– ءالي ابدىكارىم ۇلى, ءسىز باسشىلىق ەتەتىن پارتيا قانداي يدەيامەن قۇرىلدى؟
– «اۋىل» حالىقتىق-دەموكراتيالىق پاتريوتتىق پارتياسى وسىدان ءتورت جىل بۇرىن قازاقستان سوتسيال-دەموكراتيالىق پارتياسى مەن قازاقستان پاتريوتتار پارتياسىنىڭ بىرىكتىرىلۋى ناتيجەسىندە قۇرىلدى. قازىرگى تاڭدا ەلىمىزدىڭ 14 وبلىسى جانە رەسپۋبليكالىق ماڭىزى بار نۇر-سۇلتان, الماتى, شىمكەنت سىندى ءۇش قالاسىندا پارتيامىزدىڭ 17 فيليالى جۇمىس ىستەيدى. بۇدان بولەك 188 قالالىق جانە اۋداندىق پارتيا ۇيىمدارىندا 500 باستاۋىش پارتيا ۇيىمى بار. ءبىز پارتيانىڭ باعدارلاماسىندا فەرمەرلەر مەن اۋىل ەڭبەككەرلەرىنىڭ, بارشا قازاقستاندىقتاردىڭ مۇددەلەرىن قورعاۋدى باستى مىندەت ەتىپ الدىق. ءبىز بۇل ميسسيانى لايىقتى دەڭگەيدە ورىنداپ كەلەمىز. سوڭعى جىلدارى ەلىمىزدە اۋىلدى, اۋىل تۇرعىندارىن قولداۋعا باعىتتالعان كوپتەگەن اۋقىمدى باعدارلامالار قابىلداندى. بۇعان ءبىزدىڭ پارتيانىڭ دا قوسقان ۇلەسى زور دەپ ەسەپتەيمىن. ءبىز اۋىلدىڭ بارلىق ماسەلەلەرىن مۇقيات زەرتتەپ, ول تۋرالى پارتيا وتكىزگەن سەزدەردە, سايلاۋالدى باعدارلامالاردا, پارتيا جينالىستارىندا, دوڭگەلەك ۇستەلدەردە ەگجەي-تەگجەيلى تالقىلادىق. بۇقارالىق اقپارات قۇرالدارى ارقىلى دا كەڭىنەن اقپارات تاراتىلدى.
اۋىلداعى تۇيتكىلدى ماسەلەلەردى اۋىل پارتياسىنان سايلانعان ءار دەڭگەيدەگى دەپۋتاتتار دا كوتەرىپ, ەل ۇكىمەتىنە دەپۋتاتتىق ساۋالدار جولدادى. جەكە ءوزىم 22 دەپۋتاتتىق ساۋال ازىرلەپ, قازاقستان رەسپۋبليكاسىنىڭ ۇكىمەتىنە جىبەردىم. اۋىلدا تۇراتىن 7,5 ملن ادامنىڭ ەرىك-جىگەرى مەن مۇددەلەرىن بىلدىرە وتىرىپ, ءبىز ءوزىمىزدىڭ ۇستانىمدارىمىزدى بيىك مىنبەردەن كوتەرىپ ءجۇرمىز. سونىڭ ناتيجەسىندە مەملەكەت اگروونەركاسىپتىك كەشەننىڭ ماسەلەلەرىنە كوڭىل بولە باستادى. وزدەرىڭىز بىلەتىندەي, قازىر اگروونەركاسىپتىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى, 2018-2030 جىلدارعا ارنالعان اۋىلدىق ەلدى مەكەندەردە الەۋمەتتىك-ەكونوميكالىق ينفراقۇرىلىمدى جاڭعىرتۋدى, نارىقتا سۇرانىسقا يە اۋىلشارۋاشىلىق ونىمدەرىن ءوندىرۋدى قامتاماسىز ەتۋدى, اۋىل حالقىنىڭ ءومىر ساپاسىن ارتتىرۋدى كوزدەيتىن «اۋىل – ەل بەسىگى» سىندى باعدارلامالار جۇمىس ىستەۋدە.
اتالعان باعدارلامالاردىڭ ارقاسىندا اۋىل شارۋاشىلىعىن مەملەكەتتىك قولداۋدىڭ كولەمى جىل سايىن ارتىپ كەلەدى. تەك, 2018 جىلى اۋىل شارۋاشىلىعىنا 454 ميلليارد تەڭگە باعىتتالعان. ال 2019 جىلى اگرووندىرىستىك كەشەندى دامىتۋعا 507 ملرد تەڭگە جۇمساۋ كوزدەلىپ وتىر.
2018-2019 جىلدارى اۋىلدىق جەرلەردى تازا سۋمەن قامتۋ 42,5%-دان 59,9%-عا ءوستى (+17,4%). سونىمەن قاتار اۋىلدىڭ الەۋمەتتىك دامۋىنا باعىتتالعان قارجى ءتيىمدى يگەرىلۋدە. قازىردىڭ وزىندە حالقى 250 ادامنان اساتىن 3 324 اۋىل (79%) كەڭجولاقتى عالامتور جەلىسىمەن قامتىلعان. قالعان ەلدى مەكەندەرگە ينتەرنەت 2020 جىلى تارتىلاتىن بولادى. بۇل باعىتتا 16 مىڭ شاقىرىم جەلى ىسكە قوسىلادى. ناتيجەسىندە, اۋىلداعى اعايىنعا قالالىقتار سەكىلدى 4G جەلىسى قولجەتىمدى بولادى.
الداعى 3 جىلدا «اۋىل – ەل بەسىگى» جوباسىنا باعىتتالعان ءىس-شارالاردى جۇزەگە اسىرۋ ءۇشىن, 2019-2021 جىلدارى رەسپۋبليكالىق بيۋدجەتتەن 90 ملرد تەڭگە قاراستىرىلعان. بۇل قارجىعا 4,5 مىڭ جاڭا جۇمىس ورىندارىن اشۋ, 73 مەكتەپ پەن بالاباقشانى, 14 ەمحانا, 47 مادەنيەت ءۇيى مەن سپورتتىق نىسانداردى جوندەۋ جوسپارلانعان. سونىمەن قاتار 13 دەنە شىنىقتىرۋ-ساۋىقتىرۋ كەشەنى مەن 13 اباتتاندىرۋ نىسانى سالىنادى. 516 شاقىرىم جول, 35 شاقىرىم سۋمەن قامتۋ جەلىسى, 229 شاقىرىم ەلەكترمەن قامتۋ (جارىقپەن قامتۋ), 136 شاقىرىم گازبەن قامتۋ جەلىسى, 20 شاقىرىم جىلۋمەن قامتۋ جەلىسى جوندەۋدەن وتەدى دەپ جوسپارلانعان. وسى جەردە ايتا كەتەيىك, ەل پرەزيدەنتىنىڭ تاپسىرماسىنا سايكەس, 2020 جىلى وسىعان قوسىمشا 2027 جىلعا دەيىن 3 540 اۋىلدىق ەلدى مەكەننىڭ ينفراقۇرىلىمىن دامىتۋ ماقساتىندا 800 ملرد تەڭگەگە جۋىق قارجى ءبولۋ جوسپارلانعان.
– قازاقستانداعى پارتيالار سايلاۋدان سايلاۋعا دەيىن عانا ءومىر سۇرەدى دەگەن پىكىر بار. بۇل تۋرالى نە ايتاسىز؟
– ءتورت جىل ىشىندە «اۋىل» پارتياسى 250-دەن اسا ءىس-شارا ۇيىمداستىردى. ءبىز كوپتەگەن ماسەلەلەردى قوزعادىق. بۇل – اگروونەركاسىپتىك كەشەن پروبلەمالارى, مامانداردى دايارلاۋ جانە قايتا دايارلاۋ, شىعارماشىلىق ينتەلليگەنتسيانى قولداۋ, سالاماتتى ءومىر سالتىن ناسيحاتتاۋ جانە وزگە دە ماسەلەلەر. 2017 جىلى قاراشا ايىندا اۋىل شارۋاشىلىعى مينيسترلىگىنىڭ عيماراتىندا اگرووندىرىستىك كەشەندى دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى شەڭبەرىندە ازىرلەنگەن جول كارتالارىن تالقىلاۋ بويىنشا ونلاين-كونفەرەنتسيا وتكىزگەن بولاتىنبىز. سول كەزدە اۋىل شارۋاشىلىعىنىڭ ءبىرىنشى ۆيتسە-ءمينيسترى پارتيا اكتيۆىنە اتالعان مەملەكەتتىك باعدارلامانى جۇزەگە اسىرۋ ءۇشىن پارتيا مۇشەلەرى ونى جەر-جەردە ناسيحاتتاپ, ءار اۋىل تۇرعىنىنا ءتۇسىندىرۋ بويىنشا بىرقاتار كەڭەستەرىن بەردى.
اتقارىلار شارالار ءالى دە جەتەرلىك. بۇل رەتتە شىعارماشىلىق جولدارى اۋىلدىڭ تىنىس-تىرشىلىگىمەن تىعىز بايلانىسقان دارىندى ءارى تالانتتى ازاماتتاردى قولداۋعا تىرىسامىز. ماسەلەن, پارتيا 4 جىلدان بەرى «اۋىلىم – التىن تۇعىرىم» اتتى قالامگەرلەر بايقاۋىن ۇيىمداستىرىپ كەلەدى.
بۇگىنگى تاڭدا اتالعان بايقاۋ حالىقارالىق دەڭگەيگە كوتەرىلدى. سەبەبى قاتىسۋعا نيەت بىلدىرگەندەر اراسىندا قىتاي, موڭعوليا, وزبەكستان ەلىنىڭ جاس دارىندارى بار. «اۋىلىم – التىن تۇعىرىم» قالامگەرلەر مەن وقىرمان قاۋىمى اراسىندا تانىمال ونەر سايىسىنا اينالدى. ءبىر قۋانارلىعى, وسى بايقاۋدىڭ ارقاسىندا قانشاما جاس قالامگەر ءسوز ونەرىندە ءوزىنىڭ باعىن سىناپ, باعاسىن الدى.مىسالى, 2018 جىلى پارتيا سايتىنا ونلاين رەجىمىندە 200-دەن استام شىعارما كەلىپ ءتۇستى. ءبىز «اۋىلىم – التىن تۇعىرىم» بايقاۋىنىڭ جەڭىمپازدارىن ماراپاتتاپ قانا قويمايمىز, قاتىسۋشىلاردىڭ شىعارمالارى پوەزيا, پروزا جانە دراماتۋرگيا جانرلارى بويىنشا پارتيانىڭ قارجىلاندىرۋى ارقىلى جيناققا ەنگىزىلەدى. اتالعان ءۇش تومدىقتىڭ تانىستىرىلىمى جەڭىمپازداردىڭ, جازۋشىلار وداعى مەن قوعامدىق بىرلەستىكتەر وكىلدەرىنىڭ قاتىسۋىمەن وتەدى. جىل سايىن 3 توم بولىپ شىعاتىن «التىن تۇعىر» ادەبي جيناعى پارتيانىڭ فيليالدارى ارقىلى ەلىمىزدىڭ بارلىق ايماقتارىنداعى كىتاپحانالارعا تاراتىلادى.
وتكەن جىلى ءبىزدىڭ پارتيا «اۋىل ناقىشتارى» تاقىرىبىندا فوتوبايقاۋ جاريالادى. ءبىر جىل ىشىندە كاسىبي فوتوسۋرەتشىلەر مەن ەلىمىزدىڭ تۇكپىر-تۇكپىرىندەگى اۋەسقويلاردىڭ اۋىلدىڭ ۇمىتىلماس ساتتەرىنەن سىر شەرتەتىن ەڭبەكتەرى سايتتا جاريالاندى. «اۋىل» پارتياسىنىڭ XIV سەزىندە اتالعان فوتوبايقاۋدىڭ جەڭىمپازدارى مەن جۇلدەگەرلەرى ماراپاتتالىپ, ۇزدىك تۋىندىلاردىڭ كورمەسى ۇيىمداستىرىلدى. اتالعان فوتوبايقاۋ پارتيامىزدىڭ «ەگەمەن قازاقستان» گازەتىمەن بىرلەسكەن جوباسى ەكەنىن دە ايتا كەتۋىمىز كەرەك.
– مەملەكەت باسشىسى قاسىم-جومارت توقاەۆ پەتروپاۆلداعى اگروونەركاسىپتىك كەشەننىڭ دامۋى مەن اۋىلدى دامىتۋ ماسەلەسى جونىندەگى رەسپۋبليكالىق كەڭەستە ىشكى نارىقتى كونترافاكتىلى, قاۋىپتى ونىمنەن قورعاۋ جۇمىستارىن كۇشەيتۋدى تاپسىردى. ءسىزدىڭ پارتياڭىز وسى ماسەلەنى كوتەردى مە؟
– ءيا, ارينە! 2017 جىلى ناۋرىز ايىندا ءبىز «گەندىك موديفيكاتسيالانعان ورگانيزمسىز ءومىر – اۋىل شارۋاشىلىعى عىلىمى مەن ءوندىرىسىنىڭ قازاقستاندىق تاڭداۋى» اتتى دوڭگەلەك ۇستەل وتكىزدىك. دوڭگەلەك ۇستەلگە دايىندىق بارىسىندا پارتيانىڭ ورتالىق اپپاراتى مەملەكەتتىك ورگاندار گەندىك موديفيكاتسيالانعان ورگانيزمگە قاتىستى ماسەلەنى ۋىستارىنان شىعارىپ العاندىعىن انىقتادى. ماسەلەن, «حالىق دەنساۋلىعى جانە دەنساۋلىق ساقتاۋ جۇيەسى تۋرالى» كودەكسى مەن «ازىق-ت ۇلىك ونىمدەرىنىڭ قاۋىپسىزدىگى تۋرالى» زاڭعا سايكەس, ازىق-ت ۇلىك سالاسىندا گەندىك موديفيكاتسيالانعان ءونىمنىڭ مەملەكەتتىك تىركەۋىن جۇرگىزەتىن وكىلەتتى ورگان ءتيىستى مەملەكەتتىك رەەستردى مۇلدە جاساماعان. بۇل جەردە قانداي دا ءبىر پىكىر ايتۋدىڭ قاجەتى شامالى. كەزدەسۋ اياسىندا قازاقستاندا گەندىك موديفيكاتسيالانعان ونىمدەردىڭ الدىن الۋ جونىندە تولىققاندى كەشەندى ءىس-شارالار ۇسىنىلدى.
ناقتىراق ايتقاندا:
– ءبىز وبلىستىق ماڭىزى بار بارلىق ءىرى قالالاردا, شەكارا بەكەتتەرىندە اشىلۋى ءتيىس مامانداندىرىلعان زەرتحانالاردا گەندىك موديفيكاتسيالانعان ورگانيزمگە تەكسەرىس جۇرگىزىلەتىن ونىمدەردىڭ ۇلگىلەرىنە قاتاڭ باقىلاۋ جاساۋدى ۇسىندىق. مۇنداي زەرتحانالار قاجەتتى زاماناۋي قۇرال-جابدىقتارمەن, حيميالىق رەاكتسيا تۋعىزىپ, ىزدەلەتىن زاتتىڭ قۇرامدا بار-جوعىن تابۋعا مۇمكىندىك بەرەتىن قوسپا شىعىندارىمەن, گەندىك موديفيكاتسيالانعان ونىمدەردى انىقتايتىن تەست جۇيەلەرىمەن قامتاماسىز ەتىلۋى ءتيىس. بۇل ماقساتقا بيۋدجەتتەن ارنايى قارجى قاراستىرۋدى دا ۇسىندىق.
اتالعان اۋقىمدى جۇمىستارمەن اينالىساتىن جوعارى بىلىكتى مامانداردى وسى باعىتتا مول تاجىريبەسى بار ەلدەردە جانە وزىمىزدەگى جوعارى وقۋ ورىندار مەن كوللەدجدەردە دايارلاۋ قاجەت ەكەنىن دە ەستەن شىعارعان جوقپىز.
الداعى سەزدە ءبىز «اۋىل» پارتياسى ازىق-ت ۇلىكتەگى گمو-عا قارسى» جاڭا ساياسي باستاماسىن جاريالاۋدى جوسپارلاپ وتىرمىز. ءبىز بارلىق پارتيالاردى, قوعامدىق ۇيىمداردى, بۇقارالىق اقپارات قۇرالدارىن وسى باستامامىزعا قوسىلۋعا شاقىرامىز.
– الداعى سەزد قانداي جاڭالىقتارمەن ەستە قالماق؟
– XVI سەزگە پارتيا فيليالدارىنىڭ ەسەپ بەرۋ-سايلاۋ كونفەرەنتسيالارىندا سايلانعان 210 دەلەگات قاتىسادى دەپ كۇتىلۋدە. شارا اياسىندا «اۋىل» حدپپ جارعىسىنا سايكەس پارتيانىڭ توراعاسى مەن ساياسي كەڭەسى قايتادان سايلاناتىن بولادى. سونداي-اق فيليالداردىڭ ەسەپ بەرۋ-سايلاۋ كونفەرەنتسيالارىندا تۋىنداعان پارتيانىڭ جاڭا باستامالارىمەن تانىستىراتىن بولامىز.
ۇكىمەتكە, مەملەكەتتىك ورگاندارعا جانە بارشا قازاقستاندىقتارعا «اۋىل شارۋاشىلىعى ءوندىرىسى مەملەكەتتىك ساياساتتىڭ باسىم باعىتىنا اينالۋى ءتيىس» دەگەن پارتيالىق ۇستانىمىمىزدى جەتكىزگىمىز كەلەدى.
ء بىز ءبىرىنشى كەزەكتە اۋىلداردى دامىتۋعا ءتيىسپىز. ول ءوز كەزەگىندە ەكونوميكانىڭ باسقا سالالارىنىڭ دامۋىنا ىقپال ەتەدى.
اۋىل ەكونوميكانىڭ درايۆەرى بولا وتىرىپ, مينەرالدى تىڭايتقىشتار مەن تاماق جانە قايتا وڭدەۋ وندىرىستەرىنىڭ, جەڭىل تاماق ونەركاسىبى يندۋسترياسىنىڭ, قۇرىلىس سالاسىنىڭ, اۋىل شارۋاشىلىق ماشينا جاساۋدىڭ, وتىن-ەنەرگەتيكا جانە كولىك كەشەندەرىنىڭ جانە وزگە دە سالالاردىڭ دامۋىنا قۋاتتى سەرپىن بەرەدى. سونىمەن قاتار ءبىز, قازاقستان ساۋدا-ساتتىق تاۋەلسىزدىگىن قامتاماسىز ەتە وتىرىپ, ەكولوگيالىق تازا ءونىمنىڭ الەمدىك نارىعىندا كوشباسشى اگرارلىق دەرجاۆا بولا الادى دەپ سانايمىز.
سەزد جۇمىسى جايلى ايتار بولسام, تاياۋدا ەلىمىزدىڭ ءار ايماعىندا وتكەن ەسەپ بەرۋ-سايلاۋ كونفەرەنتسيالارىندا اگرارلىق سالانىڭ دامۋىنا قاتىستى سىني كوزقاراستارى مەن ۇسىنىستارىن بىلدىرگەن بارلىق دەلەگاتتاردىڭ بەلسەندىلىگىن ەرەكشە اتاپ وتكىم كەلەدى. ولاردىڭ ۇسىنىس-پىكىرلەرى ورتالىق اپپاراتتا سارالانىپ, ۇكىمەتكە جانە مەملەكەتتىك ورگاندارعا جىبەرىلەتىن بولادى.
شىن مانىندە مەملەكەت باسشىسى قاسىم-جومارت توقاەۆ اتاپ وتكەندەي قازىر مەملەكەتتىك ورگاندارعا قوعاممەن قارىم-قاتىناستا اشىقتىق جەتىسپەيدى. بيلىك حالىققا مەيلىنشە جاقىن بولۋدىڭ جولدارىن قاراستىرۋى ءتيىس.
ءبىز پارتيامىزدىڭ مىڭداعان بەلسەندى مۇشەلەرى ارقىلى اۋىل تۇرعىندارىنا ۇكىمەتتىڭ بارلىق يدەيالارى مەن باستامالارىن تۇسىندىرۋگە دايىنبىز. قوعامدىق قۇرىلىمدار مەن مەملەكەتتىك ورگانداردىڭ بۇلايشا قويان-قولتىق جۇمىس اتقارۋى ەكى جاققا دا ءتيىمدى ەكەنىن تۇسىنەتىن كەز كەلگەن سىڭايلى. ۇكىمەت پارتيانىڭ مۇمكىندىكتەرى ارقىلى ءوز شەشىم-قارارلارىنىڭ حالىققا جەتۋىن قامتاماسىز ەتسە, قاراپايىم حالىقتىڭ مۇڭ-مۇقتاجىنىڭ جوعارى جاققا جەتىپ, ءتيىستى شارالاردىڭ قولدانىلىپ جاتقانىن كورگەن پارتيا مۇشەلەرىنىڭ دە بەلسەندىلىگى ارتا تۇسپەك.
– ءالي ابدىكارىم ۇلى, «اۋىل» پارتياسى الداعى ۋاقىتتا وتەتىن پارلامەنتتىك جانە ءماسليحات سايلاۋىنا قاتىسا ما؟
– پارتيانىڭ ءوز جۇمىسىن باستاعانىنا كوپ ۋاقىت بولماسا دا, ءبىزدىڭ پارلامەنتتىك سايلاۋعا, قازاقستان رەسپۋبليكاسىنىڭ پرەزيدەنتىنىڭ سايلاۋىنا قاتىسقان تاجىريبەمىز بار, سونداي-اق بارلىق دەڭگەيدەگى ءماسليحاتتاردىڭ سايلاۋىنا پارتيالىق تىزىمدەر بويىنشا قاتىسۋعا دايىنبىز.
قازىرگى تاڭدا «اۋىل» پارتياسى پارلامەنتتىك سايلاۋدا پارلامەنتتە جانە جەرگىلىكتى ءماسليحاتتا ءوز وكىلدەرىنىڭ بولۋ مىندەتىن قويىپ وتىر. بۇل ءوز كەزەگىندە پارتيانىڭ ساياسي پلاتفورماسىن ىسكە اسىرۋعا باعىتتالعان زاڭدار مەن مەملەكەتتىك شەشىمدەردىڭ قابىلدانۋىنا ايتارلىقتاي ىقپال ەتەدى. بيلىكتىڭ وكىلەتتى ورگاندارىنان ورىن الۋ, پارتيا باعدارلاماسىنىڭ ستراتەگيالىق جانە تاكتيكالىق ماقساتتارىن ءىس جۇزىندە جۇزەگە اسىرۋعا مۇمكىندىك بەرەدى.
قازىرگى تاڭدا «اۋىل» پارتياسىنىڭ قاتارىنا مۇشەلىككە جۇزدەگەن مىڭ ادام ەرىكتى تۇردە ءوتتى. ءبىزدىڭ پارتيا جەرگىلىكتى تۇرعىندار اراسىندا ۇلكەن ابىرويعا يە. مۇنى حالىقتىڭ پارتياعا كىرۋگە دەگەن ىنتاسىنان بايقاۋعا بولادى. تەك 2015-2019 جىلدار ارالىعىندا ءبىزدىڭ پارتيانىڭ قۇرامى 44 مىڭ ادامعا ارتتى. ولاردىڭ كوپشىلىگى اۋىل شارۋاشىلىعىنىڭ جوعارى بىلىكتى قىزمەتكەرلەرى, عالىمدار, عىلىم اكادەمياسىنىڭ مۇشەلەرى, مەديتسينا جانە ءبىلىم بەرۋ مەكەمەلەرىنىڭ قىزمەتكەرلەرى, ەلىمىزدىڭ ءىرى اگروقۇرىلىمدارىنىڭ جەتەكشىلەرى. ءبىزدىڭ قاتارىمىزدا قاراپايىم اۋىل تۇرعىندارى, ەڭبەك ادامدارى دا بار. سوڭعى 3 جىلدا قوعامنىڭ ءار سالاسىندا ۇزاق جىلدار ەڭبەك ەتكەن 500-دەن استام پارتيا مۇشەسى «اۋىل» حدپپ ۇسىنۋىمەن مەملەكەتتىك جانە ۆەدومستۆولىق ناگرادالارمەن ماراپاتتالدى. بىزدە داعدارىستى ەڭسەرىپ, ەل ەكونوميكاسىن جاڭا, ساپالى دەڭگەيگە كوتەرۋگە نەگىزدەلگەن مەملەكەتتىك ستراتەگيانى, باعدارلامانى جاساۋعا قابىلەتتى, مىقتى كادرلىق الەۋەت بار. ال پارلامەنتكە كىرۋ بۇل ءاربىر پارتيانىڭ ماقساتى دەپ ويلايمىن. ال قازىرگى «اۋىل» پارتياسىنىڭ مۇنداي ماقساتقا قول جەتكىزەرلىكتەي الەۋەتى بار.
اڭگىمەلەسكەن
عابيت ىسكەندەر ۇلى,
«Egemen Qazaqstan»
