سۋرەتتىڭ استىنا ادامداردىڭ اتى-ءجونى توتە جازۋمەن جازىلىپ, كىمنىڭ قانداي مىندەت اتقاراتىنى جايلى دا (گازەتتەگى ادام اتتارى تۇپنۇسقادان وزگەرىسسىز الىندى) اقپار بەرىلىپتى:
- رەداكتور توعجان ۇلى عابباس.
- رەداكتوردىڭ ادەبي جاردەمشىسى دۋلات ۇلى مىرجاقىپ.
- باسقارما حاتشىسى بەگالى ۇلى عاني.
- پارتيا جۇمىسى ءبولىمىن باسقارۋشى ايسارى ۇلى ءابدىراحمان.
- «ەڭبەكشى قازاقتىڭ» وقشاۋ ءسوز جازۋشى مايلى ۇلى بەيىمبەت.
- ەل حاتتارىن باسقارۋشى سەگىزباي ۇلى امانعالي.
- كەڭەس قۇرىلىسى ءبولىمىن باسقارۋشى احمەت ۇلى ءىلياس.
- شارۋا ءبولىمىن باسقارۋشى ەشمۇقامەت ۇلى مەرعالي.
- تەلەگرام حابارلارىن باسقارۋشى ءجۇسىپ ۇلى ساپا.
- رەتۋشەر داۋلەتباي ۇلى ءماجيت.
- ادەبي بۇيرانىڭ حاتشىسى اعايدار ۇلى ابدۋللا.
- زەرتتەۋ بۇيراسىنىڭ حاتشىسى ەلشىبەك ۇلى احمەت.
- تۇنگى رەداكتور يلا ۇلى ءابىل.
- باسقارما قىزمەتكەرى قوجاحمەت ۇلى شياپ.
جوعارىدا بەرىلگەن ادامداردىڭ اتى-ءجون ءتىزىمى ولاردىڭ لاۋازىمدىق مىندەتىنە قاراي جازىلعانى بايقالادى. كەيىن زەرتتەۋشى تىلەكقابىل بورانعالي ۇلى مۇنداعى ادامداردى وتىرعان رەتىنە قاراي (سولدان وڭعا) انىقتاپ شىعىپتى:
ءبىرىنشى قاتاردا: امانعالي سەگىزباەۆ, ابدولدا اعايداروۆ, احمەتسافا يۋسۋپوۆ.
ەكىنشى قاتاردا: عالي بەگاليەۆ, ءابدىراحمان ايسارين, عابباس توعجانوۆ (رەداكتور), مىرجاقىپ دۋلاتوۆ, بەيىمبەت مايلين, ءىلياس احمەتوۆ.
ءۇشىنشى قاتاردا: ءماجيت داۋلەتباەۆ, احمەت ەلشىبەكوۆ, مەرعالي ەشمۇحامبەتوۆ, ءابىل ءىلياسوۆ, شياپ قوجاحمەتوۆ.
وسىنداعى تۇلعالاردىڭ ءومىر-تاريحى جايلى از-كەم تولعار بولساق, جۋرناليستىك جولىن 1920 جىلى «ۇشقىن» گازەتىندە رەداكتسيا القاسىنىڭ مۇشەسى بولىپ باستاعان احمەتسافا ءجۇسىپ ۇلى (يۋسۋپوۆ) 1931 جىلى اتالسا, رەداكتور ع.توعجانوۆ, م.دۋلاتوۆ, ب.مايلين, ءا.ايسارين, ءى.احمەتوۆ, م.داۋلەتباەۆ باستاعان قالامگەرلەر 1937-1938 جىلعى قاندى قاساپتىڭ قۇربانى بولىپتى. ءتىرى قالعان امانعالي سەگىزباەۆ سياقتى ءبىرلى-جارىم ازاماتتار سوعىستان قايتپاعان كورىنەدى.
