ورتالىقتا ءوز ءىسىنىڭ شەبەرى, بىلىكتى اسكەري دارىگەرلەر مەن عالىمدار جۇمىس ىستەيدى. بۇگىنگى تاڭدا بۇل جەردە 50 قىزمەتكەر, 11 ساراپشى, 9 وقىتۋشى مەن جوعارى ساناتتى 6 دارىگەر قىزمەت ەتۋدە. ەكى قىزمەتكەر مەديتسينا عىلىمدارىنىڭ كانديداتى, عالىم دارەجەسىن يەلەنسە, ءبىر PhD دارىگەر بار.
ورتالىق ازيادا تەڭدەسى جوق بۇل اسكەري مەديتسينا ورتالىعىنىڭ تاريحى 1969 جىلدىڭ 1 قاراشاسىندا الماتى قالاسىندا ورتا ازيا اسكەري وكرۋگىنىڭ وكرۋگتىك سوت-مەديتسينالىق زەرتحاناسى قۇرىلعاندا باستالدى. قازاقستان تاۋەلسىزدىك العاننان كەيىن ونى قر قم ورتالىق مەديتسينالىق زەرتحاناسى دەپ اتادى. ال 2010 جىلى مەكەمە ءوزىنىڭ قازىرگى اتاۋىن الدى.
مەكەمە اسكەري مەديتسينا سالاسىندا قوسىمشا ءبىلىم بەرۋدى قامتاماسىز ەتەدى, بىلىكتىلىكتى ارتتىرۋ جانە كۋرستىق دايارلاۋ سالاسىنداعى ۇيىمداستىرۋ جانە وقۋ-ادىستەمەلىك جۇمىستارعا جاۋاپ بەرەدى. قارۋلى كۇشتەردىڭ مەديتسينالىق قۇرامىنا اسكەري-مەديتسينالىق دايارلىقتا, سوت-مەديتسينالىق, پاتولوگواناتوميالىق, حيميالىق-توكسيكولوگيالىق جانە گيستولوگيالىق زەرتتەۋلەر جۇرگىزۋدە ادىستەمەلىك جانە پراكتيكالىق كومەك كورسەتەدى.
2011 جىلدان باستاپ ونىڭ قۇرامىنا قازاقستان قارۋلى كۇشتەرى مەديتسيناسى قۇرامىنداعى ينتەرناتۋرا قوسىلدى. بۇدان باسقا, ورتالىق ءىىد, ۇلتتىق ۇلان جانە قر ۇقك شەكارا قىزمەتىنىڭ اسكەري قىزمەتشىلەرىنە مەديتسينالىق كومەك كورسەتۋدى ۇيرەتەدى.
ۇجىم ءوزىنىڭ جەتىستىكتەرىن ماقتان ەتەدى. جىل سايىن نۇسقاۋشى-وقىتۋشى قۇرامى اسكەري-مەديتسينا ەستافەتا بويىنشا حالىقارالىق سايىستارعا قاتىسۋ ءۇشىن قارۋلى كۇشتەردىڭ قۇرامىن دايىنداۋعا قاتىسادى. 2019 جىلى ورتالىقتىڭ دارىگەرلەر قۇرامى ءىى ورىنعا يە بولدى.
وقىتۋشىلار بۇۇ ميسسياسى ءۇشىن بىتىمگەرشىلىك دايىنداۋعا قاتىسادى. مەديتسينالىق قىزمەت پودپولكوۆنيگى ا.اسىلحانوۆ جانە ب.حالمۋراتوۆ جانە اعا سەرجانت ءا.ورازحانوۆ ليۆانعا اتتانار الدىندا بىتىمگەرشىلىك روتاسىنىڭ اسكەري-مەديتسينالىق دايىندىعىنا قاتىستى.
تاجىريبە مەن بىلىمگە قاراماستان, اسكەري مەديتسينا ورتالىعى ءاردايىم دامۋ ۇستىندە. قازاقستان مەن اقش قورعانىس ۆەدومستۆولارى اراسىنداعى 5 جىلدىق ىنتىماقتاستىق جوسپارى نەگىزىندە وسى جىلى جاراقاتتار كەزىندە مەديتسينالىق كومەك كورسەتۋ بويىنشا ITLS حالىقارالىق كۋرسى سەرتيفيكاتتاۋدان ءوتىپ, اتالعان كۋرستاردى وتكىزۋگە ارنالعان زاماناۋي قۇرال-جابدىقتار الدى.
