اگروونەركاسىپتىك كەشەن – وبلىس ەكونوميكاسىنىڭ كۇرەتامىرى. ماسەلەن, ەتتى ءىرى قارا مالدىڭ سانى بويىنشا رەسپۋبليكادا 2-ورىن الادى. بىلتىر ءىرى قارا سانى 456 مىڭ باس بولسا, بيىل بۇل كورسەتكىش 495 مىڭعا جەتتى. مالدىڭ باسىن كوبەيتۋ ءۇشىن 15 مىڭ ءىرى قاراعا ارنالعان بورداقىلاۋ الاڭدارىن اشۋ جوسپارلانۋدا. 9 ايدا وڭىردە نەگىزگى كاپيتالعا سالىنعان ينۆەستيتسيالار 36%-عا ارتىپ, 388 ملرد تەڭگەگە جەتتى. ونىڭ 90%-ى جەكە ينۆەستيتسيالار. قازىر ايماقتا قۇنى 1 تريلليون تەڭگەدەن اساتىن 42 جاڭا ءىرى ينۆەستيتسيالىق جوبا جۇزەگە اسىرىلىپ كەلەدى. ونىڭ ناتيجەسىندە 5 مىڭعا جۋىق جۇمىس ورنى اشىلادى. 8 جوبا شەتەلدىك ينۆەستورلاردىڭ قاتىسۋىمەن ورىندالىپ جاتىر. بيىل جالپى قۇنى 317,7 ملرد تەڭگە بولاتىن 500 جۇمىس ورنىن كوزدەيتىن 10 جوبا ىسكە قوسىلادى. اتاپ ايتقاندا, گاز دايىنداۋ قوندىرعىسى, شارلى قالپاقشالار ءوندىرىسى, تۇرمىستىق قاتتى قالدىقتاردى سۇرىپتاۋ جانە وڭدەۋ, كابەل ونىمدەرىن شىعارۋ, پوليەتيلەن قۇبىرلارىن شىعارۋ سىندى جاڭا ءوندىرىس وشاقتارى كىرەدى. سول سەكىلدى ترانسفورماتورلارعا ارنالعان پانەلدىك رادياتورلار ءوندىرىسى, جيھاز فابريكاسىمەن قاتار قاراشىعاناق قايتا وڭدەۋ كەشەنىندە گاز وندىرىسىندەگى شەكتەۋلەردى الىپ تاستاۋ مەن مۇناي وڭدەۋ زاۋىتى سياقتى جوبالاردىڭ قۇرىلىسى قارقىن الدى.
– باتىس قازاقستان وبلىسىنىڭ ينۆەستيتسيالىق الەۋەتى وتە جوعارى. اگرارلىق ونەركاسىپ كەشەنى, تۋريزم جانە اۆتوموبيلدەردىڭ ترانزيتتىك اعىمىن پايدالانۋ جانە باسقا سالالار بويىنشا جاڭا ينۆەستيتسيالىق جوبالاردىڭ پۋلىن دايىنداپ جاتىرمىز. الەۋەتتى ينۆەستورلاردىڭ سۇراقتارىنا جەدەل جانە ءتيىمدى جاۋاپ بەرەتىن قىزمەت كورسەتۋ جۇيەسىن قۇرۋ ءىسى اياقتالىپ كەلەدى, – دەدى وبلىس اكىمى.
اقجايىق وڭىرىندە «نۇرلى جەر» باعدارلاماسىنا سايكەس 16 ميلليارد تەڭگەدەن استام قاراجاتقا ورال جانە اقساي قالالارىندا 17 كوپپاتەرلى تۇرعىن ءۇي, سونداي-اق اۋىلدىق جەرلەردە 117 ءۇيدىڭ قۇرىلىسى ىسكە اسىرىلۋدا. جىل قورىتىندىسى بويىنشا 6 كوپپاتەرلى تۇرعىن ءۇي جانە اۋىل-ايماقتارداعى 49 تۇرعىن ءۇيدى كەزەكتە تۇرعان ادامدارعا جالعا بەرۋ جوسپارلانعان. بۇل شامامەن 1080 پاتەر. وسى جىلى باتىس وڭىرىندە الەۋمەتتىك تۇرعىدا قورعالماعان 394 وتباسى پاتەر كىلتىنە يە بولدى. ولاردىڭ 243-ءى كوپ بالالى وتباسىلار. جەكە ينۆەستيتسيالار ەسەبىنەن بيىل جالپى كولەمى 386 مىڭ شارشى مەتردى قۇرايتىن تۇرعىن ءۇي پايدالانۋعا بەرىلمەك.
– جاڭا جولداردىڭ ۇزىندىعى – 245 شاقىرىم. بۇعان شامامەن 55 ملرد تەڭگە بولىنەدى. قازىر مەردىگەرلەر انىقتالىپ, كەيبىر اۋدانداردا جۇمىستار باستالىپ كەتتى. جول قۇرىلىسىن 2021 جىلدىڭ سوڭىنا دەيىن اياقتاۋ كوزدەلگەن. ەلىمىزدىڭ ترانزيتتىك الەۋەتىن پايدالانۋ ماقساتىندا سامارا وبلىسىمەن شەكاراداعى «سىرىم» وتكىزۋ بەكەتى كەڭەيتىلدى. جوبانىڭ سوماسى – 2,2 ملرد تەڭگە. ورالدا «نەفتەبازا» اۋدانىندا ۇزىندىعى 1 شاقىرىم جانە قۇنى 5,2 ملرد تەڭگە بولاتىن كوپىر قايتا جاڭعىرتىلۋدا. 1972 جىلى سالىنعان «ورال» حالىقارالىق اۋەجايىنىڭ تەرمينالىن قايتا قۇرۋ باستالدى. بۇل جولاۋشىلار ءۇشىن ىڭعايلى جاڭا تەرمينال بولادى, – دەدى ع.ەسقاليەۆ.
بۇدان باسقا سپيكەر 54 مىڭنان استام حالقى بار 40 اۋىلدا سۋمەن جابدىقتاۋدىڭ 29 نىسانىنىڭ قۇرىلىسى مەن قايتا جاڭعىرتۋ جۇمىستارى باستالعانىن جەتكىزدى. وسى ماقساتقا 4,3 ميلليارد تەڭگە ءبولىنىپتى. بيىل اۋىز سۋ شامامەن 35 مىڭ ادام تۇراتىن 26 اۋىلعا كەلەدى دەپ كۇتىلۋدە. ناتيجەسىندە حالىقتى ورتالىقتاندىرىلعان سۋمەن قامتاماسىز ەتۋ دەڭگەيى 86,6%-عا دەيىن ارتادى.
ع.ەسقاليەۆتىڭ ايتۋىنشا, وڭىردە دەنساۋلىق ساقتاۋ سالاسىندا نەگىزگى كورسەتكىشتەر بويىنشا وڭ ءۇردىس بايقالۋدا. بۇل جالپى ءولىمنىڭ 5,4%-عا جانە ءسابي ءولىمىنىڭ 19,9%-عا تومەندەگەنىن كورسەتەدى. نارەستە ءولىمىن ازايتۋ ءۇشىن مەديتسينالىق ۇيىمدار 17 مامانداندىرىلعان ۋلترادىبىستىق اپپاراتتارمەن جابدىقتالدى جانە 38 مامان تۋا بىتكەن كەمىستىكتى ەرتە انىقتاۋ بويىنشا بىلىكتىلىگىن ارتتىرعان, دەدى ايماق اكىمى.
