سونىمەن قاتار ايەلدەر مەن بالالاردى ومىرگە بەيىمدەۋ جانە ومىردە قيىندىققا تاپ بولعان بالالاردى قولداۋ ورتالىقتارىندا بولدى. كەشكە ءى.وماروۆ اتىنداعى وبلىستىق قازاق دراما تەاترىندا «رۋحاني جاڭعىرۋ» باعدارلاماسى مەن اسسامبلەيانىڭ «قازاقتانۋ» جوباسى اياسىندا اۋدارماشى, اقىن كامال الپەيىسوۆانىڭ «توركىندەۋ» اتتى شىعارماشىلىق كەشى ءوتتى.
شارانىڭ ەكىنشى كۇنى قوستاناي قالاسىنداعى كۇمبەزدى زالدا قازاقستان حالقى اسسامبلەياسى رەسپۋبليكالىق انالار كەڭەسىنىڭ كەڭەيتىلگەن وتىرىسى قازاقستان حالقى اسسامبلەياسى توراعاسىنىڭ ورىنباسارى – قازاقستان رەسپۋبليكاسى پرەزيدەنتى اكىمشىلىگىنىڭ حاتشىلىق مەڭگەرۋشىسى جانسەيىت تۇيمەباەۆتىڭ, وبلىس اكىمى ارحيمەد مۇحامبەتوۆتىڭ قاتىسۋىمەن ءوتتى. وعان جالپىۇلتتىق جوسپاردىڭ ىسكە اسىرىلۋىنا جاۋاپتى ورتالىق مەملەكەتتىك ورگانداردىڭ قىزمەتكەرلەرى, سونداي-اق نۇر-سۇلتان, الماتى, شىمكەنت قالالارى مەن وبلىستار اسسامبلەيالارى انالار كەڭەستەرىنىڭ, ەتنومادەني بىرلەستىكتەرىنىڭ توراعالارى مەن مۇشەلەرى دە شاقىرىلدى. انالار كەڭەسىنىڭ كەڭەيتىلگەن وتىرىسى پرەزيدەنت قاسىم-جومارت توقاەۆتىڭ «سىندارلى قوعامدىق ديالوگ – قازاقستاننىڭ تۇراقتىلىعى مەن وركەندەۋىنىڭ نەگىزى» اتتى قازاقستان حالقىنا جولداۋىندا جانە «رۋحاني جاڭعىرۋ» باعدارلاماسىندا بەلگىلەنگەن مىندەتتەردى شەشۋدەگى انالار كەڭەستەرىنىڭ ءرولى» اتتى تاقىرىپ اياسىندا قوعامدا ورىن الىپ وتىرعان كوپتەگەن وزەكتى ماسەلەلەردى تالقىلادى. وتىرىستىڭ باستى قوناعى جانسەيىت تۇيمەباەۆ ومىردەگى انانىڭ ورنى بولەك, ونىڭ قوعامداعى جانە مەملەكەتتىڭ دامۋىنداعى ورنى ۇلكەن جاۋاپكەرشىلىكتى تالاپ ەتەتىنىن ايتىپ ءوتتى.
«انا– قاسيەتتى ءسوز. وتاندى اناعا تەڭەيمىز, ءتىلدى دە انا ءتىلى دەيمىز. وتباسىنىڭ شەگەسى – انالار. وتباسى بەرەكەلى بولسا, مەملەكەتتىڭ ىرگەتاسى مىقتى بولادى. بالانىڭ تاربيەسىندە دە انانىڭ ماڭىزى ەرەكشە. بالا – بولاشاق. ال بولاشاقتىڭ قانداي بولارى دا اناعا بايلانىستى ەكەن. «وتان وتباسىنان باستالادى» دەگەن ءسوزدىڭ ماڭىزى تەرەڭدە. ۇلتتى تاربيەلەيتىن انا. اسىرەسە قازىرگى الەۋمەتتىك جۇيەلەر زامانىندا انانىڭ اتقارار ءىسى دە ۇشان-تەڭىز» دەدى جانسەيىت قانسەيىت ۇلى. قوعامدا انالار بەلسەندىلىگى قاجەت. ولار قۇرعان ۇكىمەتتىك ەمەس ۇيىمدار بۇگىندە كوپتەگەن جۇمىستار اتقارىپ وتىر. دەگەنمەن قوعامدا پروفيلاكتيكالىق شارالار قاجەت ەتەتىن وزەكتى ماسەلەلەر جوق ەمەس. ۇلداردىڭ تاربيەسى دە نازار اۋدارۋدى قاجەت ەتەدى. ستاتيستيكا بويىنشا ايەلدەردىڭ 70 پايىزى ومىرىندە ءبىر رەت بولسا دا ءتۇرلى, تۇرمىستىق زورلىق-زومبىلىقتى باستان كەشەدى ەكەن. وتباسىنىڭ اجىراسۋى دا سوڭعى جىلدارى وتە جيىلەدى. جانسەيىت قانسەيىت ۇلى وبلىستاردا وسىعان وراي جۇمىس جۇرگىزىپ وتىرعان انالار كەڭەستەرىن, باسقا دا ۇيىمدار جۇمىسىن ريزاشىلىقپەن اتادى.
قازاقستان حالقى قوستاناي وبلىستىق اسسامبلەياسى جۇرگىزىپ وتىرعان جۇمىستاردى وبلىس اكىمى ارحيمەد مۇحامبەتوۆ تە شولىپ ءوتتى. ۇستىمىزدەگى جىلدىڭ 9 ايىندا وبلىس وڭىرىندە 127 ءىرى شارالار وتكەن. انالار كەڭەسى وبلىستاعى قايىرىمدىلىق ءىسىن دامىتۋعا ۇلەس قوسىپ وتىر. انالار كەڭەسىنىڭ باستاماسىمەن وتكەن «ىستىق نان», «اشىق جۇرەك», «تازا ويىن», «بۋككروسينگ», «مەرەكەلىك تۇستىك اس» سياقتى قايىرىمدىلىق اكتسيالار 4 مىڭعا جۋىق ادامدى قامتىعان.
«وبلىستا ەلباسىنىڭ باستاماسىمەن ومىرگە جولداما العان «باقىتتى وتباسى» جوباسى قارىمدى ءجۇرىپ جاتىر. قوستانايلىق كاسىپكەرلەردىڭ قولداۋىمەن 48 كوپ بالالى انالارعا باسپانا بەرىلدى» دەدى ارحيمەد بەگەجان ۇلى.
كەڭەيتىلگەن وتىرىسقا قاتىسۋشىلار قولونەر شەبەرلەرىنىڭ جانە انالار قولىمەن جاسالعان ءتۇرلى بۇيىمداردىڭ كورمەسىن تاماشالادى.
