كەزدەسۋدە تاراپتار ەكى ەل اراسىنداعى ىنتىماقتاستىقتى كەڭەيتۋگە ەرەكشە ءمان بەرىلەتىنىن اتاپ ءوتتى.
داريعا نازارباەۆا ءوز سوزىندە وزبەكستان قازاقستاننىڭ ورتالىق ازياداعى ماڭىزدى ستراتەگيالىق ارىپتەسى ەكەنىن اتاپ ءوتتى. «بۇگىندە قازاقستان مەن وزبەكستان قارىم-قاتىناستارىنداعى بارلىق سالالاردا دامۋدىڭ جوعارى قارقىنى كورىنىس تاۋىپ وتىر. وعان قازاقستاننىڭ تۇڭعىش پرەزيدەنتى – ەلباسى ن.ءا.نازارباەۆتىڭ جانە وزبەكستان پرەزيدەنتى ش.م.ميرزيەەۆتىڭ سىڭىرگەن ەڭبەگى زور», - دەدى سەنات توراعاسى.
سەنات باسشىسى ەلىمىزدىڭ پرەزيدەنتى ق.ك.توقاەۆ ءوزىنىڭ مەملەكەت باسشىسى رەتىندە شەتەلگە بارعان ەكىنشى ساپارىندا وزبەكستاندا بولعانىن اتاپ ءوتتى جانە ول ءوزارا تۇسىنىستىك پەن تاتۋ كورشىلىك تۇرعىسىنداعى قارىم-قاتىناستاردى ودان ءارى نىعايتۋ نيەتىن پاش ەتەتىنىن ايتتى.
قازاقستان سەناتىنىڭ توراعاسى وزبەكستاننىڭ ايماقتاعى باستى ساۋدا ارىپتەسى ەكەنىن اتاپ ءوتتى. 2018 جىلى ەكى ەل اراسىنداعى تاۋار اينالىمى 25 پايىزعا ءوسىپ, 2,5 ملرد دوللارعا جەتكەن بولاتىن. «العا قويعان ورتاق ماقساتقا جەتۋ ءۇشىن وسى باعىتتاعى جۇمىستى جالعاستىرا وتىرىپ, ءوزارا ساۋدانى 5 ملرد دوللار كولەمىنە جەتكىزۋ كەرەك», - دەدى جوعارعى پالاتا باسشىسى.
داريعا نازارباەۆانىڭ ايتۋىنشا, ەكى ەلدىڭ ينۆەستيتسيا, ەنەرگەتيكا, تۋريزم, ايماقتىق جانە شەكارا ماڭىنداعى ىنتىماقتاستىق, ترانزيتتىك-كولىك سالالارىنداعى ءوزارا ءىس-قيمىلدى ودان ءارى تەرەڭدەتۋدىڭ كەلەشەگى زور.
وزبەكستان ولي ءماجىلىسى سەناتىنىڭ باسشىسى ءوز كەزەگىندە قازاقستان –وزبەكستاننىڭ ادال ءارى سەنىمدى ارىپتەسى ەكەنىن جەتكىزدى. ء«بىزدىڭ حالىقتارىمىزدى ورتاق تاريح جانە مادەني تامىرلاستىق بايلانىستىرادى. دامۋدىڭ كوپتەگەن سالالارى بويىنشا ۇقساستىقتار بار. وزبەكستان قازاقستانمەن دوستىق قارىم-قاتىناسقا زور ماڭىز بەرەدى», - دەپ اتاپ ءوتتى تانزيلا نارباەۆا.
تاراپتار كەيىنگى كەزدە قازاقستان مەن وزبەكستاننىڭ پارلامەنتارالىق ۇنقاتىسۋلارى قارقىندى بولا تۇسكەنىن, ەندى ونى جۇيەلى تۇردە جالعاستىرۋ قاجەتتىگىن ايتتى. ول پارلامەنتارالىق ىنتىماقتاستىقتىڭ بىرلەسكەن كوميسسياسىن قۇرۋ ارقىلى جۇزەگە اسقانى ءجون.
تالقىلاۋ بارىسىندا رەفورمالاردى قۇقىقتىق قامتاماسىز ەتۋ جانە الەۋمەتتىك-ەكونوميكالىق دامۋ سالاسىندا تاجىريبە الماسۋ باعدارلامالارىن جۇزەگە اسىرۋ, سونداي-اق ەكىجاقتى شارتتار مەن كەلىسىمدەردى قابىلداۋ جانە راتيفيكاتسيالاۋ پروتسەستەرىن جەدەلدەتۋ ماسەلەلەرى قوزعالدى.
كەزدەسۋ سوڭىندا قازاقستان رەسپۋبليكاسى پارلامەنتى سەناتى مەن وزبەكستان رەسپۋبليكاسى ولي ءماجىلىسى سەناتى اراسىنداعى 2019-2020 جىلدارعا ارنالعان ىنتىماقتاستىقتى دامىتۋ جونىندەگى بىرلەسكەن جول كارتاسىنا قول قويىلدى.
