پرەزيدەنت • 14 قاراشا، 2019

مەملەكەت باسشىسى اقمولا وبلىسىن دامىتۋ جونىندە كەڭەس وتكىزدى

22 رەتكورسەتىلدى

پرەزيدەنتتىڭ كوكشەتاۋ قالاسىنا جۇمىس ساپارى اقمولا وبلىسىن دامىتۋ جونىندە كەڭەس وتكىزۋمەن باستالدى. بۇل تۋرالى اقوردانىڭ ءباسپاسوز قىزمەتى حابارلادى.

قاسىم-جومارت توقاەۆ ۇكىمەت مۇشەلەرى مەن وبلىس اكتيۆىنىڭ الدىندا سويلەگەن سوزىندە قازاقستاننىڭ تۇڭعىش پرەزيدەنتى – ەلباسى نۇرسۇلتان ءابىش ۇلى نازارباەۆتىڭ تاريحي ەڭبەگىن اتاپ ءوتىپ، كورەگەن كوشباسشىلىعىنىڭ ارقاسىندا ەلىمىز الەۋمەتتىك-ەكونوميكالىق دامۋدا، سونداي-اق حالىقارالىق ارەناداعى ءوز ورنىن نىعايتۋدا ەلەۋلى تابىستارعا قول جەتكىزگەنىن اتاپ ءوتتى.

–ۇكىمەتتىڭ، پارلامەنت دەپۋتاتتارىنىڭ، وبلىس اكىمدەرىنىڭ مىندەتى – ەلباسىنىڭ ۇزاق مەرزىمدى ستراتەگياسىن، ۇلت جوسپارىن جانە بەس ينستيتۋتسيونالدىق رەفورمانى ىسكە اسىرۋعا بارلىق كۇش-جىگەرىن جۇمساۋ، دەدى مەملەكەت باسشىسى.

پرەزيدەنت جاڭا مەملەكەتتىك يندۋستريالىق-يننوۆاتسيالىق باعدارلامانى ساپالى جۇزەگە اسىرۋدىڭ ماڭىزدىلىعىنا نازار اۋدارىپ، الدىڭعى باعدارلامالاردا كەتكەن كەمشىلىكتەردى ەسكەرۋ كەرەكتىگىن تاپسىردى. قاسىم-جومارت توقاەۆ جوسپارلاردى ىسكە اسىرۋ ءۇشىن جالاڭ ەسەپ ەمەس، سالماقتى تالداۋ، ءتيىمدى ءىس-ارەكەتتەر قاجەت دەپ سانايدى.

–مەملەكەت باسشىسى رەتىندە، حالىقتىڭ ماڭىزدى تالاپ-تىلەكتەرىن قاناعاتتاندىرۋعا ارنالعان ءتيىمدى جۇمىس كۇتەمىن، دەدى قاسىم-جومارت توقاەۆ.

قازاقستان پرەزيدەنتى اقمولا وبلىسىنىڭ دامۋى تۋرالى ايتا كەلىپ، ءوڭىردىڭ اۋىل شارۋاشىلىعى، يندۋستريالىق-يننوۆاتسيالىق ساياسات، ماشينا جاساۋ، ءتۇرلى-ءتۇستى مەتاللۋرگيا، قۇرىلىس جانە قۇس شارۋاشىلىعى سالالارىندا وڭ وزگەرىستەر بار ەكەنىنە توقتالدى.

مەملەكەت باسشىسى وبلىس ەكونوميكاسىنداعى ونەركاسىپ ءوندىرىسىنىڭ ۇلەسى ارتقانىنا قاراماستان، ءوڭىردىڭ رەسپۋبليكا كولەمىندەگى ۇلەس سالماعى 2،5 پايىزدان اسپاي وتىرعانىن ايتتى.

قاسىم-جومارت توقاەۆ ماسال كەن ورنىنداعى تاۋ-كەن مەتاللۋرگيا كەشەنىن تاۋ-كەن مەتاللۋرگيا ونەركاسىبىن دامىتۋ جونىندەگى كەشەندى جوسپاردان جانە رەسپۋبليكالىق يندۋستريالاندىرۋدىڭ كارتاسىنان الىپ تاستاۋ ماسەلەسىنە نازار اۋداردى. جوبا كەن وندىرۋدەن باستاپ بولات پروكاتىن شىعارۋعا دەيىنگى تەحنولوگيالىق جەلىنى قۇراپ، 1 ميلليون تونناعا دەيىن ءونىم ءوندىرۋدى كوزدەگەن بولاتىن. پرەزيدەنتتىڭ ايتۋىنشا، بۇل كەشەن جارقايىڭ جانە ەسىل اۋداندارىنىڭ تۇرعىندارىن جۇمىسپەن قامتاماسىز ەتىپ، وبلىس ەكونوميكاسىنىڭ وسۋىنە سەپتىگىن تيگىزگەن بولار ەدى.

وسىعان بايلانىستى مەملەكەت باسشىسى ۇكىمەتكە «سامۇرىق-قازىنا» قورىمەن بىرلەسىپ، اتالعان جوبا بويىنشا ناقتى شەشىمگە كەلىپ، ءتيىستى شارالار قابىلداۋدى تاپسىردى.

پرەزيدەنت ەڭبەك ونىمدىلىگىن ارتتىرۋ، ونىڭ ىشىندە، اۋىل شارۋاشىلىعى – ءوڭىر ەكونوميكاسىن وركەندەتۋدىڭ باستى فاكتورى ەكەنىنە توقتالدى.

–سوڭعى ءۇش جىلدا اقمولا وبلىسىندا سۋارمالى جەرلەردىڭ كولەمى 7،5 ەسەگە ارتىپ، 24 مىڭ گەكتاردان استى. بۇل – ونىمدىلىكتى ارتتىرۋعا تىكەلەي اسەر ەتەتىن جاقسى كورسەتكىش. وسىنداي جۇمىستى جالعاستىرا بەرۋ قاجەت، دەدى قاسىم-جومارت توقاەۆ.

سونىمەن قاتار مەملەكەت باسشىسى ەلىمىزدىڭ ءۇش ءىرى استىق وسىرەتىن وبلىسىندا اۋىل شارۋاشىلىعى بويىنشا ەڭبەك ونىمدىلىگى تومەن ەكەنىن، ولاردىڭ ۇلەسى 5 مىڭنان 8 مىڭ دوللارعا دەيىن عانا جەتەتىنىن ايتتى.

–رەسەيدە بۇل كورسەتكىش 17 مىڭ دوللار، ال دامىعان ەلدەردە 80-90 مىڭ دوللارعا دەيىن جەتەدى، دەدى پرەزيدەنت.

قاسىم-جومارت توقاەۆ اۋىل شارۋاشىلىعى مينيسترلىگىنە اگرارلىق وڭىرلەردىڭ اكىمدىكتەرىمەن بىرلەسىپ، اگروونەركاسىپ كەشەنىندەگى ەڭبەك ونىمدىلىگىن ۇلعايتۋ ءۇشىن جەتەكشى وتاندىق ازىرلەمەلەر ەنگىزە وتىرىپ، ناقتى شارالار قابىلداۋدى تاپسىردى.

–اۋىل شارۋاشىلىعى جاڭا تەحنولوگيالاردى قولدانۋ، اۆتوماتتاندىرۋ جانە تسيفرلاندىرۋ ارقىلى دامۋدا تىڭ سەرپىن الۋى ءتيىس. ەگىس القاپتارىن ۇلعايتۋ ءۇشىن ىلعال جانە رەسۋرس ۇنەمدەيتىن تەحنولوگيالاردى ەنگىزۋ جونىندەگى جۇمىستاردى ودان ءارى جالعاستىرۋ قاجەت، دەدى پرەزيدەنت.

مەملەكەت باسشىسى ەگىستىك القاپتارىن يگەرۋمەن اينالىسپايتىن لاتيفۋنديستەردەن جەردى قايتارىپ الۋ جونىندەگى تاپسىرماسىنا توقتالدى.

–مەنىڭ تاپسىرمام وتە باياۋ ورىندالىپ جاتىر. بۇدان تاپسىرمانىڭ ورىندالۋىن ادەيى سوزىپ وتىر دەگەن وي تۋادى. مۇنداي جاعدايدا قولداناتىن شارالار سيممەتريالى بولادى. ىقىلاسسىز ورىنداۋشىلارعا وڭاي تيمەيدى، دەپ ەسكەرتتى قاسىم-جومارت توقاەۆ. 

كەڭەس بارىسىندا مەملەكەت باسشىسى تۋريزم سالاسىنداعى شاعىن جانە ورتا بيزنەستى دامىتۋ ماسەلەسىنە توقتالدى. ول بيزنەس جۇرگىزۋگە جاسالاتىن جەڭىلدىك بويىنشا وبلىستىڭ ارتتا قالعانىنا، جۇمىسپەن قامتىلعاندار مەن شاعىن جانە ورتا بيزنەس كاسىپورىندارىنىڭ ءونىم ءوندىرىسى تومەن ەكەنىنە نازار اۋداردى.

قاسىم-جومارت توقاەۆ «قاراپايىم زاتتار ەكونوميكاسى» جوبالارىنا كاسىپكەرلەردى بەلسەندى تۇردە جۇمىلدىرۋ كەرەك دەپ ەسەپتەيدى.

–مىسالى، بۇل باعىتتا ونەركاسىپ، اۋىل شارۋاشىلىعى، قىزمەت كورسەتۋ سالالارىنىڭ مۇمكىندىكتەرى مول. شاعىن جانە ورتا بيزنەستىڭ الەۋەتىن ەلوردانىڭ ازىق-ت ۇلىك بەلدەۋىن قامتاماسىز ەتۋ ءۇشىن پايدالانعان ءجون، دەدى مەملەكەت باسشىسى.

ءوڭىردىڭ تابيعي دەمالىس ورىندارى مەن مادەني مۇرا نىساندارى جايىندا ايتقان پرەزيدەنت تۋريستىك الەۋەتتىڭ ءالى دە تولىق پايدالانىلماي جاتقانىنا توقتالدى. قاسىم-جومارت توقاەۆ  تۋريزم سالاسى ايماقتىڭ جالپى ءونىمىنىڭ 0،5 پايىزىن عانا قۇراپ وتىرعانىن باسا ايتىپ، ءتۋريزمدى دامىتۋعا ارنالعان مەملەكەتتىك باعدارلاما بويىنشا 2025 جىلى ەلىمىزدە اتالعان كورسەتكىشتى 8 پايىزعا جەتكىزۋ تاپسىرىلعانىن اتاپ ءوتتى. 

–ۇكىمەتكە وبلىس اكىمدىگىمەن بىرلەسىپ، ششۋچە-بۋراباي كۋرورتتىق ايماعىن دامىتۋ جوسپارىنىڭ ءۇشىنشى كەزەڭى شەڭبەرىندە قولعا الىنعان ينفراقۇرىلىمدىق جوبالاردى اياقتاۋدى تاپسىرامىن. قازاقستاننىڭ تۋريزم كارتاسىندا زەرەندى دەمالىس ايماعى دا بار. اتالعان ايماقتى ەكولوگيالىق جانە بالالار تۋريزم سالاسىنا بەيىمدەۋگە بولادى، دەدى قازاقستان پرەزيدەنتى.

مەملەكەت باسشىسى جول بويى سەرۆيسىنىڭ ساپاسى مەن قىزمەت كورسەتۋ دەڭگەيىنىڭ تومەندىگىن سىنعا الىپ، ونى ءتيىمدى دامىتۋدىڭ جولدارىن قاراستىرۋدى تاپسىردى.

قاسىم-جومارت توقاەۆ باعانىڭ كوتەرىلۋىنە جول بەرمەۋدى، اسىرەسە الەۋمەتتىك ماڭىزى بار تاۋارلاردى قىمباتتاتپاۋدى ەسكەرتتى. 

–جىل باسىنان بەرى الەۋمەتتىك ماڭىزى بار تاۋارلاردىڭ باعاسى قىمباتتاپ، ينفلياتسيانىڭ الدىنا ءتۇسىپ كەتتى. كەي جاعدايلاردا ەكى ەسەگە دەيىن جەتكەن. ينفلياتسيانىڭ جالپى دەڭگەيى 5،3 پايىز، ال باعا 9 پايىزدان اسىپ كەتتى، دەدى پرەزيدەنت.

قاسىم-جومارت توقاەۆ وبلىستىڭ سوڭعى ەكى جىلداعى تۇرعىن ءۇي قۇرىلىسىنىڭ قارقىنىنا (900 مىڭ شارشى مەتر) وڭ باعا بەرىپ، جەرگىلىكتى جولدار مەن كوشە-جول جۇيەسىنىڭ 880 شاقىرىمى جاقسارعانىن ايتتى. سونىمەن قاتار شەشىلمەگەن بىرقاتار ينفراقۇرىلىمدىق ماسەلەلەرگە، ونىڭ ىشىندە سارىارقا ماگيسترالدى گاز قۇبىرى بويىنا سالىناتىن گاز تاراتۋ جەلىسىنىڭ قۇرىلىسىنا نازار اۋداردى.

–ۇكىمەتكە وبلىس اكىمدىگىمەن بىرلەسىپ، 2020-2021 جىلدارى ارشالى جانە تسەلينوگراد اۋداندارىندا گاز تاراتۋ جەلىسىن سالۋدى تاپسىرامىن، دەدى پرەزيدەنت.

قاسىم-جومارت توقاەۆ ينفراقۇرىلىمدى دامىتۋ جونىندەگى مىندەتتەرگە توقتالىپ، ۇكىمەتكە حالىقارالىق قارجى ينستيتۋتتارىنان نەسيە تارتا وتىرىپ، اقمولا وبلىسىندا جەو سالۋ مۇمكىندىگىن قاراستىرۋدى تاپسىردى.

–بۇل شامامەن 200 ميلليون دوللاردى قۇرايدى. كوپ قارجى ەمەس. قاراستىرىپ، ۇسىنىس بەرىڭىزدەر. ءبىز كوكشەتاۋ قالاسىندا مىندەتتى تۇردە جەو سالۋىمىز كەرەك، دەدى پرەزيدەنت.

مەملەكەت باسشىسى وبلىستىڭ اگلومەراتسيالىق ايماعىنىڭ ينفراقۇرىلىمىنا قاتىستى ماسەلەلەردى تەزدەتىپ شەشۋ جايىندا ايتىپ، قوسشى اۋىلىن مىسالعا كەلتىردى. 

–قوسشى اۋىلىنداعى حالىقتىڭ سانىنا قاتىستى ءۇش ءتۇرلى دەرەك بار: ناقتى ەسەپ بويىنشا 52،5 مىڭ حالىق تۇرادى; ءۇي شارۋاشىلىعىنىڭ تىركەۋ داپتەرىندەگى تۇرعىندار سانى – 34 مىڭ; كوشى-قون قىزمەتى رەسمي تۇردە 16،5 مىڭ ادامدى تىركەگەن. بۇل قاي تۇرعىدان الساڭىز دا قاۋىپتى جاعداي. جاقىندا حالىق ساناعى بولادى. تۇرعىنداردىڭ سانى مەن ولاردىڭ ءومىر ساپاسى جايىندا ناقتى ءبىلۋىمىز كەرەك، دەدى قاسىم-جومارت توقاەۆ.

پرەزيدەنت ايماقتى دامىتۋدا كەشەندى باسقارۋ تاسىلىنە كوشۋ قاجەتتىگىن اتاپ ءوتىپ، حالقىمىزدىڭ تۇرمىس ساپاسىن ارتتىرۋ باستى ماقسات ەكەنىن جەتكىزدى.

–ول ءۇشىن نۇر-سۇلتان قالاسى مەن اقمولا وبلىسى اكىمدىكتەرىنىڭ اراسىنداعى جۇمىستاردىڭ ءوزارا ۇيلەسىمدىلىگىن جانداندىرۋ كەرەك، دەدى مەملەكەت باسشىسى.

ءسوزىنىڭ سوڭىندا قاسىم-جومارت توقاەۆ ۇكىمەت پەن وبلىس اكىمدىگىنە 2020 جىلى كوكشەتاۋ قالاسىندا وتەتىن قازاقستان مەن رەسەيدىڭ وڭىرارالىق ىنتىماقتاستىق فورۋمىن وتكىزۋگە تولىق دايىن بولۋ ءۇشىن بىرقاتار تاپسىرما بەردى.

سوڭعى جاڭالىقتار

كۇلكى كەرۋەنى № 24

رۋحانيات • بۇگىن، 11:08

رەيتينگتە جوعارىلادى

كاسىپقوي بوكس • بۇگىن، 07:22

«التىن ساقا» ۇزدىكتەرى انىقتالدى

ۇلتتىق سپورت • بۇگىن، 07:15

قازاق ءانى نيۋ-يوركتە شىرقالدى

رۋحانيات • بۇگىن، 07:09

جاقسىلىققا تولى جاستار جىلى

قوعام • بۇگىن، 07:04

شاپاعاتتى جول

رۋحانيات • بۇگىن، 06:59

«قايىربولاتتى قايتارىڭدار!»

ايماقتار • بۇگىن، 06:56

ۆولونتەرلەر باس قوستى

قوعام • بۇگىن، 06:47

ستيپەنديا كوتەرىلەدى

قوعام • بۇگىن، 06:43

ناقتى تاپسىرمالار بەردى

پرەزيدەنت • بۇگىن، 06:27

التىن وردانىڭ اق تاڭى

رۋحانيات • كەشە

ۇقساس جاڭالىقتار