وسى كۇنى مال ءوسىرىپ, جۇرت قاتارلى قاراپايىم عانا تىرشىلىك ەتىپ جاتقان بۇل اۋلەتكە ەرەكشە قۇرمەت كورسەتىلدى. بۇل ۇلىقتاۋدىڭ ءجونى بولەك. سالتاناتتى شاراعا پەداگوگيكالىق قۇرام, مەكتەپ وقۋشىلارى, اكىمدىك, پوليتسيا, توتەنشە جاعدايلار بولىمدەرىنىڭ قىزمەتكەرلەرى, قوعامدىق ۇيىم وكىلدەرى قاتىسىپ, ۆلاديمير مەن تاتيانانى ورتاعا شاقىردى. ولاردىڭ ەرلىگىنەن ءاپ-ساتتە قۇلاقتانىپ قالعان جەرلەستەرى ورىندارىنان تۇرىپ, دۋىلداتا قول سوقتى. بۇل ەكەۋى ءدال وسىلاي قوشەمەت بولارىن كۇتپەگەن بىلەم, قىزاراقتاپ, وزدەرىن جايسىز سەزىندى. اۋىلدىق وكرۋگتىڭ اكىمى ۆيكتور ميششەنكو العاشقى ءسوزدى اۋداندىق توتەنشە جاعدايلار ءبولىمىنىڭ باسشىسى امير بەكچەنتاەۆقا بەردى. ازاماتتىق قورعاۋ پولكوۆنيگى وقىس وقيعا كەزىندە باتىلدىق پەن قايسارلىقتىڭ ۇلگىسىن كورسەتكەنى ءۇشىن ۆوروبەۆتار وتباسىنا زور العىسىن ايتىپ, العىس حات پەن باعالى سىيلىق تابىس ەتتى. ايدىڭ-كۇننىڭ امانىندا ءبىر اۋلەتتى قارا جامىلدىرا جازداعان جايسىز جاعدايدىڭ قالاي بولعانىن ەگجەي-تەگجەيلى بايانداپ بەردى.
سويتسە, ەلدى مەكەن شەتىندە تۇراتىن ۆلاديمير مال جايلاپ جۇرگەندە كەشكى تىنىشتىقتى قاق جارعان اششى ايعايدى ەستيدى. جۇرەگى الدەبىر سۇمدىقتى سەزگەندەي داۋىس شىققان جاققا قاراي بار ەكپىنىمەن جۇگىرە جونەلەدى. دوڭنەن كوتەرىلىپ, ەڭىسكە قاراي ىلديلاعاندا ءارلى-بەرلى قول سەرمەپ, جانى ىشقىنعان كورشىنىڭ قىزىن كورەدى. ءوزى جۇپ-جۇقا مۇزدىڭ ۇستىندە تۇر, ت ۇلىمشاعى جەلبىرەگەن ونىڭ زار ەڭىرەگەننەن باسقا قولىنان كەلەر دارمەنى جوق. ادامداردى كومەككە شاقىرايىن دەسە, جاس ءسابيدىڭ ەڭبەگىندەي بىلقىلداپ تۇرعان مۇز ويىلىپ كەتىپ, ءولىم مەن ءومىر اراسىندا ارپالىسقان ەكى باۋىرىن قيمايدى. بالدىرعاندار قۇتقارشى دەگەندەي بۇعان جالىنا, جالبارىنا قارايدى. ويناپ ءجۇرىپ كول جاعاسىنان اۋدەم جەر ۇزاپ كەتكەندە ءالى قاتا قويماعان جۇقا مۇز شىتىناپ كەتكەن ءتارىزدى. ۆلاديمير بىردەن مۇزداي سۋعا قويىپ كەتتى. ەسىل-دەرتى – پەرىشتە قانات بالاقانداردى قۇتقارۋ. قاس-قاعىم ءسات! ەندى ءسال كەشىككەندە لەنيا مەن جەنيانى قارا سۋ جۇتىپ قويۋى كادىك ەدى. ءۇي شارۋاسىمەن اينالىسىپ جۇرگەن تانيا دا قوس وكپەسىن قولىنا العان كۇيى وسى جاققا قۇستاي ۇشقان. ولار سۋ ىشىندە ابدەن توڭىپ, قورىققاننان قالتىراپ, كوپكە دەيىن ءوز-وزدەرىنە كەلە الماعان بالالارعا بىلگەندەرىنشە مەديتسينالىق كومەك كورسەتىپ, حالىقتىق ەم قولدانعان. وسى كەزدە العاشقى دارىگەرلىك كومەك تە كەلىپ جەتكەن.
جۋرناليستەردىڭ قيىن-قىستاۋ ساتتە قانداي سەزىمدە بولدىڭىز دەگەن جاتتاندى سۇراعىنا بەيبىت كۇننىڭ باتىرى «مەنىڭ جەلكىلدەپ ءوسىپ كەلە جاتقان ءۇش بالام بار. سولار كوز الدىما ەلەستەدى. ولار الدەبىر قاتەرگە كەزىكسە نە بولار ەدى دەگەن سۋىق وي سۇر جىلانداي سۋماڭداپ ءوتتى. ونىڭ ۇستىنە قوس بالاقايدى دا, ولاردىڭ اتا-انالارىن دا جاقسى تانيمىن. وسى سەبەپتى قايتسەم دە قۇتقارۋعا ءتيىسپىن دەپ شەشتىم. مەنىڭ ورنىمدا كەز كەلگەن اۋىلداسىم بولسا, كوزسىز تاۋەكەلگە بەل بۋارى كادىك», دەپ جاۋاپ بەردى.
مەكتەپ ديرەكتورىنىڭ مىندەتىن اتقارۋشى لاريسا اندريۋحينا شاكىرتى ۆولوديانىڭ جاقسى قىرلارىن, كوپشىل, قوعامشىل مىنەزدەرىن اتاپ ءوتتى. جەكە كاسىپكەر الەكساندر بوگدانوۆ وتباسىنا ميكروتولقىندى پەش تارتۋ ەتتى. ۋچاسكەلىك پوليتسيا ينسپەكتورى الەكساندر روگاچەۆ قىسىلتاياڭ ۋاقىتتاعى ولاردىڭ باتىل ءىس-ارەكەتتەرىن جاس بۋىنعا ۇلگى ەتىپ, قاۋىپ-قاتەرلەردەن ساقتانىپ جۇرۋگە شاقىردى.
كوپشىلىكتىڭ ءبىراۋىزدى قولداۋىمەن ەرلى-زايىپتى ۆوروبەۆتار ىشكى ىستەر مينيسترلىگىنىڭ ماراپاتىنا ۇسىنىلىپ وتىر.
سولتۇستىك قازاقستان وبلىسى,
مامليۋت اۋدانى
