«قۇرمەتتى قاۋىم! بۇگىن وزدەرىڭىزبەن كوكشە تورىندە جۇزدەسىپ وتىرمىز. ارقانىڭ ايرىقشا سۇلۋ ايماعى – بۇكىل ەلىمىزدىڭ مەرەيى ءارى ماقتانىشى. بۇل – تاريحى تەرەڭ, تابيعاتى عاجايىپ كيەلى ولكە. تۇعىرى بيىك تۇلعالار شىققان قاستەرلى ءوڭىر. ەلوردانى اينالا قورشاپ جاتقان اقمولانىڭ ستراتەگيالىق ماڭىزى جوعارى. وسى جەردىڭ تۇرعىندارى ەل ەكونوميكاسىن وركەندەتۋگە ەلەۋلى ۇلەس قوسىپ كەلەدى. سوندىقتان وبلىستىڭ بۇگىنگى تىنىس-تىرشىلىگىمەن قاتار, دامۋ كەلەشەگى – ەلىمىز ءۇشىن وتە ماڭىزدى مىندەتتەردىڭ قاتارىندا.
قۇرمەتتى جيىنعا قاتىسۋشىلار! مەن جولداۋدا ايتىپ ءوتتىم, ەكونوميكالىق ءوسىمدى جانە تىڭ وزگەرىستەردى ەلىمىزدىڭ ءاربىر تۇرعىنى سەزىنۋى قاجەت. ءبىز حالىقتىڭ ءال-اۋقاتىن ارتتىرۋدى ءاردايىم باستى نازاردا ۇستاۋىمىز كەرەك. وڭىردە تۇراتىن ازاماتتارىمىزدىڭ تۇرمىس ساپاسى جوعارى ستاندارتتارعا ساي بولۋى ءتيىس. بۇل, ەڭ الدىمەن, جەرگىلىكتى حالىق تۇرعىن-ءۇي, الەۋمەتتىك قولداۋ, ينفراقۇرىلىم سياقتى يگىلىكتەردى كورۋى ءتيىس دەگەن ءسوز. سول سەبەپتى بارلىق دەڭگەيدەگى اكىمدەر جۇمىستى جاڭا تالاپقا ساي, ءتيىمدى ۇيىمداستىرۋى قاجەت. وسىعان وراي, بۇگىنگى جيىندا اقمولا وبلىسىن دامىتۋ ماسەلەلەرىن قاراستىرامىز», دەپ جازدى بەرىك ءۋالي.
