بارشا سىربويىلىقتاردى پاتريوتتىققا جانە مەملەكەتتىك رامىزدەرىمىزدى قۇرمەتتەۋگە شاقىرعان ءىس-شارا قالاداعى «Aray City Mall» ساۋدا ورتالىعىندا ۇيىمداستىرىلىپ, Nur Otan پارتياسى وبلىستىق جانە قالالىق فيليالدارىنىڭ باسشىلىعى, باستاۋىش پارتيا ۇيىمدارىنىڭ مۇشەلەرى, جاسوتاندىقتار, جەرگىلىكتى ءماسليحات دەپۋتاتتارى, قحا مۇشەلەرى, حالىقارالىق دارەجەدەگى سپورتشىلار مەن قالا تۇرعىندارى قاتىستى.
سالتاناتتى ءىس-شارانى اشقان Nur Otan پارتياسى وبلىستىق فيليالى توراعاسىنىڭ ءبىرىنشى ورىنباسارى اقمارال ءالنازاروۆا اكتسيانىڭ نەگىزگى ماقساتىنا توقتالىپ, مەملەكەتتىك رامىزدەردىڭ قۇندىلىعىن اتاپ ءوتتى. ول ءوز سوزىندە ەلىمىزدىڭ مەملەكەتتىك رامىزدەرى تاريحي وتكەندى, مادەني مۇرانى, لايىقتى بولاشاققا ۇمتىلىستى بەينەلەيتىنىن, سونداي-اق وتانعا دەگەن سۇيىسپەنشىلىك, ابىروي, بورىش, ەلىمىزدىڭ بولاشاعى ءۇشىن جاۋاپكەرشىلىك, مەملەكەتكە قۇرمەت سەكىلدى جالپى ادامگەرشىلىك نورمالار قالىپتاستىراتىندىعىن تىلگە تيەك ەتتى.
– مەملەكەتتىك رامىزدەر ءبىزدى وتان تاعدىرىنداعى ەڭ ماڭىزدى ساتتەردە – ۇلتتىق مەرەكەلەردەن باستاپ, سپورتتىق جەڭىستەرگە دەيىن بىرىكتىرەدى. تاريحىمىزدا مەملەكەتتىك نىشاندار, ەڭسەرىلمەيتىن قۇندىلىقتار رەتىندە, حالقىمىزدى جىگەرلەندىرىپ, ولار ءۇشىن ۇلى ەرلىكتەر جاسالعان, ولار ءۇشىن ومىرلەرىن قۇربان ەتكەن مىسالدار از ەمەس.
بۇگىندە قازاقستاننىڭ كوك تۋى استىندا ءبىزدىڭ ادامدار ەرلىك جاساپ, ەڭبەك, عىلىمي, مادەني جانە سپورتتىق جەتىستىكتەرىن كورسەتەدى. ءبىز ءارتۇرلى سالادا جوعارى جەتىستىكتەرىمەن ەلىمىزدىڭ كوك بايراعىن كوكتە جەلبىرەتىپ جۇرگەن ازاماتتارعا العىسىمىزدى بىلدىرەمىز. بۇل – ناعىز قازاقستاندىق پاتريوتيزم! بۇگىنگى اكتسيانىڭ نەگىزگى ماقساتى – مەملەكەتتىك رامىزدەرىمىزدى ناسيحاتتاۋ ارقىلى ولارعا قۇرمەت كورسەتۋ, ازاماتتاردىڭ تۋعان ەلىنە دەگەن پاتريوتتىق سەزىمىن وياتۋ.
ءبىزدىڭ تۋ عالامشارىمىزدىڭ ءار تۇكپىرىندە حالىقارالىق وليمپيادالاردا كوتەرىلدى, ول بۇۇ-نىڭ نيۋ-يوركتەگى شتاب-پاتەرىندە, ۆەناداعى ەقىۇ-نىڭ شتاب-پاتەرىنىڭ جانىندا جەلبىرەپ تۇر. ول قازاقستاندىق عارىشكەرمەن عارىشتا بولىپ, الەمنىڭ ەڭ بيىك تاۋ شىڭدارىن باعىندىردى. وسىنىڭ بارلىعى قازاقستان قوعامىنىڭ بەينەسىن ءبىزدىڭ سانامىزدا عانا ەمەس, حالىقارالىق ارەنادا دا قالىپتاستىرادى.
ءىس-شارا بارىسىندا حالىقارالىق دەڭگەيدەگى سپورتتىق دودالاردا توپ جارىپ, كوك بايراعىمىزدى كوكتە جەلبىرەتكەن سپورتشىلار ءسوز الىپ, پاتريوتتىق اكتسياعا قولداۋ ءبىلدىردى.
ءىس-شارا بارىسىندا اننەن شاشۋ شاشىلىپ, مەرەكە كوركىن قىزدىرا ءتۇستى.
