مەديتسينا • 01 قاراشا، 2019

الماتىدا «بەدەۋلىكتى ەمدەۋدىڭ زاماناۋي تاسىلدەرى» حالىقارالىق كونگرەسى ءوتىپ جاتىر

130 رەت كورسەتىلدى

بۇگىن الماتىدا ەكىكۇندىك «بەدەۋلىكتى ەمدەۋدىڭ زاماناۋي تاسىلدەرى. قرت: قازىرگى جاعدايى مەن بولاشاعى» XI حالىقارالىق كونگرەسى باستالدى. كونفەرەنتسياعا قر دەنساۋلىق ساقتاۋ ءمينيسترى ەلجان ءبىرتانوۆ قاتىسىپ، 18 مەملەكەتتەن 600-گە تارتا ارناۋلى ماماندار كەلدى. 

كونفەرەنتسيا جۇمىسىنا ەلىمىزدىڭ الدىڭعى قاتارلى عىلىمي جانە كلينيكالىق ورتالىقتارىنىڭ جەتەكشىلەرى، بەلارۋس، بەلگيا، ۇلىبريتانيا، گەرمانيا، گرۋزيا، يزرايل، يسپانيا، يتاليا، ءۇندىستان، قىرعىز رەسپۋبليكاسى، قازاقستان، رەسەي، اقش، وزبەكستان، ۋكراينا، تاجىكستان، تۇركىمەنستان، چەحيا مەن جاپونيانىڭ رەپرودۋكتيۆتى تەحنولوگيا سالاسىنداعى جەتەكشى ماماندارى – اكۋشەر-گينەكولوگ دارىگەرلەر، ەكۇ ورتالىقتارىنىڭ وكىلدەرى، اندرولوگتار، ەندوكرينولوگتار، بەدەۋلىكتى ەمدەيتىن ماماندار، ەمبريولوگتار، گەنەتيكتەر مەن مولەكۋليارلىق بيولوگتار كەلدى. 

فورۋمنىڭ اشىلۋىندا دەنساۋلىق ساقتاۋدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنىڭ باسىمدىقتارى ۇسىنىلدى.

ەكىكۇندىك كونفەرەنتسيا اياسىندا ءۇندىستان، يزرايل، يسپانيا، يتاليا، گەرمانيا، رەسەي، ۋكراينا، جاپونيا مەن قازاقستاننىڭ ماماندارىنىڭ قاتىسۋىمەن قرت-داعى ەمبريولوگيا، اكۋشەرلىك جانە گينەكولوگيانىڭ ەڭ وزەكتى ماسەلەلەرى بويىنشا شەبەرلىك سىنىپتارى وتەدى. 

بەدەۋلىكتىڭ دامۋىنا اكەلەتىن اۋرۋلاردىڭ الدىن الۋ ماسەلەلەرى، بەدەۋ نەكەنى دياگنوستيكالاۋ مەن ەمدەۋدەگى امسك رولىنە باستى نازار بولىنەدى. 

اۋقىمدى جيىننىڭ كۇن تارتىبىندە قرت ورتالىقتارىنىڭ كلينيكالار جانە جالپى تاجىريبەلى دارىگەرلەرمەن، ۋرولوگ-اندرولوگتارمەن، گەنەتيكتارمەن ءوزارا جۇمىس ىستەۋ ماسەلەلەرى الدىڭعى قاتارعا شىقتى. اتالمىش ماسەلە بەدەۋلىككە شالدىققان ەرلى-زايىپتى جۇپتاردى ەرتە دياگنوستيكالاۋ مەن وڭتايلى ەمدەۋ بويىنشا كەشەندى جۇمىستى ۇيىمداستىرۋ ءۇشىن انىقتاۋشى مانگە يە. 

الەۋمەتتىك ادىلدىكتى جانە الەۋمەتتىك وسال توپتارعا قولداۋ كورسەتۋدى ەسەپكە الا وتىرىپ، تمككك شەڭبەرىندە باعدارلامالاردى ءبولۋ ماسەلەلەرىنە ەرەكشە نازار ءبولۋ جوسپاردا بار. 

كونگرەسس حوللدارىندا رەپرودۋكتيۆتى مەديتسيناعا ارنالعان كورمە اشىلىپ، وعان دارىلىك قۇرالدار مەن مەديتسينالىق تەحنيكانىڭ 40-تاي وندىرۋشىلەرى، سونىمەن بىرگە قر-دا تانىمال قرت كلينيكالارى قاتىسىپ وتىر. 

كونفەرەنتسيا تاقىرىبىنىڭ وزەكتىلىگى سوندا – بەدەۋ نەكە ماسەلەسىنىڭ شەشىلۋى ەلدەگى دەموگرافيالىق جاعدايدى جاقسارتۋعا جانە ءتۇرلى سەبەپتەرگە بايلانىستى بالا سۇيە المايتىن جانداردىڭ ءومىر ءسۇرۋ ساپاسىن جاقسارتۋعا مۇمكىندىك بەرەتىن مەديتسينالىق-الەۋمەتتىك ماسەلە ەكەندىگىندە بولىپ تۇر.   بەدەۋلىكتىڭ جيىلىگى ورتاشا العاندا 15 پايىزعا تەڭ جانە جاقىن ارادا بۇل كورسەتكىش تومەندەمەيدى. دياگنوستيكالاۋدىڭ زاماناۋي ادىستەرىنىڭ دامۋى بەدەۋلىكتىڭ نەگىزگى سەبەپتەرىن جەتكىلىكتى دەڭگەيدە ءدال تابۋعا جانە ونى ەمدەۋدىڭ ادىستەرىن انىقتاۋعا مۇمكىندىك بەرەدى. جاعدايلاردىڭ 40 پايىزىنا جۋىعىندا بەدەۋلىك ەرلەردىڭ رەپرودۋكتيۆتى جۇيەسىندەگى پاتولوگيامەن بايلانىستى. ال 30 پايىزى – ارالاس بەدەۋلىك (ەرلەر جانە ايەلدەر بەدەۋلىگى).  

سوڭعى ونداعان جىلدا الەمدە بەدەۋلىكتىڭ ءتۇرلى فورمالارىن ەمدەۋدە ۇلكەن تاجىريبە جينالدى. قازىرگى كەزدە بار تاسىلدەردىڭ كوبى قازاقستاندا ويداعىداي ەنگىزىلگەن. ەندوۆيدەوحيرۋرگيا، دياگنوستيكالاۋ مەن ەمدەۋدىڭ گورمونالدىق ادىستەرى زاماناۋي دەڭگەيدە دامىپ، قاۋىپسىزدىگى جانە تيىمدىلىگى جوعارى دارىلىك پرەپاراتتار تىركەلىپ جاتىر. اندرولوگيا، مەديتسينالىق گەنەتيكا، ەمبريولوگيا مەن مولەكۋليارلىق بيولوگيا  قارقىندى دامىپ كەلەدى. بۇنىڭ ءبارى قوسالقى رەپرودۋكتيۆتى تەحنولوگيالاردى تاجىريبەگە بەلسەندى تۇردە ەنگىزۋگە جول اشتى.  

كونفەرەنتسيانى دەنساۋلىق ساقتاۋ مينيسترلىگىنىڭ قولداۋىمەن قازاقستان رەپرودۋكتيۆتىك  مەديتسينا قاۋىمداستىعى ۇيىمداستىرىپ وتىر.

 

 

الماتى

سوڭعى جاڭالىقتار

ۇقساس جاڭالىقتار