قوعام • 07 قاراشا، 2019

الماتىدا «دەنساۋلىق ساقتاۋداعى يننوۆاتسيالار» حالىقارالىق فورۋمى ءوتىپ جاتىر

72 رەت كورسەتىلدى

بۇگىن الماتىدا ەكى كۇندىك «دەنساۋلىق ساقتاۋداعى يننوۆاتسيالار» حالىقارالىق عىلىمي فورۋمى ءوز جۇمىسىن باستادى. ءىس-شارا پرەزيدەنت ءىس باسقارماسىنىڭ مەديتسينالىق قىزمەتىنىڭ 90 جىلدىعىنا ارنالدى.

پرەزيدەنت ءىس باسقارماسى مەديتسينالىق ورتالىعىنىڭ باسشىسى الەكسەي تسوي: «نوۆاتورلىق جانە پروگرەسسيۆتى جوبالارعا تالپىنۋ، مەديتسينا عىلىمىنىڭ جانە تەحنيكانىڭ وزىق جەتىستىكتەرىن پايدالانۋ، اسا كۇردەلى كلينيكالىق-دياگنوستيكالىق ماسەلەلەردى شەشۋ مۇمكىندىگى – مەديتسينالىق ورتالىق ماماندارىنا ايرىقشا ءتان قاسيەت»، - دەيدى.

فورۋمنىڭ پلەنارلىق وتىرىستارىندا دەنساۋلىقتى جىلدام قالىپقا كەلتىرۋ مەن فۋنكتسيونالدىق ۇزاق ءومىر ءسۇرۋدى قامتاماسىز ەتەتىن دياگنوستيكا، ەمدەۋدىڭ ەڭ جاڭا جوعارى دالدىك ادىستەرى، ساۋلەلىك دياگنوستيكاداعى يننوۆاتسيالىق تەحنولوگيالار، كولىك مەديتسيناسىنا ارنالعان تەحنولوگيالاردى دامىتۋ، ونكولوگياداعى دەربەستەندىرىلگەن دياگنوستيكا، رادياتسيانى قاۋىپسىز قولدانۋ تەحنولوگياسى نەگىزىندە جاپوندىق كلينيكا مەن پرەزيدەنت ءىس باسقارماسى مەديتسينالىق ورتالىعىنىڭ كلينيكالارى اراسىنداعى ىنتىماقتىق ماسەلەلەرى تالقىلانىپ وتىر.

مەديتسينالىق ورتالىق ەڭ جاڭا جوعارى تەحنولوگيالىق، دياگنوستيكالىق، كلينيكالىق جانە زەرتحانالىق قۇرال-جابدىقتاردى امبۋلاتوريالىق، ستاتسيونارلىق جانە وڭالتۋ كەزەڭدەرىندە پايدالانۋعا ەرەكشە كوڭىل بولەدى.

«اۋرۋلاردى ەرتە انىقتاۋدىڭ، ولاردى دەر كەزىندە جانە ساپالى ەمدەۋدىڭ، ناۋقاستاردى ساۋىقتىرۋ مەن وڭالتۋدىڭ قالىپتاسقان ءداستۇرلى ءارى جاۋاپتى ءتاسىلى قازاقستان رەسپۋبليكاسى پرەزيدەنتى ءىس باسقارماسىنىڭ مەديتسينالىق قىزمەتىنە ەلىمىزدىڭ دەنساۋلىق ساقتاۋ سالاسىندا تانىلعان ناعىز كوشباسشى اتاۋىنا ىقپال ەتتى»، – دەدى قر پرەزيدەنتىنىڭ ءىس باسقارۋشىسى ەرلان باتتاقوۆ.

فورۋمدا اقش، رەسەي، يزرايل، قىرعىز رەسپۋبليكاسى، تاجىكستان، جاپونيا، وڭتۇستىك كورەيا، ءۇندىستان، تۇركيا، ليۋكسەمبۋرگ، گەرمانيا مەن ەلىمىزدىڭ جەتەكشى ۇيىمدارىنان كەلگەن حيرۋرگيا، يادرولىق مەديتسينا، ەمحانالىق جانە ستاتسيونارلىق قىزمەت جانە باسقا دا كلينيكالىق-دياگنوستيكالىق باعىتتار جونىندەگى ماماندار دەنساۋلىق ساقتاۋدىڭ وزەكتى ماسەلەلەرى بويىنشا باياندامالار جاساپ، شەبەرلىك دارىستەرىن وتكىزۋدە.

 

 

الماتى

سوڭعى جاڭالىقتار

ۇقساس جاڭالىقتار