ە. دوساەۆ اتاپ وتكەندەي, جىلدىق ينفلياتسيا ءبىزدىڭ كۇتۋىمىزگە سايكەس قالىپتاسۋدا جانە قازاننىڭ قورىتىندىسى بويىنشا 5,5% بولدى.
اقىلى قىزمەتتەرگە باعا مەن تاريفتەردىڭ ءوسۋى تاريحي ەڭ تومەن دەڭگەيدە قالۋدا – جىلدىق كورسەتۋدە 0,8%. رەتتەلەتىن قىزمەتتەرگە تاريفتەر قازاندا جىلدىق كورسەتۋدە 7,7%-كە تومەندەدى.
جىل سوڭىنا دەيىن ينفلياتسيا دەڭگەيى 5,7-5,8%, ياعني 4-6% تارگەتتەلەتىن دالىزدە باعالانادى.
«وسى فاكتورلاردى ەسكەرە وتىرىپ, ۇلتتىق بانك 28 قازاندا بازالىق ستاۆكانى 9,25% دەڭگەيدە جانە +/- 1 پايىزدىق تارماق دالىزدە ساقتادى. اقشا-كرەديت ساياساتى شارالارى شەڭبەرىندە ۇلتتىق بانك اينالىستاعى نوتتار كولەمىن مامىر-قازان ارالىعىندا 30,1%-عا 4,3 ترلن تەڭگەدەن 3,0 ترلن تەڭگەگە دەيىن قىسقارتتى. ناتيجەسىندە بانكتەر ارتىق وتىمدىلىكتى كرەديتتەۋگە جانە ەكونوميكانى باسقا قارجىلاندىرۋعا قايتا جىبەردى», — دەدى ۇلتتىق بانك توراعاسى.
الدىن الا قورىتىندى بويىنشا, 9 ايدا تولەم بالانسى اعىمداعى شوتىنىڭ دەفيتسيتى ءوسىپ, 2018 جىلعى 9 ايداعى $1,8 ملرد-پەن سالىستىرعاندا $4,7 ملرد قۇرادى.
تىكەلەي شەتەلدىك ينۆەستيتسيالاردىڭ تازا اكەلىنۋى وتكەن جىلعى كورسەتكىش دەڭگەيىندە قالىپتاسىپ, $5,1 ملرد دوللار بولدى. ول بەيرەزيدەنتتەردىڭ كىرىستەرىن قايتا ينۆەستيتسيالاۋمەن جانە رەزيدەنتتەردىڭ شەتەلدىك ەنشىلەس ۇيىمدارىنان كاپيتالىن قايتارۋىمەن قامتاماسىز ەتىلدى.
پورتفەلدىك ينۆەستيتسيالار بويىنشا كاپيتالدىڭ تازا اكەتىلۋى 13,0%-عا ازايىپ, 2019 جىلعى 9 ايدا $2,6 ملرد بولدى. كاپيتالدىڭ اكەلىنۋى قارجى مينيسترلىگىنىڭ 3-توقساندا 1,15 ملرد ەۋروعا ەۋرووبليگاتسيالار شىعارۋمەن جانە «قازاتومونەركاسىپ» ۇاك» اق-تىڭ جاھاندىق دەپوزيتارلىق قولحاتتارىن ساتۋمەن قامتاماسىز ەتىلدى.
ە. دوساەۆتىڭ ايتۋىنشا, نەسيەلەندىرۋدىڭ ءوسۋى ارتۋدا.
«جىل باسىنان بەرى جالپى كرەديتتىك پورتفەل قىركۇيەكتىڭ سوڭىندا 2,3%-كە 13,4 ترلن تەڭگەگە دەيىن ءوستى. 1-توقساندا بانكتەردى قالىپقا كەلتىرۋ ناتيجەسىندە جۇمىس ىستەمەيتىن قارىزدار ەسەپتەن شىعارىلعان سوڭ ءساۋىر-قىركۇيەكتە كرەديتتەۋدىڭ ءوسۋى 7,4% نەمەسە 921,8 ملرد تەڭگە بولدى», - دەدى ە. دوساەۆ.
زاڭدى تۇلعالارعا كرەديتتەر كولەمى 1,7%-عا نەمەسە 121,7 ملرد تەڭگەگە ءوستى. جەكە تۇلعالاردىڭ كرەديتتىك پورتفەلى 14,7%-عا نەمەسە 800 ملرد تەڭگەگە ءوستى. ۇزاق مەرزىمدى كرەديتتەر قىركۇيەك قورىتىندىسى بويىنشا 11,4 ترلن تەڭگە, قىسقا مەرزىمدى كرەديتتەر 2 ترلن تەڭگە بولدى.
«7-20-25» باعدارلاماسىن ىسكە اسىرۋ شەڭبەرىندە 7 قاراشاداعى جاعداي بويىنشا 10 676 وتباسى 122,8 ملرد تەڭگە سوماعا قارىز الدى.
ەكونوميكانىڭ باسىم سالالارىن جەڭىلدىكپەن كرەديتتەۋ باعدارلاماسىن (600 ملرد تەڭگە) ىسكە اسىرۋ جالعاسۋدا. 1 قاراشاداعى جاعداي بويىنشا بانكتەردە 248,3 ملرد تەڭگەگە 393 جوبا قارالۋدا, 142,3 ملرد تەڭگەگە 224 جوبا ماقۇلداندى, 55,5 ملرد تەڭگەگە 147 قارىز بەرىلدى.
