قازاق كۇيىنىڭ قۇدىرەتىن اراب الەمىنە تانىتقان جاس كۇيشىلەردىڭ اراسىندا راسۋل ومىرزاقوۆ گران-پري جۇلدەسىن جەڭىپ الدى. تاعى ءبىر ونەرپاز قىزىمىز كاميلا ماقپوز جەكە ورىنداۋدا ءبىرىنشى ورىندى يەلەندى. «كۇدەر» دومبىراشىلار ءانسامبلى كورەرمەندەرگە م.اۋباكىروۆتىڭ «تالاس», ت.مومبەكوۆتىڭ «سالتانات» جانە ت.ب. كۇيلەر ۇسىنعان ەدى.
«كۇدەر» ءانسامبلىن تويكەن كۇدەروۆا 1995 جىلى قۇرعان. ول كەزدە قازاق ونەرىنە دەگەن سالقىن كوزقاراستان پەتروپاۆل ءالى ارىلا الماعان بولاتىن. وزگە ۇلت تۇگىلى ورىستانىپ كەتكەن قانداستارىمىزدىڭ اراسىندا دومبىرانى مەنسىنبەيتىندەر كوپ ەدى. سونىڭ ءبىرى ءوزى باسقاراتىن مادەني مەكەمەنىڭ مەرەيتويلىق كونتسەرتىن ۇيىمداستىرعاندا «تولكو دومبرۋ نە نادو» دەيتىن قازاق ايەلى ءالى دە ات ۇستىندە كەلە جاتىر.
وسىنداي قارسىلىقتارعا, مۇرىن شۇيىرۋلەرگە قاراماي تويكەن كۇدەروۆا ەرەن تاباندىلىقپەن دومبىراشىلار ءانسامبلىن قۇرىپ, ونىڭ جۇمىسىن بۇگىنگە دەيىن جالعاستىرىپ كەلەدى. دومبىرانىڭ قۇدىرەتىن ول الدىمەن تۋعان جەرىندە تانىتتى, ال قازىر تاۋەلسىزدىكتىڭ ارقاسىندا الىس شەتەلدەردى دە مويىنداتۋدا.
كۇيشى ءارى ونەردىڭ عالامات ۇيىمداستىرۋشىسى بۇگىنگى كۇنى اق باتا مەن اق تىلەكتىڭ ارقاسىندا ونەردىڭ شىڭدارىنا كوتەرىلىپ كەلەدى. ماسەلەن, قازان ايىندا عانا ونىڭ شاكىرتتەرى كوكشەتاۋ قالاسىندا بولعان «جاڭا فورمات» اتتى حالىقارالىق دومبىراشىلار فەستيۆالىنە قاتىسىپ, ءتۇرلى نوميناتسيا بويىنشا ەكى گران-پري مەن 3 ەكىنشى ورىندى قانجىعالارىنا بايلاپ قايتقان.
تەك وسىنداي جەتىستىكتەردى جەرگىلىكتى باسشىلار دا مويىنداپ, لايىقتى باعالاپ جاتسا نۇر ۇستىنە نۇر بولار ەدى. ايتپەسە, الپىس جىلدىعىن تويلاعاندا ت.كۇدەروۆانىڭ تەك «مادەنيەت قايراتكەرى» دەگەن ۆەدومستۆولىق اتاعى عانا بارى ءبىلىندى... وتىز جىلداي ونەر مايدانىنىڭ وتىندە بولىپ جانە وبلىس قانا ەمەس, بۇكىل ەلىمىز ءۇشىن ۇلكەن ناتيجەلەر كورسەتىپ جۇرگەن جاننىڭ ەڭبەگىنە لايىقتى باعا بەرۋ كەرەك-اق...
پەتروپاۆل
