كىتاپ – ەل مەن ەلدى دوستاستىراتىن التىن كوپىر. وقىرماننىڭ وزگە ەل تۋرالى تۇسىنىگى ەڭ الدىمەن كىتاپ ارقىلى قالىپتاسادى. بۇل ورايدا يلەسام-نىڭ ءتۇبى ءبىر تۇركى ەلدەرىنە تۇرىك تىلىندەگى كىتاپتاردى سىيعا تارتۋى ماڭىزى جوعارى, قايتارىمى بار جوبا دەۋگە بولادى. ويتكەنى بۇل ۇيىم تۇرىك تىلىندەگى كىتاپتاردى تەك ءبىزدىڭ ەلىمىزگە ەمەس, وزگە دە مەملەكەتتەرگە اماناتتاپ وتىر. شارا بارىسىندا ءسوز العان تۇركيانىڭ قازىرگى تاڭداعى مىقتى اقىندارىنىڭ ءبىرى, اتالعان ۇيىمنىڭ باسشىسى مەحمەت نۇري پارماكسىز تۇركى الەمىن بايلانىستىرىپ تۇراتىن كوپىردى كىتاپ ارقىلى قۇرۋ مۇمكىندىگىن ايتتى. ء«بىزدىڭ ءتىلىمىز بەن ءدىنىمىز, مادەنيەتىمىز بەن ءداستۇرىمىز ۇقساس. بۇل تۇركى الەمىن بايلانىستىرادى. وتكەن جىلى ءبىزدىڭ ۇيىم ازەربايجان مەملەكەتىنە 15 مىڭ كىتاپتى تەگىن سىيلاپ, ۇلتتىق كىتاپحانالارىندا ءباسپاسوز ءماسليحاتىن وتكىزدى. بيىل جوسپار بويىنشا قازاقستان جانە قىرعىزستان ەلدەرىنىڭ ارقايسىسىنا 10 مىڭ كىتاپتى تەگىن سىيلاماقپىز. ونىڭ ىشىندە نۇر-سۇلتان قالاسىنا 5 مىڭ, الماتى قالاسىنا 5 مىڭ كىتاپ تاراتىلادى. ءبىز تۇرىك تىلىندەگى لاتىن ارپىمەن باسىلعان بۇل كىتاپتاردى سىزدەرگە اماناتتايمىز», دەدى مەحمەت نۇري پارماكسىز. اقىننىڭ ايتۋىنشا, كىتاپتاردىڭ جانرلارى ءارتۇرلى. ادەبي كىتاپتار, عىلىمي زەرتتەۋلەر, سوزدىك, ەنتسيكلوپەديا, انتولوگيا, بالالار ادەبيەتى, مەديتسينالىق باسىلىمدار مەن تەحنيكالىق ءبىلىم سالاسىنداعى جيناقتاردان قۇرالعان جيىنى 10 مىڭ كىتاپ ەندى نۇر-سۇلتان جانە الماتى قالالارىنداعى مادەني ورىندارعا تاراتىلادى.
جيىندى جۇرگىزگەن اقىن, قازاقستان جازۋشىلار وداعى نۇر-سۇلتان قالالىق فيليالىنىڭ توراعاسى داۋلەتكەرەي كاپ ۇلى ءسوز كەزەگىندە مەحمەت نۇري مىرزا اماناتتاعان كىتاپتارعا قيانات جاسالمايتىنىن جەتكىزدى. ءتۇبى ءبىر تۇركى حالىقتارىنىڭ دوستىعى كىتاپ ارقىلى دا, قازىرگى تۇركى الەمىندەگى كوزى ءتىرى قالامگەرلەردىڭ ادامي قارىم-قاتىناسى ارقىلى دا جالعاستىعىن تاباتىنىن ايتتى.
