قالانى دامىتۋ قۇجاتى دايىن

ايماقتار • 19 قاراشا، 2019

قالانى دامىتۋ قۇجاتى دايىن

31 رەت كورسەتىلدى

ەكونوميكالىق الەۋەتى، ءومىر ءسۇرۋ ساپاسى جاعىنان الماتى عالامداعى ءجۇز قالانىڭ قاتارىنا ەنەدى. وسىنداي ۇزاق مەرزىمدى ستراتەگيانى جوسپارلاپ وتىرعان قالا باسشىلىعى كەلەشەكتە وڭتۇستىك استانا حالقىنىڭ 5 ميلليونعا جەتەتىنىن مەجەلەپ وتىر. بۇگىندە قالا اۋماعى تۇرعىندارىن قوسقاندا حالىق سانى 3 ميلليوننان اسادى. ورتالىق ازيادا قارقىنمەن دامىپ كەلە جاتقان مەگاپوليستەر قاتارىندا تۇرعان الماتى 600 قالامەن بىرگە الەمدىك ءىجو-ءنىڭ 60 پايىزىن قۇرايدى.

ەلۆيرا سەرىكقىزى

الاتاۋ اياسىنداعى اسەم شاھاردىڭ بۇگىنگى دامۋ قارقىنى مەن تاياۋ بولاشاعىنا قاتىستى ناقتى تاپسىرمالار بەرگەن اكىم ب.ساعىنتاەۆ قالانى جاقسى ءومىر ءسۇرۋ ساپاسىنىڭ ستاندارتتارىنا سايكەستەندىرۋدە كوپتەگەن جۇمىستار قولعا الىنۋىن ءجىتى نازاردا ۇستاپ وتىر. ەكولوگيانى جاقسارتۋ، قاۋىپسىزدىكتى كۇشەيتۋ، الەۋمەتتىك، ينجەنەرلىك، كولىك جۇيەلەرىن جەتىلدىرۋ ۋاقىت كۇتتىرمەيدى. حالىق سانىنىڭ وسۋىنە بايلانىستى ينفراقۇرىلىمعا تۇسەتىن جۇكتەمە بارلىق دامۋشى قالالارعا ءتان ءۇردىس دەيتىن بولساق، الماتىعا دا الەمدىك مەگاپوليستەر سياقتى ۋربانيزاتسيا داعدارىسى ءتونىپ تۇر. قالاعا جۇمىس ىزدەپ، ءبىلىم الۋدى ءارى قالادا تۇراقتاپ قالۋدى ماقسات ەتكەن كەلۋشىلەر سانى جىل سايىن ارتىپ كەلەدى.

سوندىقتان دا قالا اكىمى اتاپ وتكەندەي، الماتى اگلومەراتسياسى اۋقىمىنداعى شەشىمدەر ءۇشىن پرواكتيۆتى جوسپارلاۋ جانە جوبالاۋ، سمارت-تاسىلدەر اسا قاجەت. جاڭا جۇمىس ورىندارىن اشۋ، الەۋمەتتىك ينفراقۇرىلىمدى دامىتۋ دا قالا جوسپارىنىڭ ماڭىزدى بولىگى.

الماتىنى دامىتۋدىڭ ۇزاق مەرزىمدى ستراتەگياسىنىڭ جوباسى قازىرگى كەزدە ساراپشىلار جانە قالىڭ جۇرتشىلىقتىڭ قاتىسۋىمەن ازىرلەنۋدە. كۇنى كەشە قوعامدىق كەڭەستىڭ مۇشەلەرى جانە ساراپشىلار قۇرامىمەن كەزدەسكەن قالا اكىمىنىڭ ورىنباسارى ە.باباقۇماروۆ اكىم تاپسىرماسىنا وراي «الماتى-2050» ستراتەگياسىنىڭ جوباسىن تالقىلاپ، قالا دامۋىنىڭ باستى باسىمدىقتارىن قامتيتىن نەگىزگى قۇجاتتا ۇزاق مەرزىمدى ماقساتتاردى انىقتاۋدا بىرلەسكەن كۇش-جىگەر قاجەت ەكەنىن اتاپ ءوتتى. قالا دامۋىنىڭ باستى باسىمدىقتارىن قامتيتىن نەگىزگى قۇجاتتى جەتىلدىرۋدە وڭتايلى شەشىمدەر اسا قاجەت.

جيىندا قالانىڭ قوعامدىق كەڭەسىنىڭ ساراپشىلارى مەن وكىلدەرى جاھاندىق جانە وڭىرلىك باسەكەلەستىك، ينفراقۇرىلىم مەن كولىك، قوعامدىق قاۋىپسىزدىك، دەنساۋلىق ساقتاۋ مەن ەكولوگيا، ادامي كاپيتالدى دامىتۋ سياقتى ستراتەگيالىق دامۋ باعىتتارى بويىنشا پىكىر الماستى.

قوعامدىق كەڭەس جيىنىندا ساياساتتانۋشى ا.سارىم، Kazakhstan Growth Forum ۇيىمداستىرۋ كوميتەتىنىڭ توراعاسى ە.ابدىرازاقوۆ، قارجىگەر جانە كاسىبي ەنەرگەتيك ءا.ناۋرىزباەۆ، قوعام بەلسەندىسى ە.نۇرپەيىسوۆ، مونيتورينگ جونىندەگى مامان م.ايتجانوۆا، حالىقتى قونىستاندىرۋ سالاسىنداعى ساراپشى ا.ءالجانوۆا، كولىك ينفراقۇرىلىمىن دامىتۋ سالاسىنداعى ساراپشى ە.ەرزاكوۆيچ، ەكولوگيا جونىندەگى كونسۋلتانت ج.تاكەنوۆ، «قوعامدىق ماسەلەلەردى تالداۋ ورتالىعى» قق ديرەكتورى م.ماحمۋتوۆا، ماماندىق تاڭداۋ ورتالىعىنىڭ باسشىسى ج.كارىموۆ، قوعامدىق كەڭەس مۇشەسى ب.كيسيكوۆ، ساياساتتانۋشى ءارى تاۋەكەلدەردى باعالاۋ توبىنىڭ ديرەكتورى د.ساتپاەۆ، ساراپشى ت. پوچانوۆ ءوز ۇسىنىستارىمەن ءبولىستى.

ساراپشىلار مەن الماتىلىقتاردان كەلىپ تۇسكەن ۇسىنىستار جۇمىس توبىنىڭ وتىرىستارىندا قارالىپ، قوعام جانە ىسكەرلىك كەڭەستەردىڭ تالقىسىنا ۇسىنىلاتىن بولادى.