فورۋم جۇمىسىنا قازاقستان حالقى اسسامبلەياسى توراعاسىنىڭ ورىنباسارى – پرەزيدەنت اكىمشىلىگى قازاقستان حالقى اسسامبلەياسى حاتشىلىعىنىڭ مەڭگەرۋشىسى جانسەيىت تۇيمەباەۆ, تۇركيا, ازەربايجان, وزبەكستان مەملەكەتتەرىنەن كەلگەن حالىقارالىق ساراپشىلار مەن شولۋشىلار, دەپۋتاتتار, مەملەكەتتىك ورگانداردىڭ وكىلدەرى, قازاقستان حالقى اسسامبلەياسىنىڭ مۇشەلەرى, رەسپۋبليكالىق جانە ايماقتىق باق-تىڭ باس رەداكتورلارى قاتىستى.
جيىندى باستاماس بۇرىن جانسەيىت تۇيمەباەۆ قازاقستان حالقى اسسامبلەياسى جۋرناليستەر كلۋبىنىڭ جاڭا توراعاسىن تانىستىردى. قوعامدىق نەگىزدەگى بۇل جۇمىستى بۇدان بىلاي بەلگىلى جۋرناليست, «Kazakh TV» ۇلتتىق ارناسىنىڭ ديرەكتورى مايا بەكباەۆا اتقارادى.
– بۇگىنگى باستى ماسەلە – قوعامداعى تۇراقتىلىق پەن ەتنوسارالىق كەلىسىم, الەۋمەتتىك بىرلىكتى نىعايتۋدا جۋرناليستەر قاۋىمى الدىندا تۇرعان مىندەتتەردى ورتاعا سالۋ. ەلباسى نۇرسۇلتان نازارباەۆتىڭ قازاقستان حالقى اسسامبلەياسىنىڭ قىزمەتىن تۇراقتى تۇردە اقپاراتتىق قولداۋعا قاتىستى ارنايى تاپسىرماسى بار. پرەزيدەنت قاسىم-جومارت توقاەۆ ءوز جولداۋىندا الەۋمەتتىك جانە ەتنوستىق توپتار اراسىنداعى كەلىسىمدى نىعايتۋ جونىندە تاپسىرما بەرگەن بولاتىن. وسى ورايدا وتاندىق جۋرناليستيكا ءۇشىن قوعامدىق كەلىسىمدى دامىتۋ, ارانداتۋشى اقپاراتتارعا قارسى يممۋنيتەتتى قالىپتاستىرۋ جانە قوعام بىرلىگىن ساقتاۋ تاقىرىپتارى وتە ماڭىزدى, – دەدى جانسەيىت تۇيمەباەۆ.
قازاقستان حالقى اسسامبلەياسى توراعاسى ورىنباسارىنىڭ ايتۋىنشا, مەملەكەتتىك ءتىلدىڭ مارتەبەسىن كوتەرۋ ماسەلەسىندە دە باق وكىلدەرىنىڭ اتقاراتىن ءرولى ايرىقشا. سونداي-اق الداعى جىلى اتالىپ وتىلەتىن قازاقستان حالقى اسسامبلەياسىنىڭ 25 جىلدىعى, اباي قۇنانباي ۇلىنىڭ 175 جىلدىعى, ءابۋ ناسىر ءال-ءفارابيدىڭ 1150 جىلدىعى سىندى مەرەيلى داتالار ءتورتىنشى بيلىك وكىلدەرىنىڭ نازارىنان تىس قالماسىنا سەنىم ءبىلدىردى.
– بۇگىندە جۋرناليستيكانىڭ ءمانى مەن باعىت-باعدارى قاتتى وزگەردى. اقپاراتتىق اگەنتتىكتەر مەن قۇرىلىمدار قوعامدى اقپاراتتاندىرۋدان گورى قوعامعا بەلگىلى ماقساتتا ىقپال ەتۋ ءۇشىن جۇمىس ىستەيدى. سوندىقتان تاۋەلسىز جۋرناليستيكانىڭ جاعدايى كۇن وتكەن سايىن قيىنداپ كەلەدى. جاھاندانۋ كەزىندە, كولىك جانە بايلانىس تەحنولوگيالارىنىڭ دامىعان ۋاقىتىندا ءومىر ءسۇرىپ جاتقان سوڭ, ءتۇرلى وقيعالاردىڭ استارىنا ۇڭىلۋگە ءماجبۇر بولامىز. سول سەبەپتەن جۋرناليست كەز كەلگەن وقيعانىڭ تۇپكى مانىنە ءۇڭىلىپ, كوزقاراسىن وقىرمان مەن كورەرمەنگە جەتكىزۋ ءۇشىن بايلانىس تەحنولوگيالارىن تولىق يگەرىپ الۋعا مىندەتتى, – دەدى تۇركيانىڭ «اۋەلى وتان» گازەتىنىڭ ءبولىم رەداكتورى كەمال ساللى.
تۇركيالىق جۋرناليست جاھاندىق جاعدايلاردى باسقا قىرىنان كورسەتۋ ماقساتىندا تۇڭعىش پرەزيدەنت نۇرسۇلتان نازارباەۆتىڭ تاجىريبەسىن الەم ەلدەرىنە تانىتۋ ءۇشىن بىرنەشە ماقالا جازعانىن دا جاسىرمادى. 1920-جىلدارى تۇركيادا ۇلت-ازاتتىق سوعىس ءجۇرىپ جاتقان كەزدە «الىستاعى باۋىرىما» دەپ جىرلاعان قازاق اقىنى ماعجان جۇماباەۆتىڭ, ودان ءجۇز جىلدان كەيىن سىندارلى ساياساتىن جۇرگىزە بىلگەن نۇرسۇلتان نازارباەۆتىڭ باۋىرمالدىعىن تۇرىك حالقى ەشۋاقىتتا ۇمىتپايتىنىن جەتكىزدى.
فورۋمنىڭ پلەنارلىق وتىرىسىندا وتاندىق جۋرناليستەر, حالىقارالىق ساراپشىلار مەن شولۋشىلار بايانداما جاساپ, پىكىر الماستى. قاتىسۋشىلار نازارىنا قازاقستان حالقى اسسامبلەياسىنىڭ بيىلعى جۇمىسىنىڭ جارقىن ساتتەرى بەينەلەنگەن «اسسامبلەيانىڭ ءبىر جىلى» تاقىرىبىنداعى فوتوكورمە ۇسىنىلدى.
سونداي-اق فورۋم جۇمىسىنىڭ سوڭىندا مەملەكەت ساياساتىن اقپاراتتىق تۇرعىدا قولداۋعا, قوعامدىق كەلىسىم مەن جالپىۇلتتىق بىرلىكتى نىعايتۋعا, قازاقستان حالقى اسسامبلەياسىنىڭ قىزمەتىن ناسيحاتتاۋعا ۇلەس قوسقان جۋرناليستەردى قولداۋ ماقساتىندا ۇيىمداستىرىلعان ءداستۇرلى «شاڭىراق» رەسپۋبليكالىق بايقاۋىنىڭ جۇلدەگەرلەرى ماراپاتتالدى. بايقاۋدىڭ ارنايى جۇلدەسى بيىل ىرگە قالاعانىنا 100 جىل تولۋىنا وراي «Egemen Qazaqstan» رەسپۋبليكالىق گازەتىنە تاپسىرىلدى.
