڭ 100 جىلدىق تاريحىنان قازاقستاننىڭ تۇتاس تاريحىن كورۋگە بولادى, – دەدى ول, – ويتكەنى گازەت بەتتەرىندە شەجىرەلى جىلداردىڭ بارلىق بەلەستەرى كورىنىس تاپقان, باستى باسىلىم زار زامانداردان دا اينالىپ وتە الماعان. اشارشىلىق, زۇلمات, سوعىس جىلدارى, تىڭ كوتەرۋ ماسەلەلەرى سول كەزەڭنىڭ تىلىمەن حالىققا جەتتى. قازاقستان ەگەمەندىگىن قالىپتاستىرۋ, بولاشاققا باعىتتالعان «ماڭگىلىك ەل» ءۇردىسى قازىرگى كۇنى باسىلىمنىڭ باستى تاقىرىبى. مۇنى ءبىز كۇن سايىن شاڭىراعىمىزعا كەلىپ تۇرعان «ەگەمەننىڭ» بەتىنەن تامسانا وقي بەرەتىنىمىز ءسوزسىز.
بۇدان كەيىن قوعام قايراتكەرى, كوكشەتاۋ قالاسىنىڭ قۇرمەتتى ازاماتى بولات ءجانادىلوۆ, تانىمال عالىم, ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتىنىڭ دوتسەنتى ءسابيت جامبەك, قازاقستان جۋرناليستەر وداعى جەرگىلىكتى بولىمشەسىنىڭ توراعاسى, «كوكشەتاۋ» گازەتىنىڭ باس رەداكتورى سەرىك جەتپىسقاليەۆ, «EL.Jastar» تەاترىنىڭ ارت-ديرەكتورى حاكىم حاسامباي باس باسىلىمعا دەگەن ىستىق ىقىلاستارىن ءبىلدىرىپ, گازەت ۇجىمىنا شىعارماشىلىق تابىس تىلەدى.
كونفەرەنتسيا بارىسىندا «ەل گازەتى – «ەگەمەن» تاقىرىبىندا كورمە ۇيىمداستىرىلدى.
كوكشەتاۋ
