قارجى مينيسترلىگىنىڭ بەرگەن مالىمەتتەرىنە سايكەس, وسى جىلدىڭ 10 ايى ىشىندەگى كىرىستەردىڭ ءوسۋ قارقىنى 2018 جىلدىڭ وسىنداي كەزەڭىمەن سالىستىرعاندا جوعارى. مەملەكەتتىك بيۋدجەتتىڭ كىرىستەرى 14%-عا ءوستى, رەسپۋبليكالىق – 17%-عا جانە جەرگىلىكتى بيۋدجەتتەر – 7%-عا. شىعىستاردىڭ اتقارىلۋى دا جاقساردى, مب شىعىستارى – 98,7%, رب شىعىستارى – 99,2% جانە جب شىعىستارى – 98,4%.
«بيۋدجەت تاپشىلىعى ءىس جۇزىندە ەسەپتى كەزەڭ جوسپارىنان ەداۋىر تومەن قالىپتاستى: مەملەكەتتىك بيۋدجەت بويىنشا – 995 ملرد تەڭگە, رەسپۋبليكالىق بيۋدجەت بويىنشا – 1 ترلن 127 ملرد تەڭگە. جەرگىلىكتى بيۋدجەتتەر بويىنشا 20 ملرد تەڭگە سوماسىندا پروفيتسيت قالىپتاستى», — دەدى ءا. سمايىلوۆ.
ۇلتتىق قوردىڭ اكتيۆتەرى 26 ترلن 320 ملرد تەڭگەنى قۇرادى. رەسپۋبليكالىق بيۋدجەتكە تۇسەتىن كىرىستەر 5 ترلن 285 ملرد تەڭگە سوماسىندا نەمەسە ەسەپتى كەزەڭگە ارنالعان جوسپارعا 100% جينالدى.
ءا. سمايىلوۆتىڭ ايتۋىنشا, 2018 جىلدىڭ 10 ايىمەن سالىستىرعاندا ءوسىم 771 ملرد تەڭگەنى نەمەسە 17% قۇرادى. نەگىزگى ءوسىم قوسىلعان قۇن سالىعى – 443 ملرد تەڭگە, كورپوراتيۆتىك تابىس سالىعى – 194 ملرد تەڭگە, حالىقارالىق ساۋداعا جانە سىرتقى وپەراتسيالارعا سالىناتىن سالىقتار بويىنشا – 105 ملرد تەڭگە قالىپتاستى.
«جەرگىلىكتى بيۋدجەتتەردىڭ مەنشىكتى كىرىستەرى 74 ملرد تەڭگەگە اسىرا ورىندالدى جانە 2 027 ملرد تەڭگەنى قۇرادى. وتكەن جىلدىڭ وسىنداي كەزەڭىمەن سالىستىرعاندا كىرىستەر 140 ملرد تەڭگەگە ءوستى. بۇل نەگىزىنەن سالىقتار ەسەبىنەن قامتاماسىز ەتىلدى. كىرىستەر جوسپارى ماڭعىستاۋ وبلىسىن جانە نۇر-سۇلتان قالاسىن قوسپاعاندا بارلىق وڭىرلەردە اسىرا ورىندالدى», — دەدى ءا. سمايىلوۆ.
رەسپۋبليكالىق بيۋدجەتتىڭ شىعىستارى 9 ترلن 565 ملرد تەڭگەنى نەمەسە 99,2% قۇرادى.
جەرگىلىكتى بيۋدجەتتەردىڭ شىعىستارى 4 ترلن 705 ملرد تەڭگەنى قۇرادى. ەسەپتى كەزەڭدە وڭىرلەرگە 1 ترلن 256 ملرد تەڭگە سوماسىندا نىسانالى ترانسفەرتتەر ءبولىندى. جەرگىلىكتى دەڭگەيدە ولار 97,3%-عا نەمەسە 1 ترلن 222 ملرد تەڭگەگە يگەرىلدى.
قارجى ءمينيسترىنىڭ ايتۋىنشا, ەسەپ بەرۋ كەزەڭىندە بيۋدجەت قاراجاتىن يگەرۋ بارىسىندا تۋىندايتىن بۇزۋشىلىقتاردىڭ الدىن الۋ ماقساتىندا 2 779 اۋديتورلىق ءىس-شارا وتكىزىلدى.
«اۋديتورلىق ءىس-شارالارمەن 694 ملرد تەڭگە قامتىلدى. 194 ملرد تەڭگەگە قارجىلىق بۇزۋشىلىقتار انىقتالدى. تەكسەرۋ ناتيجەلەرى بويىنشا 179 ملرد تەڭگە سوماسىنا تاۋارلاردى جەتكىزۋ, جۇمىستاردى ورىنداۋ, قىزمەتتەردى كورسەتۋ, ەسەپكە الۋ جانە بيۋدجەتكە وتەۋ ارقىلى بۇزۋشىلىقتار جويىلدى. جۇرگىزىلگەن كامەرالدىق باقىلاۋ ناتيجەسىندە 743 ملرد تەڭگە سوماسىنا مەملەكەتتىك ساتىپ الۋ بويىنشا بۇزۋشىلىقتاردىڭ الدىن الۋ جۇرگىزىلدى», — دەپ ءتۇسىندىردى ءا. سمايىلوۆ.
پرەمەر-ءمينيستردىڭ ءبىرىنشى ورىنباسارى – قارجى ءمينيسترى اتاپ وتكەندەي, وسى كەزەڭنىڭ باسىم مىندەتى — بيۋدجەت قاراجاتىن ءتيىمدى جانە تولىق يگەرۋ. ول ءۇشىن بارلىق قاجەتتى قۇجاتتاردى ۋاقىتىلى ازىرلەپ, قابىلداۋ قاجەت جانە 2019 جىلعا ارنالعان ناقتىلانعان رەسپۋبليكالىق بيۋدجەتتى ىسكە اسىرۋ ءۇشىن بارلىق بيۋدجەتتىك راسىمدەردى جۇرگىزىپ ۇلگەرۋ كەرەك.
ورتالىق جانە جەرگىلىكتى ورگاندار قاراشا ايىندا 2020-2022 جىلدارعا ارنالعان رەسپۋبليكالىق بيۋدجەتتى ىسكە اسىرۋ ءۇشىن مەملەكەتتىك ساتىپ الۋدىڭ الدىن الا جوسپارلارىن ازىرلەۋى ءتيىس. وسى جىلدىڭ قاراشاسىنان باستاپ اكىمشىلەر بارلىق دەڭگەيدەگى بيۋدجەت قاراجاتى ەسەبىنەن 2020 جىلعا ارنالعان مەملەكەتتىك ساتىپ الۋ بويىنشا كونكۋرستاردى حابارلاندىرۋدى باستاۋعا ءتيىس.
