بىركەلكى, ۇقىپتى جاسالعان توردىڭ ارعى جاعىندا جىپىرلاعان ءۇي قوياندارى استارىنا كوپىرتە سالعان, حوش ءيىسى كوكىرەگىڭدى كەرەتىن كوك ءشوپتىڭ ۇستىندە جاتىر ەكەن. الدارىنداعى كىشكەنتاي ىدىستارعا سالىنعان ارپانى قاۋجاپ قويادى. ءىرى, ەتتى تۇقىم. پەتروۆكا اۋىلىنىڭ تۇرعىنى يۆان شتاحوۆسكي ورتا مەكتەپتى بىتىرگەننەن كەيىن ومىردەن ءوز جولىن ىزدەپ, سان كاسىپتىڭ جالىنا جارماسىپ كوردى. الدىنان جۇمىس ۇركىپ, بوساعاسىنا بەرەكە بايلانعان زامانداستارىنا قاراپ قىزىعاتىن. قولىنان ءىس كەلگەنىمەن, باستاپقى قاراجاتىڭ بولماعاننان كەيىن ءبىر شارۋانى تياناقتاپ باستاپ كەتۋ قيىن ەكەن. جاز ورتاسىندا قۇرداستارىنان مەملەكەت تاراپىنان جاستارعا جاپ-جاقسى قامقورلىق جاسالىپ جاتقانىن ەستىگەن. «Zhas Project» باعدارلاماسىنىڭ ءمان-جايىن اۋدان اكىمدىگىنە بارىپ ءبىلدى. تۇبەگەيلى تۇيسىنگەن كەزدە جەردەن جەتى قويان تاپقانداي قۋانعان. قويان دەمەكشى, بۇرىن دا ءۇي قوياندارىن باعىپ كورگەن. ەش قيىندىعى جوق, ءارى بۇل وڭىردە تاڭسىق دۇنيە.
باعدارلاما بويىنشا العاشقى 500 مىڭ تەڭگە قولىنا تيگەن سوڭ ءۇي قوياندارىنا ارناپ ۇيشىكتەر جاسادى. قولىنان كوپ نارسە كەلەتىن يۆان تورلارىن ءوزى توقىپ, اتقان وقتاي ءتۇپ-ءتۇزۋ قىلىپ بەكىتتى. بۇرىن قۋراي باسىپ جاتقان ءۇي ورنىنداي جەرگە قويان قوراسىن سالىپ جاتىر. ەندى توبەسىن جاۋىپ السا, باسپانانىڭ جايى شەشىلگەلى تۇر.
– كاليفورنيا قوياندارى, – دەيدى جاس كاسىپكەر يۆان, – وتىز باس انالىق تۇقىم ساتىپ الدىم. ارقايسىسى
7 مىڭ تەڭگەدەن. ءىسىم وڭعارىلىپ كەتسە, انالىق ءۇي قوياندارىنىڭ سانىن ەكى مىڭعا جەتكىزبەكپىن. باعدارلامانىڭ تارتىبىنە سايكەس, بۇل ىسكە كومەكشىلەر بەرىلەدى ەكەن دە, ولاردىڭ ارقايسىسىنا ستيپەنديا تولەنەدى. قانداي تاماشا! شىن مانىندە بۇل اۋىلداردىڭ ەڭسەسىن كوتەرەتىن باستاما. مىسالى, ءبىزدىڭ اۋىلداعى ءبىلىم وشاعىندا قازىر 40 بالا عانا بار. ويتكەنى جاستاردىڭ ءبارى اۋدان ورتالىعىنا, نۇر-سۇلتان قالاسىنا كاسىپ ىزدەپ كوشىپ جاتىر. ەندى وسىنداي باعدارلاما ارقىلى اۋىل جاستارى قول قۋسىرىپ قاراپ وتىرماي, پايدالى كاسىپپەن اينالىساتىن بولسا, قونىس اۋدارماي, تۇراقتاپ قالماي ما؟ جاستار قالسا, مەكتەپتەگى بالا سانى دا كوبەيەدى. مۇنداعى جالعىز تابىس تاباتىن جەر, مەكتەپ قانا عوي. مەكتەپ جابىلماسا, مۇعالىمدەر دە, اتا-انالار دا ورنىعىپ وتىرادى. دەمەك, باعدارلاما جالعىزدىڭ ەمەس, جالپىنىڭ جاعدايىن ويلايتىن, شاراپاتى مول دۇنيە.
كاسىپكەردىڭ ايتۋىنا قاراعاندا, قولىنداعى قوياندارعا ارقايسىسى 350-400 كيلولىق ەكى بۋما ءشوپ, جارتى تونناداي ارپا قاجەت. ال قوياننىڭ كوبەيۋى تەز. ەتىن ساتۋدا دا ەشقانداي قيىندىق تۋمايتىن ءتۇرى بار. ويتكەنى ات تۇياعى جەتەتىن جەردەگى ساۋدا سورەلەرىندە قويان ەتى ساتىلىپ جاتقان جوق. بۇل ءوزى ادام اعزاسىنا وتە پايدالى, جەڭىل ەت بولىپ ەسەپتەلەدى. قويان باعۋداعى ءوز تاجىريبەسى بار, ونىڭ ۇستىنە الەۋمەتتىك جەلىدەن كورىپ ۇيرەنگەنى بار, جاس كاسىپكەر قازىر الدىنان الدەبىر قيىندىق شىعار دەپ وتىرعان جوق. ايتۋىنا قاراعاندا, ءۇي قوياندارى سۋىقتان قورىقپايدى, تەك وڭمەنىڭنەن وكپەك جەل سوعىپ تۇرماسا بولدى.
– الداعى ۋاقىتتا باسقا قويانداردى ساتىپ الىپ, تۇقىمىن جەتىلدىرەمىن. ءسويتىپ ءوز الدىما جاڭا قويان تۇقىمىن شىعارۋدى ارماندايمىن, – دەيدى جاس كاسىپكەر, – تابىسىم تولىمدى بولۋى ءۇشىن قويان ەتىن ساتىپ قانا قويماي, ونىڭ تەرىسىن دە يلەپ, باس كيىم, ۇلتاراق, قولعاپ, بوكەباي, تاعى باسقا كۇندەلىكتى قاجەتتى زاتتاردى دايىنداعىم كەلەدى. قازىر وسىنداي دۇنيەلەر جاساۋدى ەپتەپ ۇيرەنىپ ءجۇرمىن. ءبىزدىڭ بالكاشين توڭىرەگى تابيعاتى تاماشا ءوڭىر عوي. ەگەر جەرگىلىكتى جەردە تۋريزم دامىپ, الىستان ات ارىلتىپ مەيماندار كەلىپ جاتسا, قويان ەتىنەن قۋىرداق جاساپ بەرسەم دە, ءىسىم وڭعا باسپاي ما؟..
جاس كاسىپكەردىڭ جانعا جاعىمدى پىكىرىنە دەن قويدىق. اسىرەسە اتالعان باعدارلامانىڭ اتاۋلى اۋىل تۇرعىندارىن اتامەكەندەرىندە تۇراقتاندىرىپ, ءوڭىردىڭ ءوڭىن كىرگىزۋگە سەپتىگى تيەتىنىن ءدال ايتىپ تۇر ەمەس پە؟!
اقمولا وبلىسى,
ساندىقتاۋ اۋدانى
