كەزدەسۋ بارىسىندا نۇرسۇلتان نازارباەۆ «استانا كلۋبىنىڭ» وتىرىسىنا قاتىسقانى ءۇشىن موحاممەد ءال-بارادەي مەن دجوناتان گرانوففقا العىس ءبىلدىردى.
– موحاممەد ءال-بارادەي ماگاتە-نى يادرولىق قارۋدى تاراتپاۋعا جاۋاپتى نەگىزگى ورگانعا اينالدىردى. ءبىز سىزبەن بىرگە قازاقستاندا تومەن بايىتىلعان ۋران بانكىن قۇرۋدى باستادىق. بۇل وتە ماڭىزدى وقيعا بولدى. ءبىزدىڭ ەلىمىزگە از بايىتىلعان ۋراننىڭ العاشقى پارتياسى كەلدى, – دەدى قازاقستاننىڭ تۇڭعىش پرەزيدەنتى.
سونداي-اق ەلباسى جاھاندىق قاۋىپسىزدىك ينستيتۋتىنىڭ يادرولىق قارۋدى تاراتپاۋداعى ماڭىزدى ءرولىن اتاپ ءوتتى.
– قازاقستاننىڭ يادرولىق قارۋسىزدانۋ ماسەلەسىندەگى ءرولىن جاقسى بىلەسىزدەر. ءبىز يادرولىق قاۋىپسىزدىكتى قامتاماسىز ەتۋگە باعىتتالعان بارلىق ماسەلەلەرگە بەلسەندى قاتىسىپ ءجۇرمىز, – دەدى نۇرسۇلتان نازارباەۆ.
ءوز كەزەگىندە ماگاتە-ءنىڭ بۇرىنعى باس ديرەكتورى قازاقستان يادرولىق قارۋسىز الەم قۇرۋ يدەياسىن قولدايتىندىعىن ءىس جۇزىندە دالەلدەگەنىن ايتتى.
– ءسىز يادرولىق قارۋسىزدانۋ سالاسىنداعى جەتەكشى ءرولىڭىزدى دالەلدەدىڭىز. قازاقستان ءوز ءسوزىن ناقتى ءىس-ارەكەتتەرمەن راستادى, يادرولىق الەۋەتتەن باس تارتتى, سەمەي پوليگونىن جاپتى. ەندى ءسىزدىڭ كۇش-جىگەرىڭىزدى عالامدىق جانە جەرگىلىكتى دەڭگەيدەگى ماسەلەگە باعىتتاۋ مۇمكىندىگى ماڭىزدى بولىپ وتىر, – دەدى موحاممەد ءال-بارادەي.
ءوز كەزەگىندە عالامدىق قاۋىپسىزدىك ينستيتۋتىنىڭ پرەزيدەنتى قازاقستاننىڭ تۇڭعىش پرەزيدەنتىنىڭ جاپپاي قىرىپ-جويۋ قارۋىن تاراتۋعا قارسى ءىس-قيمىلىن جوعارى باعالادى.
