وتىرىستا ۇلتتىق ەكونوميكا ءمينيسترى ر.دالەنوۆ «رەسپۋبليكالىق جانە وبلىستىق بيۋدجەتتەر, رەسپۋبليكالىق ماڭىزى بار قالالار, استانا بيۋدجەتتەرى اراسىنداعى 2020-2022 جىلدارعا ارنالعان جالپى سيپاتتاعى ترانسفەرتتەردىڭ كولەمى تۋرالى» زاڭ جوباسى بويىنشا بايانداما جاسادى. اتالعان زاڭ جوباسى 2017-2019 جىلدارعا ارنالعان ترانسفەرتتەر تۋرالى زاڭنىڭ مەرزىمى اياقتالۋىنا بايلانىستى ازىرلەنگەنىن مالىمدەدى.
تابىس سالىعى جەرگىلىكتى بيۋدجەتكە بەرىلەدى
جالپى سيپاتتاعى ترانسفەرتتەر وڭىرلەردىڭ بيۋدجەتتىك قامتاماسىز ەتىلۋىن تەڭەستىرۋگە باعىتتالعان. ءمينيستردىڭ ايتۋىنشا, 2020-2022 جىلدارعا ارنالعان جالپى سيپاتتاعى ترانسفەرتتەردىڭ ەرەكشەلىكتەرى جوق ەمەس. ەڭ الدىمەن, زاڭ جوباسىندا جەرگىلىكتى اتقارۋشى ورگانداردى شاعىن جانە ورتا بيزنەستى دامىتۋعا ىنتالاندىرۋ جولعا قويىلعان.
«ول ءۇشىن شاعىن جانە ورتا بيزنەستەن تۇسەتىن كورپوراتيۆتىك تابىس سالىعىن 2020 جىلدان باستاپ جەرگىلىكتى بيۋدجەتتەرگە بەرۋ قاراستىرىلدى. ەكىنشى باستى ماسەلە, زاڭ جوباسىندا وڭىرلەردىڭ ەرەكشەلىكتەرى دە ەسەپكە الىندى. ول ءۇشىن جاڭا كوەففيتسيەنتتەر ەنگىزىلدى. اتاپ ايتار بولساق, اۋىل شارۋاشىلىعى ونىمدەرىنىڭ كولەمى, ايماق اۋدانى, تۇرعىن ءۇي سانى, ءوڭىردىڭ جالپى وڭىرلىك ونىمىندە شاعىن جانە ورتا بيزنەستىڭ ۇلەسى», دەدى رۋسلان دالەنوۆ.
ودان كەيىن ۇلتتىق ەكونوميكا ءمينيسترى 2020 جىلى جەرگىلىكتى بيۋدجەتتەردىڭ جالپى شىعىستارىنىڭ كولەمى 4,7 ترلن تەڭگە, 2021 جىلى 4,9 ترلن تەڭگە, 2022 جىلى 5,1 ترلن تەڭگە كولەمىندە بولجانعانىن حابارلادى. سونىمەن قاتار اگروونەركاسىپتىك كەشەندى سۋبسيديالاۋعا, مەديتسينالىق مەكەمەلەردىڭ كۇردەلى شىعىندارىنا جانە مەكتەپتەردى سالۋعا جەرگىلىكتى اتقارۋشى ورگاندارمەن باعىتتالۋى ءتيىس بيۋدجەت قاراجاتىنىڭ ەڭ تومەن كولەمى بەكىتىلەتىنىن دە ايتىپ ءوتتى.
ء ومىر ءسۇرۋ ساپاسىن ارتتىرۋعا باعىتتالعان تۇزەتۋلەر
ال پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا.سمايىلوۆ «2020-2022 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن ۇسىندى. بيۋدجەت جوباسى بارلىق الەۋمەتتىك مىندەتتەمەلەردىڭ ورىندالۋىن قامتاماسىز ەتۋ, 2025 جىلعا دەيىنگى ستراتەگيانى ىسكە اسىرۋدى قامتاماسىز ەتۋ, ەلباسىنىڭ تاپسىرمالارىن جانە مەملەكەت باسشىسىنىڭ جولداۋىن ىسكە اسىرۋىن قامتاماسىز ەتۋ سياقتى 3 نەگىزگى مىندەتتى شەشۋگە باعىتتالعان. ءا.سمايىلوۆتىڭ ايتۋىنشا, نەگىزگى ماقسات – مۇعالىمدەر مەن مادەنيەت قىزمەتكەرلەرىنىڭ جالاقىسىن كوبەيتۋ. ول ءۇشىن 3 جىلعا 1,1 ترلن تەڭگەدەن استام قارجى قاجەت.
سونىمەن قاتار ميكرو جانە شاعىن بيزنەستى سالىق تولەۋدەن بوساتۋدى ەسكەرە وتىرىپ, سۋبۆەنتسيالار جانە الىپ قويۋلار كولەمى وزگەرتىلگەن. سونداي-اق بيۋدجەت جوباسىن قاراۋ بارىسىندا پارلامەنت دەپۋتاتتارىنىڭ ۇسىنىستارى بويىنشا حالىقتىڭ ءومىر ءسۇرۋ ساپاسىن ارتتىرۋعا جانە وڭىرلەردى دامىتۋعا باعىتتالعان بىرقاتار تۇزەتۋلەر ەسكەرىلدى. قوسىمشا اۋىلدىق ەلدى مەكەندەردى تازا اۋىز سۋمەن, سۋ بۇرۋ, گازداندىرۋ قىزمەتتەرىمەن قامتاماسىز ەتۋگە, وعان قوسا تۇرعىن-ءۇي كوممۋنالدىق شارۋاشىلىعى وبەكتىلەرىن جانە كولىك ينفراقۇرىلىمىن دامىتۋعا قاراجات كوزدەلگەن.
مينيستر زاڭ جوباسى بويىنشا الەۋمەتتىك كومەككە جانە قامسىزداندىرۋعا 11 ترلن تەڭگە, ونىڭ ىشىندە 2020 جىلعا 3,4 ترلن تەڭگە جوسپارلانعانىن مالىمدەدى. شىعىستاردىڭ باسىم بولىگى نەمەسە 97%-ى زەينەتاقى, جاردەماقى, اتاۋلى الەۋمەتتىك كومەك جانە بىرجولعى قارجىلاي وتەماقى تولەۋگە ارنالعان.
ال دەنساۋلىق ساقتاۋ سالاسىنا 4,7 ترلن تەڭگە, 2020 جىلعا 1,5 ترلن تەڭگە قاراستىرىلعان. بۇل بيىلعى بولىنگەن قاراجاتقا قاراعاندا 299 ملرد تەڭگەگە وسكەن. اتالعان ءوسىم نەگىزىنەن مىندەتتى الەۋمەتتىك مەديتسينالىق ساقتاندىرۋعا كوشۋمەن جانە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە مەديتسينا قىزمەتكەرلەرىنىڭ ەڭبەكاقىسىنىڭ ۇلعايۋىمەن بايلانىستى.
سونىمەن قاتار بيۋدجەت جوباسىندا ءبىلىم بەرۋ جانە عىلىمعا 3,7 ترلن تەڭگە, ونىڭ 858 ملرد تەڭگەسى 2020 جىلعا قاراستىرىلعانى دا ءمالىم بولدى.
الەۋمەتتىك سالا شىعىندارى – 5,7 ترلن تەڭگە
سەناتورلار بيۋدجەت جوباسىن تالقىلاۋ بارىسىندا ەلىمىزدىڭ نەگىزگى قارجى-ەكونوميكالىق زاڭىنا 85 تۇزەتۋ مەن تولىقتىرۋ ۇسىندى, ونىڭ 44-ءى قابىلداندى.
تۇزەتۋلەر, ەڭ الدىمەن, ايماقتاردى دامىتۋدى ىنتالاندىرۋعا جانە ازاماتتاردىڭ ءال-اۋقاتىن جاقسارتۋ شارالارىنا قاتىستى. ماسەلەن, بالالارعا, كوپ بالالى وتباسىلارعا, مۇگەدەكتەرگە بەرىلەتىن جاردەماقىنى ارتتىرۋعا, بيۋدجەت سالاسى قىزمەتكەرلەرىنىڭ جالاقىسىن ۇلعايتۋعا, الەۋمەتتىك ينفراقۇرىلىم نىساندارىن سالۋعا بولىنەتىن الەۋمەتتىك سالا شىعىندارى 5,7 ترلن تەڭگە نەمەسە 45%-عا جۋىق بولىپ وتىر.
وڭىرلەردەگى كەزەكتە تۇرعانداردىڭ جەر تەلىمدەرىن الۋىنا وراي «نۇرلى جەر» تۇرعىن ءۇي قۇرىلىسى باعدارلاماسىنىڭ شارالارىن قارجىلاندىرۋ اياسىندا ينفراقۇرىلىم قۇرىلىسىنا ارنالعان قارجىعا بايلانىستى دا بىرقاتار تۇزەتۋ ۇسىنىلدى.
سونىمەن قاتار جوعارعى پالاتانىڭ جالپى وتىرىسىندا شالعايداعى ەلدى مەكەندەردە سۋمەن جابدىقتاۋ جۇيەسىن سالۋ جانە قايتا قۇرۋ, سونداي-اق ايماقتاردى دامىتۋدىڭ 2020 جىلعا دەيىنگى باعدارلاماسى اياسىندا تۇرعىن ءۇي-كوممۋنالدىق شارۋاشىلىق سالاسىنداعى شارالاردى جۇزەگە اسىرۋعا قاتىستى تۇزەتۋلەر تالقىلاندى.
سەنات توراعاسى د.نازارباەۆا ءوز سوزىندە بارلىق دەڭگەيدەگى بيۋدجەت شىعىندارىن باقىلاي الۋ ءۇشىن ەسەپ كوميتەتىن, ايماقتارداعى ءماسليحاتتاردى جانە ەسەپ كوميسسيالارىن كادرمەن جانە ۇيىمداستىرۋ سالاسى بويىنشا قامتاماسىز ەتۋ قاجەتتىگىن اتاپ ءوتتى. سونداي-اق كىرىستەر مەن شىعىستاردىڭ جالپى كورىنىسىمەن تانىسۋ ءۇشىن سەناتقا وبلىستار مەن رەسپۋبليكالىق ماڭىزى بار قالالار بيۋدجەتتەرىنىڭ جوبالارى ۇسىنىلعانى ءجون ەكەنى ايتىلدى.
«رەسپۋبليكالىق بيۋدجەت كوميسسياسى وتىنىمدەردى وزدەرى قاراي بەرەدى, ال بيۋدجەت كوميسسياسىنىڭ جۇمىس توبىنىڭ جالپى وتىرىسىنا پارلامەنت دەپۋتاتتارى فورمالدى تۇردە قاتىسۋمەن شەكتەلەدى. ۇكىمەتتىڭ نازارىن وسى ماسەلەلەرگە اۋدارا وتىرىپ, جاقىن ارادا ءتيىستى شارالار قابىلداۋدى ۇسىنامىز», دەدى د.نازارباەۆا.
پارلامەنت سەناتىنىڭ جالپى وتىرىسىنىڭ قورىتىندىسى بويىنشا دەپۋتاتتاردىڭ رەسپۋبليكالىق بيۋدجەت جوباسىنا ەنگىزگەن تۇزەتۋلەرى ماجىلىسكە جىبەرىلدى.
زاڭ جوبالارىن تالقىلاۋ بارىسىندا ورتالىق, شىعىس جانە سولتۇستىك قازاقستان وبلىستارىن گازبەن قامتاماسىز ەتۋ ماسەلەسى دە نازارعا الىندى. وسى رەتتە ۇكىمەت باسشىسى اسقار مامين وبلىستاردى گازداندىرۋدىڭ بىرنەشە جولىن قاراستىرىپ جاتقانىن حابارلادى. ا.ءماميننىڭ ايتۋىنشا, ءبىرىنشى نۇسقاعا سايكەس, ەلورداعا جەتكەن «سارىارقا» گاز قۇبىرى ودان ءارى دامىتىلىپ, 2 جانە 3-كەزەڭ ەسەبىنەن پاۆلودار وبلىسىنىڭ تۇرعىندارىنا كوگىلدىر وتىن جەتكىزىلەتىن بولادى. ال ەكىنشى نۇسقا بويىنشا, رەسەيدىڭ گاز تاسىمالداۋ جۇيەسىنە قوسىلۋ كوزدەلەدى. بۇل ماسەلەگە بايلانىستى رەسەيلىك «گازپروم» كومپانياسىمەن كەلىسسوزدەر جۇرگىزىلۋدە. «قازىرگى ۋاقىتتا وسى ەكى نۇسقا بويىنشا دا تەحنيكالىق-ەكونوميكالىق نەگىزدەمە ازىرلەۋ باعىتىندا ءتيىستى جۇمىس جۇرگىزىلىپ جاتىر. 2020 جىلدىڭ 1-توقسانىندا جوبانى قاي نۇسقامەن دامىتاتىنى تۋرالى تۇسىنىك بولادى», دەدى ۇكىمەت باسشىسى.
سوڭىندا سەناتورلار ءتيىستى ورگاندارعا دەپۋتاتتىق ساۋالدارىن جولدادى.
