دەۆيس كۋبوگىنىڭ 119 جىلدىق تاريحى بار. العاشقى ءتۋرنيردىڭ تۇساۋى سوناۋ 1900 جىلى كەسىلگەن. 1979 جىلدان باستاپ حالىقارالىق تەننيس فەدەراتسياسىنىڭ كۇنتىزبەلىك جوسپارىنا ەنگىزىلدى. ايتۋلى جارىستا ەڭ كوپ جۇلدە العان كوماندا – اقش. امەريكالىقتاردىڭ 32 مارتە اسىعى الشىسىنان ءتۇستى. اۋستراليا قۇراماسى دا الىمدى. جاسىل قۇرلىقتىڭ قىراندارى 28 رەت توپ جاردى. ءۇشىنشى جانە ءتورتىنشى ورىنداردا – فرانتسيا مەن ۇلىبريتانيا. ولاردىڭ ارقايسىسى 10 رەتتەن توپ جاردى. ۇزدىك بەستىكتى شۆەتسيا قورىتىندىلاپ تۇر. سكانديناۆيا تۇبەگىنىڭ تۇلەكتەرى جەتى مارتە تەڭدەسسىز دەپ تانىلدى. سونداي-اق باس جۇلدەنى ولجالاعاندار قاتارىندا يسپانيا (5 رەت), گەرمانيا مەن چەحيا (3 رەتتەن), رەسەي مەن حورۆاتيا (2 رەتتەن), يتاليا, سەربيا, ارگەنتينا, شۆەيتساريا جانە وار (1 رەتتەن) قۇرامالارى بار.
بىلتىرعى جارىستا حورۆاتيا تەننيسشىلەرىنە تەڭ كەلەر ەشكىم تابىلمادى. قۇرامىندا مارين چيليچ, بورنا چوريچ, ۆيكتور گالوۆيچ, يۆان دوديگ, نيكولا مەكتيچ, ماتە پاۆيچ سىندى ساڭلاقتارى بار ايتۋلى ەلدىڭ وكىلدەرى ءتۋرنيردىڭ نەگىزگى بولىگىندە كانادا, قازاقستان جانە اقش-تان ايلاسىن اسىرىپ, فينالدا فرانتسيانى سان سوقتىردى.
قازاقستان قۇراماسى دا دەۆيس كۋبوگىندا تابىستى ونەر كورسەتۋدە. جەرلەستەرىمىزدىڭ بۇل جارىستا 1995 جىلدان بەرى باق سىناپ جۇرگەنى بەلگىلى. باستاپقى كەزەڭدەردە قارقىنىمىز تىم باياۋ بولعانىمەن, كەيىننەن ەڭسە تىكتەدىك. 2011 جىلى العاش رەت الەمدىك توپقا جولداما الىپ, ءوز جانكۇيەرلەرىمىزدى ءبىر قۋانتساق, سودان بەرگى ۋاقىتتا دا ءبىراز بەلەستى باعىندىردىق.
جەرلەستەرىمىزدىڭ جاقسى ونەر كورسەتكەن جارىستارىنا جەكە-جەكە توقتالاتىن بولساق, 2011 جىلى 1/8 فينالدا چەحيامەن كۇش سىناستىق. اسا شيەلەنىستى وتكەن سايىستى 3:2 ەسەبىمەن ءوز پايدامىزعا شەشتىك. ول كەزدەرى قارسىلاس كوماندا ساپىندا توماش بەردىح سىندى اتاقتى ويىنشىنىڭ ونەر كورسەتكەنىن ەسكەرگەن ءجون. كەلەسى كەزەڭدە داۆيد نالبانديان مەن حۋان موناكوعا ارقا سۇيەگەن ارگەنتيناعا ەسە جىبەردىك – 0:5.
2012 جىلى ۇزدىكتەر باس قوسقان ءدۇبىرلى دودانىڭ العاشقى كەزەڭىندە كىل كوكجالداردان جاساقتالعان يسپانيادان 0:5 ەسەبىمەن ويسىراي ۇتىلدىق. 2013 جىلى اۋستريادان (3:1) ايلامىزدى اسىرعانىمىزبەن, چەحياعا (1:3) ەسە جىبەردىك. 2014 جىلى بەلگيادان (3:2) باسىم تۇسكەنىمىزبەن, شۆەيتساريادان (2:3) جەڭىلدىك. 2015 جىلى يتاليانى (3:2) ۇتقانىمىزبەن, اۋسترالياعا (2:3) ءالىمىز جەتپەدى. 2016 جىلى سەربيا (3:2) سان سوقتىرىپ كەتتى. بىلتىر شۆەيتساريانى (4:1) شاڭ قاپتىرعانىمىزبەن, سول جىلعى جارىستىڭ جەڭىمپازى حورۆاتياعا (1:3) جول بەردىك. وسىلايشا 2011-2018 جىلدار ارالىعىندا الەمدىك توپتا جەتى رەت ونەر كورسەتىپ, بەس رەت شيرەك فينالعا دەيىن جەتتىك. ەكى رەت 1/8 فينالدا سۇرىندىك. قۇرامىندا بىردە-ءبىر جۇلدىزدى ويىنشىسى جوق كوماندا ءۇشىن بۇل ارينە وتە جاقسى كورسەتكىش!
بيىلعى بايراقتى باسەكەدە قازاقستاننىڭ تۋى استىندا الەكساندر بۋبليك, ميحايل كۋكۋشكين, الەكساندر نەدوۆەسوۆ جانە اندرەي گولۋبەۆ ونەر كورسەتەدى. العاشقى ەكەۋى الەمدىك رەيتينگتە 51 جانە 57-ورىنداردى يەلەنۋدە. جەرلەستەرىمىزدىڭ اراسىنداعى ەڭ ۇزدىك كورسەتكىش وسى سپورتشىلارعا تيەسىلى. سول سەبەپتى بۋبليك پەن كۋكۋشكين جەكەلەگەن سايىستاردا كۇش سىناسادى. ال نەدوۆەسوۆ پەن گولۋبەۆ جۇپتىق باسەكەدە شەبەرلىك بايقاسادى. سونداي-اق پيرەنەي تۇبەگىنە ساپار شەگەتىندەر قاتارىندا قوسالقى قۇرامداعى دميتري پوپكو دا بار.
«ە» توبىنا تۇسكەن قازاقستاننىڭ تەننيسشىلەرى مادريدتە نيدەرلاند پەن ۇلىبريتانيا قۇرامالارىنا قارسى وينايدى. قازىرگى كەزدە قىزعالداقتار ەلى وكىلدەرى اراسىندا ەڭ ۇزدىك ناتيجە 33 جاستاعى روبين حاسسەگە تيەسىلى. الەمدىك رەيتينگتە ول 152-ورىندى يەلەنۋدە. وزگە ويىنشىلاردىڭ ناتيجەسى ودان دا تومەن. سول سەبەپتى دە قازاقستاندىق جانكۇيەرلەر ءوز وتانداستارىنىڭ گوللانديالىقتاردان باسىم تۇسەتىنىنە سەنىمدى.
ۇلىبريتانيا ويىنشىلارى اراسىندا ەندي ماررەيدى بولە-جارا اتاۋعا بولادى. وليمپيادانىڭ ەكى دۇركىن چەمپيونى دەگەن دارداي اتاعى بار 32 جاستاعى تەننيسشى ۋيمبلدون (2013, 2016) مەن اقش-تىڭ اشىق بىرىنشىلىگىندە (2012) جەڭىمپاز اتانىپ, بەس رەت اۋستراليانىڭ اشىق بىرىنشىلىگىنىڭ (2010, 2011, 2013, 2015, 2016) فينالىنا شىقتى. اتر تۋرنيرلەرىندە 46 مارتە توپ جارعان ەندي وسىدان ءۇش جىل بۇرىن عانا الەمدىك رەيتينگتە كوش باستاپ تۇردى. ودان كەيىن اۋىر جاراقات الىپ, ءبىراز ۋاقىت ۇلكەن سپورتتان قول ءۇزىپ قالدى. سونىڭ سالدارىنان دارەجەسى ءبىراز تومەندەدى. بۇگىنگى تاڭدا بريتانيالىق تەننيسشى اتر تىزىمىندە نەبارى 127-ورىندى يەمدەنۋدە. دەسەك تە ماررەيدىڭ الەۋەتى قانشالىقتى زور ەكەنىن جاقسى بىلەتىن جانكۇيەرلەر الداعى ۋاقىتتا ول ءوز بيىگىنەن كورىنەتىنىنە قىلاۋداي دا كۇمان كەلتىرمەيدى.
بۇگىنگى تاڭدا ۇلىبريتانيا تەننيسشىلەرى اراسىندا ەندي ماررەيدەن وزىپ تۇرعان ءۇش ويىنشى بار. ولار – دەنيەل ەۆانس (№43), كەمەرون نورري (№58) جانە كايل ەدمۋند (№75). مىنە, قاراشا ايىندا يسپانيانىڭ استاناسىندا وتەتىن جارىستا وتانداستارىمىز وسىنداي ساقا ويىنشىلارمەن كۇش سىناسادى.
بيىلعى دەۆيس كۋبوگى جولىنداعى جارىستىڭ وزگە توپتارىندا مىنا كوماندالار ءوزارا شەبەرلىك بايقاسادى: «ا» توبى – فرانتسيا, سەربيا جانە جاپونيا; «ۆ» توبى – حورۆاتيا, يسپانيا جانە رەسەي; «س» توبى – ارگەنتينا, گەرمانيا جانە چيلي; «D» توبى – بەلگيا, اۋستراليا جانە كولۋمبيا; «F» توبى – اقش, يتاليا جانە كانادا.
توپتىق تۋرنير باسەكەلەرى 18-21 قاراشا ارالىعىندا وتسە, كەلەسى كۇنى شيرەك فينالدى تاماشالايسىزدار. 23 قاراشادا جارتىلاي فينالدىق سايىستار وتسە, 24 قاراشادا دەۆيس كۋبوگىنىڭ يەگەرى انىقتالادى.
