جاڭا جوبانىڭ جۇمىس توبىمەن كەزدەستىم. ولار ماعان كەڭەستەرىن بەرىپ, قارجى الۋىم ءۇشىن ميكرو نەسيەلەندىرۋگە قۇجات تاپسىردىم. كوپتەن بەرى قالاي قادام جاساۋدى بىلمەي جۇرگەندە, وسىنداي ءساتتى جوبانىڭ ءىزدىڭ قالامىزعا كەلىپ, جۇزەگە اسۋى ءبىز سياقتى كاسىپكەرلەرگە ءۇمىت سىيلادى. كاسىپكەرگە قاجەتتى كەڭەستەردى پايدالانىپ, كاسىبىمدى جاقىن ارادا اشپاقپىن, دەيدى بولات تۋلانوۆ.
جاڭا جوبانىڭ جاڭاوزەن قالاسىندا جۇزەگە اسقانىنا دا ءۇش اپتا بولدى. وسى ارالىقتا كوپتەگەن ىلكىمدى شارالار قولعا الىندى. جاڭاوزەن شاھارى مەن وعان جاقىن ورنالاسقان ەلدى مەكەندەرگە, ساۋدا ورتالىقتارىنا, بازارلارعا كوشپەلى جۇمىس توبى 10 شاقتى رەت باردى. ءىرى كاسىپورىنداردا ۇجىممەن كەزدەسۋلەر ءوتتى. مۇنايلى قالاداعى كوللەدجدەردە ستۋدەنتتەرمەن جەكە تۇلعانى دامىتۋ باعىتىندا بىرقاتار كۋرستار ۇيىمداستىرىلدى.
«اتامەكەن» ۇكپ باسقارۋشى ديرەكتور-جاپپاي كاسىپكەرلىك جانە ميكرو قارجىلاندىرۋ دەپارتامەنتىنىڭ ديرەكتورى باۋىرجان ورازعاليەۆتىڭ ايتۋىنشا, قازىر جاڭاوزەن قالاسىندا 12 مىڭعا جۋىق جۇمىسسىز بار. 160 مىڭ تۇرعىنى بار قالادا اقپاراتتاندىرۋ جۇمىستارىن كۇشەيتۋ كەرەك. مۇناي ءوندىرۋشى مونوقالادا اۆتوماتتاندىرۋ زامان تالابىنا ساي ىسكە اسادى. سوندا جۇمىسسىزدىق بەلەڭ الىپ كەتپەۋى كەرەك. حالىقتىڭ جەكە كاسىبى, قايتا ماماندىق الۋ مۇمكىندىگى بولۋى قاجەت. وسىندا جيناقتالعان ۇسىنىستار مەن تۇجىرىمدار ۇكىمەت دەڭگەيىندە قاراستىرىلاتىن بولادى.
«كاسىپ ءتۇبى-ءناسىپ» جوباسى اياسىندا ءبىر ايدا 2200 كاسىپكەرگە كاسىبي ماماندار كەڭەس بەرىپ, ماسەلەسىن شەشۋ جوسپارلانىپ وتىر. اسىرەسە, ىسكەرلەر كوپ تۇيىققا تىرەلەتىن ەكىنشى دەڭگەيلى بانكتەرمەن قارجىلىق ماسەلەلەر, كاسىپكەرلەر قۇقىعىن قورعاۋ سىندى جايتتاردى سۇيەمەلدەۋ جالعاسۋدا. قالاداعى كاسىبي ءبىلىم بەرەتىن ارنايى وقۋ ورىندارى نارىققا قاجەتتى ماماندار دايىنداپ جاتىر ما؟ دەگەن ساۋال دا زەرتتەلەدى. 9-11 سىنىپ وقۋشىلارىنا «كاسىبي باعدارلاۋ» باعدارلاماسى بويىنشا 2800 وقۋشىمەن جۇمىس جۇرگىزىلىپ, جەرگىلىكتى جاستارعا مۇناي سالاسىمەن شەكتەلمەي, قوعامعا قاجەتتى باسقا دا سالانى كوتەرۋ تۋرالى اقپاراتتاندىرۋ جۇمىستارى قولعا الىندى. جاستار جىلى اياسىندا جاس جەتكىنشەكتەر مەن كاسىپكەرلەردى كۋرستار مەن ترەنينگتەرگە قاتىستىرىپ, قايتارىمسىز گرانت, شاعىن نەسيەلەر الۋ مۇمكىندىگىن تۋعىزۋ باعىتىندا دا قارقىندى شارالار جۇزەگە اسۋدا.
ەستەرىڭىزگە سالا كەتەيىك, «كاسىپ ءتۇبى-ءناسىپ» جوباسى 7 قازاندا باستالدى. ونى جۇزەگە اسىرۋ جىل سوڭىنا دەيىن جالعاسادى. جوبا بارىسىندا: مەملەكەتتىك قولداۋ باعدارلامالارى; ماركەتولوگ قىزمەتى; زاڭ قىزمەتتەرى; اۋىلشارۋاشىلىعى سالاسى; مەملەكەتتىك جانە جەكە-مەنشىك (ەلەكتروندى) ساتىپ الۋلار; كاسىپكەرلىكتى دامىتۋعا قاتىستى ۇسىنىستار; بيزنەستى قارجىلاندىرۋ تەتىكتەرى. «اگرارلىق نەسيە كورپوراتسياسى», «اۋىل شارۋاشىلىعىن قارجىلاي قولداۋ قورى» اق, ««كاسپي» الەۋمەتتىك-كاسىپكەرلىك كورپوراتسيا» اق ماماندارى كەڭەس بەرەدى.
