بۇل كۇندەرى بارشا قازاق جانكۇيەرلەرى ءوز قانداستارىنىڭ تىلەۋىن تىلەۋدە. كاسىپقوي رينگتە كۇش سىناسىپ جۇرگەنىنە 10 جىل بولعان يسا اقبەرباەۆ سول ارالىقتا 21 كەزدەسۋ وتكىزىپ, 20 رەت جەڭىسكە جەتتى. 15 قارسىلاسىن ەسىنەن تاندىردى. تاعى ءبىر جەكپە-جەكتىڭ ناتيجەسى ەسەپكە الىنعان جوق.
سوڭعى رەت جەكپە-جەككە يسا وسىدان ەكى جىل بۇرىن شىققان ەدى. ناقتىلاپ ايتساق, 2017 جىلدىڭ جەلتوقسان ايىندا بوسنيا مەن گەرتسەگوۆينا وكىلى ميرنەس دەناديچتى ءتورتىنشى راۋندا ۇرىپ شىعىپ, WBA Asia نۇسقاسىنىڭ چەمپيوندىق بەلبەۋىن يەلەندى.
ال ەۆگەني تيششەنكونىڭ ەسىمى قالىڭ كورەرمەنگە جاقسى تانىس. 28 جاستاعى كراسنودار ولكەسىنىڭ تۋماسى اۋەسقويلار اراسىندا وليمپيا ويىندارى مەن دۇنيەجۇزىلىك ۋنيۆەرسيادانىڭ جەڭىمپازى, الەم جانە ەۋروپانىڭ ەكى دۇركىن چەمپيونى. دۇنيەجۇزىلىك دودانىڭ كۇمىس جۇلدەگەرى. رەسەي بوكسشىسىنىڭ باسقا دا تولىپ جاتقان اتاعى تاعى بار. بىلتىرعى جىلدان بەرى كاسىپقوي رينگتە باق سىناپ جۇرگەن ول بەس كەزدەسۋدىڭ بارلىعىندا جەڭىسكە جەتىپ, ءۇش باسەكەنى مەرزىمىنەن بۇرىن اياقتادى.
ءدال وسى تيششەنكو ريو وليمپياداسىنىڭ فينالىندا ءبىزدىڭ ۆاسيلي لەۆيتتى التىننان ايىرعانى دا جانكۇيەرلەردىڭ جادىندا. اقتىق ايقاستىڭ اقىرى داۋ-دامايعا ۇلاسىپ, سول باسەكەدە تورەشىلەر ادىلەتسىز شەشىم شىعارعانى جايىنداعى اڭگىمە ءالى كۇنگە دەيىن وربۋدە. ەندى لەۆيت جىبەرگەن ەسەنى اقبەرباەۆ قايتارادى دەپ ۇمىتتەنمىز. ونىڭ ۇستىنە 5 قاراشادا يسانىڭ تۋعان كۇنى. ول 36 جاسقا تولادى. ەگەر قانداسىمىز وسى جەكپە-جەكتە جەڭىسكە جەتسە, وندا ول ءوزىنىڭ تۋعان كۇنىنە كەرەمەت سىي جاساعان بولار ەدى.
