سۋىر كوشى
التايدىڭ كۇنگەي بەتىندەگى «قارشىعا» تەلىمىنە «تۇرەن» تۇسكەلى ءۇشىنشى جىل. مىس كەنىنىڭ مول قورى بار دەيدى. سويتسە, ۋران مەن التىن دا كوپ ەكەن. سودان بەرى قىم-قۋىت تىرلىك.
اتام زاماننان تۇرعان توق اۋىلدىڭ جۇرتى تىم-تىراقاي كوشىپ كەتكەلى ون جىل. ءۇش-اق ءۇي قالعان. سونىڭ ءبىرىنىڭ وتاعاسى ساعىمبەك كەشە يەك استىنداعى قالجىردىڭ بويىنان مال قايىرىپ قايتىپ ەدى, مارقاداي تۇنىق كولدەن باستاۋ الاتىن ۇركەك وزەننىڭ ءمولدىر سۋى اپپاق ايرانداي بوپ, ءىري اعىپ جاتىر. جاعاسىن ۇستاپ, قاتتى شوشىدى.
ءوڭى سۇرلانىپ, ۇيگە ورالسا, بايبىشەسى قالادان كەلگەن ەكى تۋىسىنا شاي بەرىپ جۇگىرىپ ءجۇر. اۋىلدىڭ كۇنباتىس جاعىنداعى ەسكى فەرمانىڭ تۇسىنان قالىڭ سۋىر كوشى «اڭقيتتاپ» بۇلاردىڭ الدارىنان كەسىپ ءوتىپ, ويعا قاراي زىمىراي قاشىپ بارادى دەيدى. و زامان دا بۇ زامان, ۇدەرە كوتەرىلگەن سۋىر كوشىن كىم كورىپتى؟!
سايلاۋ تولەۋ
