مەديتسينا • 01 قاراشا، 2019

ە.ءبىرتانوۆ: قازاقستاندا بيۋدجەتتىك ەكۇ كومەگىمەن 2700 بالا ومىرگە كەلدى

81 رەت كورسەتىلدى

ءدال وسى ساتتەردە الماتىدا ەكى كۇنگە سوزىلاتىن «بەدەۋلىكتى ەمدەۋدىڭ زاماناۋي تاسىلدەرى. قرت: قازىرگى جاعدايى مەن بولاشاعى» XI حالىقارالىق كونگرەسى ءوتىپ جاتىر.

كونفەرەنتسيادا دەنساۋلىق ساقتاۋ ءمينيسترى ەلجان ءبىرتانوۆ بيۋدجەتتىك ەكۇ باعدارلاماسى ارقاسىندا ەلىمىزدە 2010-2018 جىلدار ارالىعىندا 2700 بالا دۇنيەگە كەلگەنىن مالىمدەدى.

كونفەرەنتسيا جۇمىسىنا 18 ەلدىڭ الدىڭعى قاتارلى عىلىمي جانە كلينيكالىق ورتالىقتارىنىڭ جەتەكشىلەرى، اكۋشەر-گينەكولوگ دارىگەرلەر، ەكۇ ورتالىقتارىنىڭ وكىلدەرى، اندرولوگتار، ەندوكرينولوگتار، بەدەۋلىكتى ەمدەيتىن ماماندار، ەمبريولوگتار، گەنەتيكتەر مەن مولەكۋليارلىق بيولوگتارى قاتىسىپ وتىر. 

«سوڭعى ونداعان جىلدا الەمدە بەدەۋلىكتىڭ ءتۇرلى فورمالارىن ەمدەۋدە ۇلكەن تاجىريبە جينالدى. قازىرگى كەزدە بار تاسىلدەردىڭ كوبى قازاقستاندا ويداعىداي ەنگىزىلگەن. ەندوۆيدەوحيرۋرگيا، دياگنوستيكالاۋ مەن ەمدەۋدىڭ گورمونالدىق ادىستەرى زاماناۋي دەڭگەيدە دامىپ، قاۋىپسىزدىگى جانە تيىمدىلىگى جوعارى دارىلىك پرەپاراتتار تىركەلىپ جاتىر. اندرولوگيا، مەديتسينالىق گەنەتيكا، ەمبريولوگيا مەن مولەكۋليارلىق بيولوگيا تەز قارقىنمەن دامىپ كەلەدى. بۇنىڭ ءبارى قوسالقى رەپرودۋكتيۆتى تەحنولوگيالاردى تاجىريبەگە بەلسەندى تۇردە ەنگىزۋگە جول اشتى»، – دەيدى قازاقستان رەپرودۋكتيۆتىك  مەديتسينا قاۋىمداستىعىنىڭ پرەزيدەنتى، پروفەسسور ۆياچەسلاۆ لوكشين.

«بەدەۋلىك - دۇنيەجۇزىلىك ماسەلە. بۇگىندە ەلىمىزدەگى بەدەۋلىك جيىلىگى ورتاشا العاندا 15 پايىزعا جەتىپ، ودان ازايماي وتىر. ولاردىڭ باسىم بولىگى كومەكشى رەپرودۋكتيۆتى تەحنولوگيالارعا مۇقتاج. وسى حالىقارالىق فورۋمدا ماماندار بەدەۋلىكتىڭ دامۋىنا اكەلەتىن اۋرۋلاردىڭ الدىن الۋ، بەدەۋ نەكەنى دياگنوستيكالاۋ مەن ەمدەۋ، الەۋمەتتىك ادىلەتتىلىك پەن حالىقتىڭ الەۋمەتتىك از قامتىلعان توپتارىنا قولداۋ كورسەتۋ سياقتى ماسەلەلەردى تالقىلاپ وتىر. جىل سايىن قازاقستاندا كومەكشى رەپرودۋكتيۆتى تەحنولوگيالاردىڭ ارقاسىندا 2500 دۇنيەگە كەلەدى. «جالپى، ءبىزدىڭ ەلدە كومەكشى رەپرودۋكتيۆتى تەحنولوگيالاردىڭ كومەگىمەن 18200 بالا دۇنيەگە كەلدى. وسى جول ارقىلى بالا سۇيگىسى كەلەتىندەر بارشىلىق. بىزدە مەملەكەتتەن بەرىلەتىن كۆوتاعا كەزەكتە تۇرعاندار وتە كوپ. بىزگە 8 مىڭ كۆوتا قاجەت. ازىرگە جىلىنا 1500 كۆوتا الىپ وتىرمىز»، دەدى ۆياچەسلاۆ لوكشين.

 

 

الماتى

سوڭعى جاڭالىقتار

ۇقساس جاڭالىقتار