الماتى قالاسىنداعى مەكتەپ جاسىنا دەيىنگى جانە جالپى ءبىلىم بەرەتىن مەكەمەلەردەگى جاعدايلار تۋرالى بريفينگ وتكىزگەن ءبىلىم باسقارماسىنىڭ باسشىسى گۇلنار حودجابەرگەنوۆا از قامتىلعان جانە كوپ بالالى وتباسىلاردىڭ وقۋشىلارىن تاماقپەن تەگىن قامتاماسىز ەتۋ, ءبىلىم مەكەمەلەرىندەگى ورىن تاپشىلىعىن شەشۋ, مەكتەپتەر مەن كوللەدجدەرگە كۇردەلى جوندەۋ جۇمىستارىن جۇرگىزۋ جانە ماتەريالدىق-تەحنيكالىق جاراقتاندىرۋدى كۇشەيتۋ, مەكتەپ جاسىنا دەيىنگى جانە ورتا ءبىلىم بەرەتىن جاڭا مەكەمەلەردى ىسكە قوسۋ جانە تاعى دا باسقا كەشەندى ماسەلەلەرگە توقتالدى. گ.حودجابەرگەنوۆانىڭ ايتۋىنشا, قازىرگى كەزدە قالاداعى بارلىق مەكتەپتەردە جوعارىدا اتاپ وتكەن ماسەلەلەرگە ءبىلىم بەرۋ جۇيەسىنىڭ (جاپپاي وقىتۋ قورى) جالپى بيۋدجەتىنىڭ ءبىر پايىز قارجىسى قاراستىرىلعان. قارجى مەملەكەتتەن اتاۋلى الەۋمەتتىك كومەك الۋ قۇقىعىنا يە ءارى كۇنكورىسى تومەن, سونىمەن قاتار توتەنشە جاعداي سالدارىنان جەدەل كومەككە ءزارۋ وتباسىلاردىڭ وقۋشىلارىنا ءارى اتا-انا قاراۋىنسىز قالعان جەتىمدەرگە بەرىلەدى.
وسى تۇستا الەۋمەتتىك جاعىنان از قامتىلعان وتباسىلاردىڭ بالالارى ءجۇز پايىز تەگىن تاماقپەن قامتىلعانىن اتاپ ءوتۋ قاجەت.
باسقارما باسشىسى اتاپ وتكەندەي, اعىمداعى جىلى جاپپاي وقىتۋ قورى قارجىسىنان قالا بويىنشا وسى ساناتتاعى 20,7 مىڭ بالاعا 1,235 ملرد تەڭگە (مەكتەپتى ۇستاۋعا كەتەتىن شىعىننىڭ جالپى سوماسىنىڭ 2,3 پايىزىن قۇرايدى) قاراستىرىلعان. وتكەن 9 اي ىشىندە جالپى سوماسى 536 ملن 725 مىڭ تەڭگەگە 20 735 وقۋشى تەگىن تاماقتاندى.
ءبىلىم باسقارماسىنىڭ باسشىسى اعىمداعى جىلى مەكتەپتەر مەن كوللەدجدەردىڭ ماتەريالدىق-تەحنيكالىق بازالارىن نىعايتۋ ءۇشىن تىگىن ماشينالارىنىڭ, ينتەرناتتار ءۇشىن مۋلتيمەديالىق جابدىقتار مەن ءبىلىم مەكەمەلەرى ءۇشىن جيھازداردىڭ ساتىپ الىنعانىن ايتتى. ءبىلىم مەكەمەلەرىندەگى ەسكىرگەن 450 پروەكتور جاڭادان الىنعان.
بۇگىندە قالاعا سىرتتان ءجيى كوشىپ كەلۋ جانە بالا تۋ كورسەتكىشىنىڭ ارتۋىنا بايلانىستى مەكتەپ جاسىنا دەيىنگى جانە جالپى ءبىلىم بەرەتىن مەكەمەلەردە ورىن تاپشىلىعى بايقالادى. قازىرگى كەزدە ورىن تاپشىلىعى – 30 183. وسى ولقىلىقتىڭ ورنىن تولتىرۋ ماقساتىندا بيىل الاتاۋ اۋدانىندا 600 ورىندى №201 مەكتەپ, بوستاندىق اۋدانىندا №105 مەكتەپ جانىنان 300 ورىندى قوسالقى نىسان پايدالانۋعا بەرىلدى. تۇركسىب اۋدانىنداعى «كولحوزشى» ەلدى مەكەنىندە 600 ورىندى مەكتەپتىڭ, اۋەزوۆ اۋدانىنىڭ «مامىر» شاعىن اۋدانىندا 1200 ورىندى مەكتەپتىڭ, سونىمەن قاتار جەكە ينۆەستيتسيا ەسەبىنەن (ە.تاتىشەۆ قورى) 600 ورىندىق №61, 123, 164, 172 مەكتەپتەر جانىنان 1717 ورىندى قوسالقى نىساندار مەن الەۋمەتتىك جاۋاپكەرشىلىك اياسىندا الداعى جىلدىڭ قىركۇيەگىندە №140 مەكتەپ جانىنان 300 ورىندى قوسالقى نىسان سالۋ جوسپارلانىپ وتىر. سونداي-اق, كەلەر جىلى مەملەكەت-جەكەمەنشىك ارىپتەستىك اياسىندا 12900 ورىندى 8 مەكتەپتىڭ, 1640 ورىندى 3 جەكە مەكتەپتىڭ, مەكتەپتەر جانىنان ارقايسىسى 600 ورىندى 2 قوسالقى نىساننىڭ قۇرىلىسىن باستاۋ دا جوسپارلانۋدا. ال بالاباقشا ماسەلەسىنە توقتالار بولساق, اعىمداعى جىلى 560 ورىندى 3 مەملەكەتتىك جانە 2618 ورىندى 113 جەكەمەنشىك بالاباقشا ىسكە قوسىلدى. بۇدان وزگە 640 ورىندى 4 مەملەكەتتىك بالاباقشا جانە الەۋمەتتىك جاۋاپكەرشىلىك اياسىندا بوستاندىق اۋدانىندا 150 ورىندى بالاباقشا سالىنۋدا.
