رۋحانيات • 07 قاراشا، 2019

ەلىن سىيلاعاننىڭ ەڭسەسى بيىك

39 رەتكورسەتىلدى

كوكشەتاۋداعى دوستىق ۇيىندە اقپارات جانە قوعامدىق دامۋ مينيسترلىگىنىڭ ۇيىتقى بولۋىمەن ازاماتتىق باستامالاردى قولداۋ ورتالىعىنىڭ گرانتتىق جوباسى اياسىندا «ادىرنا» ۇلتتىق-ەتنوگرافيالىق بىرلەستىگى قازاقستان حالقى اقمولا اسسامبلەياسىمەن بىرلەسە وتىرىپ وزگە ۇلت وكىلدەرى اراسىندا «تۋعان جەرىم – قازاقستانىم!» اتتى پوەزيا كەشىن وتكىزدى.

ولەڭ قونىپ، ءان ۇشقان كوكشەلىك قاۋىمعا جىرمەن ورىلگەن جان ءلۇپىلى تاڭسىق ەمەس. بۇل جولعى بايقاۋدىڭ ەرەكشەلىگى الاشتىڭ ايتۋلى اقىندارىنىڭ رۋحاني الەمىمىزدى بارىنشا بايىتىپ، ساۋلەلەندىرەتىن جالىندى جىرلارىن وزگە ۇلت وكىلدەرىنىڭ مازمۇنعا ساي بەرىلىپ، جان-دۇنيەلەرى جادىراپ، كوڭىلدەرى نۇرلانىپ كەلىستىرە وقۋلارى بولدى.

14 پەن 29 جاس ارالىعىنداعى 21 ۇمىتكەردىڭ ءبىر كۇندىك بابى جەتپەي قالعان ءبىرى جوق. ءبىر عاجابى، ولار وقىعان ولەڭدەردىڭ تاقىرىبى دا ءبىر ارنادا توعىسىپ جاتىر. قاسيەتتى وتان، قاستەرلى جەر كىمگە بولسىن قىمبات، ارداقتى دا ابزال ەل. شىمىرلاپ اعىپ، شامىرقانا شارپىپ، قۇلاعىڭنان كىرىپ، بويدى الار باعالى ولەڭ تۇتاس بايىپتاعاندا پاتريوتتىق تاقىرىپتى قامتيدى ەكەن. اسىرەسە، سۇلتانماحمۇت تورايعىروۆتىڭ «تۋعان ەلىمە»، قاسىم امانجولوۆتىڭ «قازاقستان»، «وتان تۋرالى وي»، كۇلاش احمەتوۆانىڭ «جان دالا – جاننات دالا»، تولەگەن قاجىباەۆتىڭ «كوكشەتاۋ تۋرالى تولعانىس» جىرلارى ورىنداۋشىلاردىڭ وقۋ شەبەرلىكتەرى، كوركەم جىردىڭ كەستەسىن سوكپەي كەلىستىرۋلەرىنىڭ ارقاسىندا جىرقۇمار قاۋىمنىڭ كوكىرەگىن كوكتەمنىڭ كەرىمسال سامالىنداي جەلپىپ ءوتتى. جالعىز جىر عانا ەمەس، ۇمىتكەرلەردىڭ ۇلتتىق كيىم كيۋى، سالتاناتتى ساحنا ادەبى كورەرمەن كوزىن قۋانتادى ەكەن.

ۇزەڭگى قاعىستىرىپ، ءبىر-بىرىنەن قارا ۇزبەي مارەگە جەتكەنىمەن، ساليقالى ءسوزدى، سارابدال جىردى سالماقتاعان قازىلار القاسى ش.ءۋاليحانوۆ اتىنداعى كوكشەتاۋ مەملەكەتتىك ۋنيۆەرسيتەتى جانىنداعى كوپسالالى كوللەدجدىڭ ءبىلىم الۋشىسى انجەليكا سوكولوۆانى ۇزدىك دەپ تانىدى. ەكىنشى ورىنعا اناستاسيا بابەنكو يە بولدى، ءۇشىنشى ورىن تاتيانا سميرنوۆانىڭ ەنشىسىندە.  

وزگە ۇلتتاردىڭ جەرگىلىكتى ۇلت تىلىنە قۇمارلىعى سۇيسىندىرەدى. پرەزيدەنت قاسىم-جومارت توقاەۆتىڭ «قازاق ءتىلى ۇلتارالىق تىلگە اينالۋ كەرەك» دەگەن اتالى ءسوزى ارلى ۇرپاقتىڭ ساناسىنا ءسىڭىپ جاتقانداي. ەرتەرەكتە قازاعىنىڭ ءوزى ورعىعان ورىس تىلىندە سويلەيتىن بۇل ولكەدە ەندى وزگە ۇلتتار ءتىل سىندىرىپ جاتسا، جانىڭ گۇلدەيدى دە.

 

اقمولا وبلىسى     

 

سوڭعى جاڭالىقتار

ىستىق تاماق تاراتتى

قازاقستان • بۇگىن، 17:59

جاقسى اكىم جالعىز جۇرەدى

تانىم • بۇگىن، 17:02

بەتپەردە كيگەن كوكتەم

تانىم • بۇگىن، 16:55

جامبىلدىق ەرىكتىلەر جاراپ تۇر

ايماقتار • بۇگىن، 16:30

ۇقساس جاڭالىقتار