گاز باعاسىنىڭ ءداستۇرلى وتىننان قىمبات بولۋىنىڭ سەبەبى ونىڭ تاسىمالدانۋى مەن كەن ورنىنداعى شيكىزاتتى وندىرۋدەگى ەرەكشەلىكتەرىندە جاتىر دەيدى قالا اكىمىنىڭ ورىنباسارى. دەسە دە ونىڭ قۇنى ايتارلىقتاي جوعارى بولمايدى دەپ جەتكىزدى.
– كومىر كورشى قاراعاندى جانە پاۆلودار وبلىستارىنان جەتكىزىلەدى. ال گاز مىڭ شاقىرىمنان اساتىن ايماقتان تاسىمالدانادى. سول سەكىلدى كومىر مەن گازدى وندىرۋدەگى ايىرماشىلىقتاردى ەسكەرۋ كەرەك. الايدا گازداندىرۋدىڭ باسىمدىقتارى كوپ. كومىردەن بىردەن باس تارتپايمىز. جىلۋ ەلەكتر ورتالىقتارى الداعى بەس جىل ىشىندە قايتا جاراقتالادى. سونىمەن بىرگە 3-جەو قۇرىلىسى قاتار جۇرەدى. وندا سۋدى جىلىتۋ قازاندىقتارى گازبەن جۇمىس ىستەمەك. سول سەبەپتى تۇرعىن ۇيلەردە جىلۋدىڭ باعاسى كوتەرىلەدى. بىراق ايتارلىقتاي ەمەس. جەكە سەكتور يەلەرى كومىردى نەمەسە گازدى پايدالانادى, تاڭداۋ ءوز ەرىكتەرىندە, – دەدى ە.قيزاتوۆ.
ورتالىقتاندىرىلعان گازبەن جابدىقتاۋ كەزەڭ-كەزەڭمەن ىسكە اسىرىلادى. استانانى كوگىلدىر وتىنمەن قامتۋ تۇڭعىش پرەزيدەنتتىڭ «بەس الەۋمەتتىك باستاماسى» اياسىندا ورىندالىپ وتىر. بۇل جۇمىستار نەگىزگى ەكى باعىتتا جۇزەگە اسىرىلماق. اتاپ ايتساق, العاشقى كەزەڭدە تۇرعىن ءۇي الاپتارى مەن ءوندىرىس وشاقتارىنا گاز جەلىلەرى جۇرگىزىلەتىن بولادى. بۇدان كەيىن 1-ءشى جانە 2-ءشى جەو گازعا قوسىلادى. قۇرىلىس جۇمىستارى 3 كەزەڭنەن تۇرادى.
– 2019-2020 جىلدارى «كوكتال-1», «كوكتال-2», «جەلەزنودوروجنىي», «وڭتۇستىك-شىعىس» تۇرعىن الاپتارىنا جانە پرومىشلەننىي كەنتىنە گاز تارتىلادى. بۇل جۇمىس كەلەر جىلى اياقتالادى دەگەن سەنىمدەمىز. قۇرىلىستىڭ ەكىنشى كەزەڭى اياسىندا ينتەرناتسيونالنىي, كۇيگەنجار, تەلمان تۇرعىن اۋداندارى, سونداي-اق پريگورودنىي, Garden Village, Family Village قالاشىقتارى كوگىلدىر وتىنعا قوسىلادى. ءۇشىنشى كەزەڭدە يلينكا, شۇبار, ءوندىرىس اۋداندارىنا گاز قۇبىرى تارتىلماق, – دەيدى قالا اكىمىنىڭ ورىنباسارى.
ەلوردانى كوگىلدىر وتىنمەن قامتۋ «سارىارقا» جوباسى نەگىزىندە ىسكە اسۋدا. قۇنى 250 ملرد تەڭگەدەن اساتىن ماگيسترالدى گاز قۇبىرىنىڭ ۇزىندىعى 1061 شاقىرىم. ورتالىقتاندىرىلعان گاز جۇيەسىمەن 170-تەن استام ەلدى مەكەن قامتىلادى دەپ جوسپارلانعان.
