پوليتسيا دەپارتامەنتى ءباسپاسوز قىزمەتىنىڭ حابارلاۋىنشا, 1998 جىلى رەسەيدىڭ تۋماسى الماتى قالاسىندا جول اپاتىنا ۇشىراعاننان كەيىن ەسىن جوعالتقان. ول كوپ جىلدار بويى وڭتۇستىك استانادا تۇرىپ كەلگەن. تۋىستارى ىزدەستىرىپ تاپقانىمەن, ءتيىستى قۇجاتتارى بولماعاندىقتان اكەتە الماعان. شاماسى, 1974 جىلى الىنعان تولقۇجاتىن جوعالتىپ السا كەرەك.
«بيىل قىزىلجار وڭىرىندە تۇراتىن تۋىستارى 50 جاستاعى ايەلدى كوشىرىپ العان سوڭ كوشى-قون پوليتسياسىنا جۇگىندى. باسقارما قىزمەتكەرلەرى الدىمەن ايەلدى ازاماتتىعى جوق تۇلعا رەتىندە تانۋ ءۇشىن قۇجاتىن جيناۋعا كومەكتەستى. ءسويتىپ رەسەيلىك ايەل ازاماتتىعى جوق تۇلعا رەتىندە كۋالىك الدى. ەندى ول ءوز وتانىنا بارا الادى», دەلىنگەن ءباسپاسوز ورتالىعى حابارلاماسىندا.
كوشى-قون پوليتسياسىنىڭ مالىمەتىنشە, جىل باسىنان بەرى تاعدىردىڭ ءارتۇرلى سەرگەلدەڭىنە كەزدەسكەن جۇزدەن استام ادامنان قۇجات راسىمدەۋ جونىندە ءوتىنىش تۇسكەن. وسىنىڭ الدىندا عانا ءتارتىپ ساقشىلارى 30 جىل بويى ەشبىر قۇجاتسىز جۇرگەن ادامعا قول ۇشىن بەرگەن بولاتىن.
