رۋحانيات • 20 قاراشا، 2019

دومبىرادان تەگىن ءدارىس بەرىپ ءجۇر

23 رەتكورسەتىلدى

«جاس كەلسە – ىسكە» دەيدى دانا قازاق. جاستىق جىگەرىن بويىنا جيىپ، ەل يگىلىگىنە قىزمەت ەتۋگە كەلگەن جالىندى جاستارىمىز از ەمەس. سونداي جاستارىمىزدىڭ قاتارىندا نۇرلىبەك قايىرجانوۆ تا بار.

نۇرلىبەك اۋدانىمىزعا 2016 جى­لى كەلگەن جاس مامان. ءوزى اقبۇلاق اۋىلىنىڭ تۋماسى. اۋىلداعى ون ءبىر جىلدىق مەكتەپتى ءتامامداپ، 2012 جىلى م.وتەمىسوۆ اتىنداعى باتىس قازاقستان مەملەكەتتىك ۋنيۆەرسيتەتىنە «مادەنيەت جانە ونەر» فاكۋلتەتىنە وقۋعا ءتۇسىپ، ونى مۋزىكالىق ءبىلىم ماماندىعى بويىنشا اياقتايدى. سودان اۋدان ورتالىعىنداعى «بالالار ساز مەكتەبىنە» دومبىرا سى­نىبىنىڭ مۇعالىمى بولىپ قىزمەتكە ورنالاسادى. قولى قالت ەتە قالسا تۋعان اۋى­لىنا بارىپ، سونداعى وقۋشى بالالارعا دومبىرادان تەگىن ساباق بەرەدى ەكەن.

«اۋىلدا ونەرگە قۇشتار ورەندەر وتە كوپ. جانىپ تۇرعان جاستار دا جەتەرلىك. بۇگىندە اۋىلداعى تۇرعىنداردىڭ كوپ­شىلىگى قالاعا نەمەسە اۋدان ورتالىعىنا كو­شىپ، قونىس اۋدارۋدا. بۇل، ارينە قۋا­نار­لىق جاعداي ەمەس. دەسە دە، سول الاقانداي اۋىلدا قوڭىرقاي تىرلىك كەشىپ وتىرعان حالىق­تىڭ اراسىندا ونەرگە اۋەس، ءتۇرلى سپورتقا جاقىن جاستار تابىلادى. «ناعىز تالانتتار اۋىلدا» دەپ ەل اراسىندا ايتىلىپ جۇرگەن تىركەس ءالى دە ءوزىنىڭ ساپاسىن جويماعان ءتارىزدى. مىنە، وسىنداي كوپ­تىڭ كولەڭكەسىندە، تالايدىڭ تاساسىندا جۇر­گەن جاس ونەرپازداردى انىقتاپ، ولارعا قازاق­تىڭ ءتول ونەرىن دارىپتەۋ ماقساتىندا اۋىل­داعى وقۋشى بالالارعا دومبىرا ۇيرەتۋدى قولعا الدىم»، دەيدى نۇرلىبەك ەمەن-جارقىن اڭگىمەسىنىڭ «القيسساسىن» باستاپ.

«جۇمىس كۇندەرى مۇمكىندىك بولماعان سوڭ ءدارىس-ساباقتى سەنبى، جەكسەنبى كۇندەرى وتكىزەمىن. ساباقتان تىس وقۋشىلاردىڭ دەمالىس كۇندەرى بولعاندىقتان كوپ ەشكىم كەلە قويماس دەگەن دە وي بولعان باسىندا. باستاپقىدا ساناۋلى وقۋشىلار عانا كەلىپ جۇرگەنىمەن، كەيىننەن قىزىعۋشىلىق تانىتقان وقۋشىلار كوپتەپ جينالا باس­تادى. اقىرىندا ەلۋ ەكىگە جۋىق وقۋشى جينالدى. ارقايسىنىڭ اسپاپتى ويناپ ۇيرەنۋگە دەگەن ىقىلاسى ەرەكشە»، دەپ كەيىپكەرىمىز ءوز ويىن ءارى قاراي ساباقتادى.

«ارينە وقۋشى تۇرماق، ەرەسەك ادامعا ء«اۋ» دەگەننەن دومبىرانى مەڭگەرتۋ وڭاي­عا سوقپايدى. دەگەنمەن مۋزىكا مەك­تەپتەرىندە بالانىڭ تىڭداۋ ەپتىلىگىنە (سلۋح) ۇلكەن كوڭىل بولەمىز. مەن دە اۋىلداعى وقۋشىلارىما دومبىرانى نو­تامەن ەمەس، كوزبە-كوز قاراپ، قايتالاۋ داعدىسى بويىنشا جانە دومبىرانى ساندىق ادىسپەن ويناۋ ادىستەرى بويىنشا ۇيرەتىپ وتىردىم. ناتيجەسى جامان بولعان جوق»، دەپ جاۋاپ بەردى.

«نۇرلىبەك اعاي بىزگە دومبىرا اسپابىندا ويناۋدى عانا ۇيرەتكەن جوق، بىرنەشە كۇيدىڭ شىعۋ تاريحىمەن، مۋزى­كانىڭ اتاقتى تۇلعالارىمەن دە تانىس­تىردى. اعايدىڭ ۇيىرمەسىنە قاتىسا ءجۇرىپ مەن دومبىرا اسپابىندا وينالاتىن شاعىن ەتيۋدتاردى، مۋزىكالىق شىعارمالاردى  ۇيرەندىم. ۇلتتىق دوم­بىرامىزدىڭ قۇرىلىسى تۋرالى كەڭى­­نەن ءبىلدىم. ماعان وتە ۇنادى»، دەي­دى نۇرلىبەكتىڭ اۋىلداعى كىشكەنتاي شاكىر­تى ابىلاي كالەنوۆ.

«مەن وسى وقۋ جىلىندا دا اۋىلىم­داعى وقۋشىلارىما دومبىرادا ويناۋدى ۇيرەتۋدى جالعاستىرسام با دەپ وتىرمىن. بولاشاقتا سول اۋىلداعى شاكىرتتەرىمنەن شاعىن وركەستر قۇرىپ نەمەسە جەكە ورىنداۋشىلىقتا جاس ونەرپازداردى ساحناعا شىعارىپ، اۋىلدا دا وسىنداي ونەرپاز بالالاردىڭ بار ەكەندىگىن وزگە دە جەرلەستەرىمىزگە تانىتسام با دەگەن ارمانىم بار. ءار ادام ءوزىنىڭ تۋعان جەرىنە، اۋى­لىنا قولىنان كەلگەنىنشە قىزمەت ەتىپ، ءوڭىرىنىڭ وركەندەۋىنە كىشكەنە بولسىن ۇلەسىن قوسۋى قاجەت دەپ ويلايمىن. بۇل ءار پەرزەنتتىڭ بورىشى عوي»،  دەيدى نۇر­لى­بەك اڭگىمەسىن قورىتىندىلاي وتىرىپ.

 

سامات بايبولات

 

سوڭعى جاڭالىقتار

التىن وردانىڭ اق تاڭى

رۋحانيات • كەشە

كۇلكى كەرۋەنى № 23

رۋحانيات • كەشە

جاڭعىرعان جامبىل ءوڭىرى

ايماقتار • كەشە

رۋحاني راۋىشتەگى تارتۋ

ايماقتار • كەشە

ۇقساس جاڭالىقتار