فورۋمدى اشىپ ءسوز سويلەگەن ەۋرازيا ۇلتتىق ۋنيۆەرسيتەتىنىڭ رەكتورى, اكادەميك ەرلان سىدىقوۆ, ەڭ الدىمەن ماڭىزدى جيىنعا قاتىسۋشىلارعا ءوز اتىنان العىس بىلدىرە وتىرىپ: «اتالمىش فورۋمدى وتكىزۋ جاقسى داستۇرگە اينالدى. مۇنداعى ماقسات – ۇلى دالا تاريحى مەن مادەنيەتىن عىلىمي-زەرتتەۋلەرگە نەگىز ەتۋ جانە ەۋرازيا كەڭىستىگىن سان عاسىرلار بويى مەكەندەگەن حالىقتار جىلناماسىن كۋالاندىرىپ, وركەنيەتتەر ۇيلەسىمىن قازىرگى زاماناۋي كوزقاراسپەن زەردەلەپ, كەلەسى ۇرپاققا جەتكىزۋ. وسى ورايدا تاريحتى ءبىلۋ – اركىمنىڭ پارىزى, سونىڭ ىشىندە جاستارعا مىندەت. ال تاريحي تانىمعا دەگەن قىزىعۋشىلىقتى قالىپتاستىرۋ – قوعامنىڭ بورىشى. بۇگىنگى فورۋم وسى ماقساتقا بار كۇش-جىگەرىن جۇمسايتىنىنا سەنىمدىمىن», دەدى سالماقتى ويىن ساباقتاپ.
كەلەسى كەزەكتە ءسوز العان قۇرمەتتى قوناق, ەلىمىزدەگى ازەربايجان مەملەكەتىنىڭ توتەنشە جانە وكىلەتتى ەلشىسى راشاد مامەدوۆ, بۇگىنگى فورۋمدى وتكىزىپ وتىرعان ەۋرازيا ۇلتتىق ۋنيۆەرسيتەتى مەن ءوز ەلى اراسىنداعى قارىم-قاتىناستىڭ ماڭىزدىلىعىن اتاي كەلە, 2010 جىلدان باستاپ اتالعان وقۋ ورنىندا گەيدار اليەۆ اتىندا اۋديتوريا جۇمىس ىستەپ تۇرعانىنا, بولاشاقتا وسىنداي بىرلەسكەن مادەني شاراعا قاتىسۋدىڭ ماڭىزى زور ەكەنىنە توقتالىپ: «فورۋم تاقىرىبى تۇركى جۇرتىنا قاتىستى بولعاندىقتان ءبىز شەت قالا المايمىز, ويتكەنى باۋىرلاس حالىقپىز. مادەني قۇندىلىقتارىمىز ورتاق. قازاقستان عالىمدارى تۇركى مۇراسىن زەردەلەۋدە زور ەڭبەك ەتىپ جاتىر. اسىرەسە ەلباسى نۇرسۇلتان نازارباەۆتىڭ « ۇلى دالانىڭ جەتى قىرى» ماقالاسى كۇللى تۇركىتەكتەستەر ءۇشىن ەرەكشە ماڭىزعا يە. بۇل باعدارلامالىق ماقالا جاس بۋىننىڭ تانىمىنا جول سالادى جانە ەلارالىق ينتەگراتسيا ءۇشىن ماڭىزى زور», دەدى ديپلومات.
ودان كەيىن مىنبەگە كوتەرىلگەن قىرعىزستاننىڭ قازاقستان رەسپۋبليكاسىنداعى توتەنشە جانە وكىلەتتى ەلشىسى جەەنبەك قۇلۋباەۆ, بۇگىنگى فورۋم جۇمىسى الەم وركەنيەتىنە ەلەۋلى ۇلەس قوسقان تۇركى مادەنيەتى مەن تاريحىن تانۋ جولىندا جاقسى تۇعىرناما بولاتىنىنا سەنىم ءبىلدىرىپ: «جاھاندانۋ داۋىرىندە ۇلى دالا مۇراسىن زەرتتەۋ وتە ماڭىزدى, اسىرەسە جاس ۇرپاق ءۇشىن ەۋرازيا كەڭىستىگىندەگى مادەنيەتارالىق قارىم-قاتىناستار ۇيلەسىمدىلىگىن ءبىلۋى شارت. قىرعىز ەلى «رۋحاني جاڭعىرۋ» جانە « ۇلى دالانىڭ جەتى قىرى» باعدارلاماسىنا ۇلكەن قىزىعۋشىلىق تانىتىپ قانا قويماي, بۇل باعىتتا ىلكىمدى جۇمىستاردى قولعا الۋدا», دەدى.
جيىنعا قاتىسۋشىلار جوعارىداعىداي ماڭىزدى باياندامالاردى تىڭداۋمەن قاتار, نۇر-سۇلتان قالاسىنداعى ۇلتتىق قولجازبالار جانە سيرەك كىتاپتار ورتالىعى مەن ۇلتتىق ارحيۆ مەكەمەسى ۇيىمداستىرعان كورمەنى تاماشالاۋمەن بىرگە ل.ن.گۋميلەۆ مەموريالدىق مۇراجاي-كابينەتىنە ەكسكۋرسيا جاسادى.
فورۋم سوڭىندا مامان عالىمدار ءوزارا پىكىر الماسىپ, قازىرگى تاڭداعى كەيبىر وزەكتى ماسەلەلەردى تالقىلادى. سونىمەن قاتار كەلەر جىلى اتاپ وتىلەتىن ءال-ءفارابيدىڭ 1150, اباي قۇنانباي ۇلىنىڭ 175 جىلدىعى قارساڭىندا, ۇلى دالا, يسلامتانۋ, ابايتانۋ جانە فارابيتانۋ پروبلەمالارىنا قاتىستى عىلىمي-زەرتتەۋلەر پەرسپەكتيۆاسىن ايقىندايتىن قارار قابىلدادى.
