«75 جىل: دارالىق پەن دانالىق جولى» اتتى شاراعا مەملەكەت جانە قوعام قايراتكەرلەرى, عالىمدار, ۋنيۆەرسيتەتتىڭ تانىمال تۇلەكتەرى مەن ەسترادا جۇلدىزدارى قاتىسادى دەپ كۇتىلۋدە.
قىزدار ۋنيۆەرسيتەتى وسى جىلدارى ىرگەتاسىن نىقتاعان, ءوزىنىڭ دارا ءداستۇرىن قالىپتاستىرعان وقۋ ورنى ەلىمىزدىڭ ۇستازدار دايارلايتىن بىردەن-ءبىر ورتالىعىنا اينالدى. ۇلى وتان سوعىسىنىڭ قيىن-قىستاۋ كەزىندە – 1944 جىلى اشىلعان بۇل بىرەگەي ءبىلىم ۇياسىنىڭ ەلىمىزدە پەداگوگ كادرلار دايىنداۋداعى الاتىن ورنى ولشەۋسىز ۇلكەن. ويتكەنى, ونى وسى مەرزىم ىشىندە كەڭ-بايتاق رەسپۋبليكامىزدىڭ تۇكپىر-تۇكپىرىنەن, اسىرەسە اۋىلدىق جەرلەردەن بىلىمگە شولىركەپ كەلگەن مىڭداعان قازاق قىزدارى ءبىتىرىپ شىقتى.
ەڭ باستىسى – قىزدار ۋنيۆەرسيتەتى قۇرىلعان كۇنىنەن باستاپ-اق وتاندىق ءبىلىم بەرۋ مەن عىلىمنىڭ جارقىن ۇلگىسى, كاسىبي بىلىكتى عىلىمي جانە پەداگوگيكالىق مەكتەپتەردىڭ باستاۋ كوزى بولدى.
بۇگىندە ۋنيۆەرسيتەت الەمنىڭ 70-كە جۋىق جوعارى وقۋ ورنىمەن ىنتىماقتاستىق بايلانىس ورناتقان. ونىڭ ىشىندە تۇركيانىڭ نيدە ومەر حاليسدەمير ۋنيۆەرسيتەتى, اقش-تىڭ ميسسيسيپي القابى مەملەكەتتىك ۋنيۆەرسيتەتى, ۇلىبريتانيانىڭ Western international سollege وقۋ ورنىمەن جانە پولشانىڭ كاتوۆيتساحتاعى سيلەز ۋنيۆەرسيتەتىمەن قوسديپلومدى ءبىلىم بەرۋ باعدارلاماسى ءساتتى جۇزەگە اسىپ كەلەدى.
بيىك بەلەسكە بەت العان ءبىلىم ورداسىنا قازاقستاننىڭ تۇڭعىش پرەزيدەنتى نۇرسۇلتان نازارباەۆتىڭ 2018 جىلعى 25 جەلتوقسانداعى جارلىعىمەن «ۇلتتىق» مارتەبەسى بەرىلدى. بۇل – ەلىمىزدىڭ ءورىسىن كەڭەيتۋگە سۇبەلى ۇلەس قوسىپ كەلە جاتقان ۇستازدار قاۋىمىنا دەگەن قۇرمەتتىڭ ايقىن ۇلگىسى دەپ توپشىلاۋعا بولادى.
ۋنيۆەرسيتەت 75 جىلعا جۋىق ۋاقىت ارالىعىندا ءوزىنىڭ قالىپتاسۋى مەن دامۋى جولىنان ءوتتى. ۇلت زيالىلارى قىزمەت اتقارعان ۇلاعات ۇياسىندا وسى ۋاقىت ارالىعىندا 60 مىڭنان استام بىلىكتى مامان دايارلاندى.
قىزدار ۋنيۆەرسيتەتى – تەك پەداگوگ دايارلاپ قانا قويمايدى, ول ۇرپاق تاربيەشىسى رەتىندە سانالاتىن بولاشاق مامانداردىڭ بويىنا حالقىمىزدىڭ ۇرپاقتان ۇرپاققا ميراس بولىپ كەلە جاتقان تاعىلىمدى تاربيەسىن, ۇلتتىق قۇندىلىقتارىن, سالت-ءداستۇرىن سىڭىرەدى. بۇل – ارۋلاردىڭ پاراسات مەكتەبىنە اينالعان ءبىلىم ورداسىنىڭ وزىندىك ەرەكشەلىگى.
وقۋ ورنىندا بۇگىندە جەتى مىڭعا جۋىق بىلىمگەر ساپالى ءبىلىم, سانالى تاربيە الۋدا. بيىل ولاردىڭ قاتارىن مىڭنان استام ستۋدەنت, 115 ماگيسترانت پەن 10 دوكتورانت تولىقتىردى. ۋنيۆەرسيتەت تۇلەكتەرىنىڭ جۇمىسقا ورنالاستىرۋ كورسەتكىشى 2019 جىلى 93 پايىزدى قۇراعان.
