ۇلت بولىپ ساقتالۋىمىزعا, يىرىمگە ءتۇسىپ جۇتىلىپ كەتپەۋىمىزگە كەپىل بولاتىن ۇلتتىق كودتىڭ تىزگىنى انانىڭ قولىندا تۇر, قۋراپ كەتپەۋى ءۇشىن ۇلتتىق تامىردى سۋارۋ دا انانىڭ قاسيەتتى مىندەتى ەكەن. بۇل ايتۋعا وڭاي نارسە, ال تارقاتار بولساڭ اتان كوتەرمەس اۋىر جۇك. قوستانايدا قازاقستان حالقى اسسامبلەياسى رەسپۋبليكالىق انالار كەڭەسىنىڭ كەڭەيتىلگەن وتىرىسىنداعى تالقىلانعان ماسەلەلەردىڭ دە تەمىرقازىعى وسى ەدى.
پرەزيدەنت قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا جانە ەلباسىنىڭ «رۋحاني جاڭعىرۋ» باعدارلاماسىندا بەلگىلەنگەن مىندەتتەردى شەشۋدەگى انالار كەڭەستەرىنىڭ ءرولى» اتتى تاقىرىپ اياسىندا اڭگىمە وربىگەن شاراعا قازاقستان حالقى اسسامبلەياسى توراعاسىنىڭ ورىنباسارى – قازاقستان رەسپۋبليكاسى پرەزيدەنتى اكىمشىلىگىنىڭ حاتشىلىق مەڭگەرۋشىسى جانسەيىت تۇيمەباەۆ, وبلىس اكىمى ارحيمەد مۇحامبەتوۆ قاتىستى. جالپىۇلتتىق جوسپاردىڭ ىسكە اسىرىلۋىنا جاۋاپتى ورتالىق مەملەكەتتىك ورگانداردىڭ قىزمەتكەرلەرى, سونداي-اق نۇر-سۇلتان, الماتى, شىمكەنت قالالارى مەن وبلىستار اسسامبلەيالارى انالار كەڭەستەرىنىڭ, ەتنومادەني بىرلەستىكتەرىنىڭ توراعالارى مەن مۇشەلەرى دە شاقىرىلدى.
– انا – قاسيەتتى ءسوز. وتاندى اناعا تەڭەيمىز, ءتىلدى دە انا ءتىلى دەيمىز. وتباسىنىڭ قازىعى – انالار. وتباسى بەرەكەلى بولسا, مەملەكەتتىڭ ىرگەتاسى مىقتى بولادى. بالانىڭ تاربيەسىندە دە انانىڭ ماڭىزى ەرەكشە. بالا – بولاشاق. ال بولاشاقتىڭ قانداي بولارى دا اناعا بايلانىستى ەكەن. ۇلتتى تاربيەلەيتىن دە انا, – دەدى جانسەيىت تۇيمەباەۆ.
اسىرەسە الەۋمەتتىك ماسەلەلەر وزەكتىلىگى جۇيكەنى توزدىراتىن بۇگىنگى قوعامدا ايەلدەر بەلسەندىلىگى قاجەتتىلىككە اينالىپ وتىرعانى راس. قوعامدا قانداي الەۋمەتتىك ماسەلە كوتەرىلسە دە, ءبىر ۇشى اناعا كەلىپ تىرەلەدى. ونىڭ ۇستىنە ۇرپاقتى دا, ۇلتتى دا تاربيەلەيتىن انانىڭ وزىنە قامقورلىق كەرەك. ستاتيستيكا بويىنشا ايەلدەردىڭ 70 پايىزى ومىرىندە ءبىر رەت بولسا دا ءتۇرلى, تۇرمىستىق زورلىق-زومبىلىقتى باستان كەشەدى ەكەن. وتباسىنىڭ اجىراسۋى دا سوڭعى جىلدارى وتە جيىلەدى, جاستار اراسىندا وتباسىلىق قۇندىلىقتاردىڭ كومەسكى تارتۋى بايقالادى. تاستاندى بالانىڭ ازايماۋى, بالاعا قارسى قىلمىستىڭ ءورىس الۋى قوعامداعى اسا اۋىر كورىنىستىڭ ءبىرى. جانسەيىت قانسەيىت ۇلى وبلىستاردا وسىعان وراي جۇمىس جۇرگىزىپ وتىرعان انالار كەڭەستەرىن, سونىڭ ىشىندە قوستاناي وبلىسىنداعى انالار كەڭەسىنىڭ «وتباسىن قولداۋدىڭ رەسۋرستىق ورتالىعى» جوباسى جۇمىسىن ريزاشىلىقپەن اتادى.
قوستاناي وبلىستىق قازاقستان حالقى اسسامبلەياسى جۇرگىزىپ وتىرعان جۇمىستاردى وبلىس اكىمى ارحيمەد مۇحامبەتوۆ تە اتاپ ءوتتى. ۇستىمىزدەگى جىلدىڭ 9 ايىندا وبلىستا 127 ءىرى شارا وتكىزىلگەن. انالار كەڭەسى وبلىستاعى قايىرىمدىلىق ءىسىن دامىتۋعا ۇلەس قوسىپ وتىر. ولاردىڭ باستاماسىمەن وتكەن «ىستىق نان», «اشىق جۇرەك», «تازا ويىن», «بۋككروسينگ», «مەرەكەلىك تۇستىك اس» سياقتى قايىرىمدىلىق اكتسيالارى 4 مىڭعا جۋىق ادامدى قامتىعان.
– وبلىستا ەلباسىنىڭ باستاماسىمەن ومىرگە جولداما العان «باقىتتى وتباسى» جوباسى قارىمدى ءجۇرىپ جاتىر. قوستانايلىق كاسىپكەرلەردىڭ قولداۋىمەن 48 كوپ بالالى انا باسپانالى بولدى, – دەدى ارحيمەد بەگەجان ۇلى.
قوعامداعى كوپتەگەن وزەكتى ماسەلەلەردى انالار باستاماسىمەن قولعا العان ىستەر شەشەدى. ارقالىق قالاسىنداعى انالار كەڭەسىن ارداگەر ۇستاز باقىتجامال قالقاەۆا باسقارادى. ولار بەس باعىتتا جۇمىس جۇرگىزەدى, سونىڭ ىشىندە ءجاسوسپىرىم قىزدار تاربيەسىمەن اينالىساتىن «پاراسات» كلۋبىنىڭ جۇمىسىن ەرەكشە اتاۋعا بولادى. سونىمەن قاتار انالار فورۋمىنا قاتىسۋشىلاردىڭ دا اڭگىمەسىنەن كوپتەگەن يگى ىستەر بايقالادى. اقمولا وبلىسى انالار كەڭەسى ءتورايىمىنىڭ ورىنباسارى زاۋرە قوڭقاباەۆانىڭ جەكە اۆتورلىق باعدارلاماسى دا نازارعا الارلىق.
– انالار كەڭەسىندە ءتۇرلى باعىتتا جۇمىستار جۇرەدى. ءبارى دە جاقسى, جاس قىزدار تاربيەسىنە باسا كوڭىل بولەمىز. دەگەنمەن, تەك ايتا بەرۋمەن دە ءىس ونبەيدى, ۇلگىنى ىسپەن كورسەتۋ كەرەك. مەنىڭ جەكە باعدارلامام بويىنشا, ەكى جىلدان بەرى بالالاردى قازاق اۋىلدارىنا اپارىپ, ون كۇن بويى قازاق ءتىلىن ۇيرەنۋگە, قازاق حالقىنىڭ داستۇرلەرىن كورۋگە, ۇلتتىق تاعامداردىڭ جاسالۋىمەن تانىسۋعا جاعداي جاسايمىز. ماعجان جۇماباەۆتىڭ, عابيت مۇسىرەپوۆتىڭ اۋىلىندا, ەلىمىزدىڭ وڭتۇستىك, باتىس وبلىستارىندا بولدىق. جيىرما بەس بالا اۋىلعا بارعاندا قۇرت قايناتۋ, ايران اشىتۋ, قوي قىرقۋ, سيىر ساۋ سياقتى جۇمىستاردىڭ بارلىعىن ون كۇن بويى وزدەرى اتقاردى. بۇل وقۋشىلار توبىندا ۇل-قىزى, ورىس, قازاعى, باسقا ۇلتتارى دا ارالاس بولدى. ءجاسوسپىرىم, بالا كەزىندەگى وسى ساياحات ولاردىڭ عۇمىر بويى ەسىنەن شىقپايدى, ولاردىڭ بويىندا ۇلتتىق داستۇرگە, وتانعا دەگەن پاتريوتتىق سەزىم, قۇرمەت قالىپتاسادى, – دەيدى زاۋرە بالۋانقىزى.
ەكى كۇنگە سوزىلعان انالار فورۋمى باي باعدارلامامەن ەرەكشەلەندى. قاتىسۋشىلار قايىرىمدىلىق اكتسياسىن, ا.بايتۇرسىنوۆ اتىنداعى قوستاناي مەملەكەتتىك جانە ءو.سۇلتانعازين اتىنداعى قوستاناي مەملەكەتتىك پەداگوگيكالىق ۋنيۆەرسيتەتتەرىنىڭ ستۋدەنتتەرىمەن كەزدەسۋلەر وتكىزىپ, قالا كىتاپحانالارىنا اسسامبلەيا اتىنان كىتاپتار تابىس ەتتى. سونىمەن قاتار ايەلدەر مەن بالالاردى ومىرگە بەيىمدەۋ جانە ومىردە قيىندىققا تاپ بولعان بالالاردى قولداۋ ورتالىقتارىندا بولدى. كەشكە ءى.وماروۆ اتىنداعى وبلىستىق قازاق دراما تەاترىندا «رۋحاني جاڭعىرۋ» باعدارلاماسى مەن اسسامبلەيانىڭ «قازاقتانۋ» جوباسى اياسىندا اۋدارماشى, اقىن كامال الپەيىسوۆانىڭ «توركىندەۋ» اتتى شىعارماشىلىق كەشى ءوتتى. فورۋم قوناقتارى قولونەر شەبەرلەرى مەن انالاردىڭ ءوز قولىمەن جاساعان بۇيىمدارىنىڭ كورمەسىن تاماشالادى.
قوستاناي
